Biełaruś i Rasija damovilisia pa 107 sa 110 punktaŭ płana zbližeńnia na nastupnyja try hady. Ale samy važny padvis

Pra što nie atrymałasia damovicca

Asnoŭny kanflikt — vakoł enierhietyčnych rynkaŭ. Biełaruski bok nastojvaje na farmuloŭcy «stvareńnie abjadnanaha rynku hazu, elektraenierhii, nafty i naftapraduktaŭ».

Prapanujuć prapisać takija:

• raŭnapraŭnyja ŭmovy dziejnaści biełaruskich i rasijskich subjektaŭ haspadarańnia;
• adzinyja praviły dostupu da enierhietyčnaj infrastruktury;
• uzhodnienyja pryncypy farmiravańnia taryfaŭ na pasłuhi naturalnych manapolij u śfiery enierhietyki.

Rasijski bok prapanavaŭ zamiest usiaho hetaha farmuloŭku ŭsiaho ź piaci słoŭ: «raźvićcio supracoŭnictva ŭ naftahazavaj śfiery» — razmyta i biez kankretnych abaviazacielstvaŭ. Minenierha Biełarusi i kancern «Biełnaftachim» hetuju ideju nie padtrymali.

«Usie padpisanyja abaviazacielstvy zastajucca dekłaracyjaj»

Pradstaŭniki Minekanomiki pišuć u zakrytym dakumiencie, što takaja karotkaść śviedčyć «pra niedastatkovuju zacikaŭlenaść rasijskaha boku ŭ vypracoŭcy kampramisnaj farmuloŭki».

Dalej aŭtary pryvodziać pazicyju kancerna «Biełnaftachim». U taho ŭžo byli i «praciahły vopyt uzhadnieńnia z rasijskim bokam» roznych dakumientaŭ, i «fakty nievykanańnia damoŭlenaściaŭ pa pastaŭkach nafty».

«Možam kanstatavać, što ŭsie padpisanyja abaviazacielstvy pa stvareńni rynku nafty i naftapraduktaŭ zastajucca dekłaracyjaj, — pišuć pradstaŭniki «Biełnaftachima». — Našy namahańni prymusić rasijski bok vykanać pryniatyja na siabie mižnarodnyja abaviazacielstvy, a mienavita zbałansavać rynak i ŭnifikavać praviły dostupu da sistem transpartavańnia nafty, traktujucca jak niehatoŭnaść da pošuku kampramisnych rašeńniaŭ i pravakujuć pastajannyja roznahałossi pa pryčynie vysokaj adčuvalnaści nazvanaj śfiery dla Rasijskaj Fiederacyi».

Pradstaŭniki «Biełnaftachima» ličać, što hałoŭny tormaz dla farmiravańnia adzinaha rynku — toje, što rasijski bok prosta nie zacikaŭleny stvarać umovy dla «sinierhietyčnaha efiektu dla abodvuch bakoŭ» — ni ciapier, ni ŭ budučyni.

Zhodna z dakumientam, na pieramovach pa «Asnoŭnych napramkach» rasijskaje Ministerstva enierhietyki navat nie zabiaśpiečyła «ŭzrovień kiraŭničaha składu» — to-bok adpraviła pradstaŭnikoŭ, jakija zajmajuć nie samyja vysokija pasady.

Aŭtary pryjšli da vysnovy, što naftahazavaje pytańnie «patrabuje rašeńniaŭ na bolš vysokim uzroŭni», i prapanavali damahacca pieramoŭ na ŭzroŭni kiraŭnikoŭ viedamstvaŭ. Dla hetaha chacieli źviarnucca da Alaksieja Avierčuka, namieśnika staršyni ŭrada Rasii.

Jak jašče źbirajucca zbližacca

Akramia enierhietyčnaj sprečki, u 110 punktach «Asnoŭnych napramkaŭ» — vialiki śpis zadač roznaj stupieni kankretyki.

U atamnaj enierhietycy krainy damovilisia pra budaŭnictva treciaha enierhabłoka Biełaruskaj AES — hety punkt užo całkam uzhodnieny z «Rasatamam», jak i pytańni abychodžańnia z adpracavanym jadziernym palivam.

U abaronnaj śfiery źbirajucca zaklučyć u 2027 hodzie pahadnieńnie «pra tyłavoje i miedycynskaje zabieśpiačeńnie vajskovych kantynhientaŭ» dźviuch krain. Heta moža tyčycca, naprykład, zabieśpiačeńnia i miedycynskaj padtrymki vojskaŭ, kali jany buduć znachodzicca na terytoryi adna adnoj — ale detali ŭ dakumiencie nie raskrytyja.

U pramysłovaści mnoha havorycca pra impartazamiaščeńnie — sumiesna źbirajucca vyrablać kampanienty, jakija raniej zakuplali na Zachadzie: sistemy ABS i EBS dla tarmazoŭ, kardannyja vały, stanki ź ličbavym prahramnym kiravańniem. Jašče ŭ płanach — «stvareńnie rabatyzavanaj techniki dla aŭtanomnych technałahičnych kompleksaŭ» i «stvareńnie vytvorčaści samalotaŭ» (u liku adkaznych — Dziaržvajenpram Biełarusi).

U śfiery finansaŭ chočuć zapuścić transhraničnyja płaciažy pa QR-kodzie dla hramadzian Biełarusi i Rasii. Mnohija punkty dakumienta davoli ahulnyja: roznyja viedamstvy prapanujuć «raźvićcio supracoŭnictva», «abmien vopytam», «harmanizacyju padychodaŭ» i «uzajemadziejańnie ŭ pytańniach udaskanaleńnia».

Dva astatnija sprečnyja punkty, padobna, nie takija vostryja. Adzin tyčycca spałučeńnia ličbavych infarmacyjnych sistem dla spraščeńnia handlu, druhi — likvidacyi padvojnaha padatkaabkładańnia dla samazaniatych hramadzian dźviuch krain. Pa abodvuch biełaruski bok čakaje adkazu z Rasii.

• 0
• 1
• 8
• 4
• 0
• 0
• 8
• 0