Dalnabojščyk sa Smalavič za rulom jeŭ cukierku i padaviŭsia. U vyniku zahinuli dvoje
Heta zdaryłasia na trasie ŭ Rasii. 59‑hadovy Ryhor Biahun kaža, što cukierka «pajšła nie ŭ toje horła», jon staŭ zadychacca i sprabavaŭ adkašlacca.
Ryhor Biahun sa Smalavičaŭ pracavaŭ dalnabojščykam u kampanii «Jumaks», jon vykonvaŭ rejs pa maršrucie pamiž Minskam i Novarasijskam — heta port na čarnamorskim uźbiarežžy ŭ Krasnadarskim krai. Uviečary 17 maja 2025 hoda biełarus jechaŭ pa Arłoŭskaj vobłaści na svaim ciahačy DAF FT XF 105.460.
Padčas darohi Biahun uziaŭ ledzianiec, jaki lažaŭ na piaredniaj paneli kala rula, i pakłaŭ sabie ŭ rot.
«Paśla čaho adčuŭ, što padaviŭsia cukierkaj, ad čaho paciamnieła ŭ vačach. Nie chapała pavietra, staŭ zadychacca i sprabavać adkašlacca. Praz toje, što adbyłosia, na dolu siekundy straciŭ kantrol nad rucham aŭtamabila», — zajaviŭ jon śledčamu.
Jon vyjechaŭ na sustrečnuju pałasu i łob u łob sutyknuŭsia z «Łada Łarhus». Kiroŭca lehkavika zahinuŭ na miescy. Jahonaja žonka, jakaja jechała pasažyrkaj, pamierła pa darozie ŭ balnicu.
Momantu sutyknieńnia kiroŭca nie pamiataje — jon aprytomnieŭ užo tady, kali fura stajała ŭ kiuviecie na procilehłym baku darohi.
4 sakavika 2026 hoda Biehuna pryznali vinavatym pavodle č. 5 art. 264 KK Rasii (parušeńnie PDR, jakoje pa nieaściarožnaści paciahnuła śmierć dźviuch asob) i pryznačyli jamu 3 hady i 6 miesiacaŭ kałonii-pasialeńnia.
Biełarus całkam pryznaŭ vinu.
Čaćviora svajakoŭ zahinułych padali hramadzianskija pazovy pra kampiensacyju maralnaj škody — ahułam na $174 tysiač. Ale ŭ sud jany tak i nie źjavilisia i dadatkovych dokazaŭ nie padali, tamu sud pryznaŭ za imi prava na kampiensacyju, ale vyznačać jaje pamier buduć u ramkach hramadzianskaha suda.
Kamientary