Jak žychary vioski pad Maładziečnam zmahajucca za čystuju vadu ŭžo 15 hadoŭ
Da čystaj vady — 450 mietraŭ.
U Mojsičach, što za šeść kiłamietraŭ ad Maładziečna, vodapravod to pierastaje pracavać, to padaje ŭ damy ruduju vadu z pacham ciny. Žychary śćviardžajuć, što prablema ciahniecca z 2010 hoda. Pry hetym da stancyi, adkul čystaja vada pastupaje ŭ susiedniuju viosku, — usiaho kala 450 mietraŭ, piša Kraj.by.
Vodapravod u Mojsičach źjaviŭsia jašče ŭ 1975 hodzie. Jon staŭ sapraŭdnym vyratavańniem: hruntavyja vody ŭ hetaj miascovaści zalahajuć hłyboka, a vady ŭ kałodziežach mała. Z časam u vioscy vysachli navat sažałki.
«Tady vada ŭ nas była vielmi smačnaja i čystaja. Usio było dobra prykładna da 2010 hoda. Tady pačalisia prablemy. To napor vady byŭ słaby, to jana iržavaja, to cinaj śmiardzić. Pastajanna pačali hareć pompy», — raskazvaje adna z najstarejšych žycharak vioski Neła Mikałajeŭna.
Vada ź miascovaj śvidraviny spačatku padajecca ŭ viežu, a adtul — u damy i na raźmieščanuju pobač fiermu. Sistema naležyć sielhaspradpryjemstvu «Chožavaahra-2009», jakoje i kuplaje novyja pompy zamiest złamanych. Pretenzij da pradpryjemstva ŭ žycharoŭ niama, ale pastajannaja zamiena abstalavańnia prablemy nie vyrašaje.
27 žniŭnia pompa złamałasia znoŭ, i vioska zastałasia biez vady. Praz čatyry dni rabotniki vodakanała pastavili novuju. Paśla zapusku z kranaŭ pajšła vada ahnista-rudaha koleru. Paźniej jana paśviatleła, ale zastavałasia mutnaj i z asadakam.
Žychary kažuć, što vykarystoŭvać takuju vadu dla myćcia jašče možna, ale pić jaje i hatavać na joj mnohija nie ryzykujuć. Pavodle miascovaj žycharki Śviatłany, letaś sanstancyja brała proby i vyjaviła, što ŭtrymańnie žaleza pieravyšaje normu ŭ piać razoŭ.
Pryčyny kiepskaj jakaści vady dakładna nie viadomyja. Sialanie miarkujuć, što prablema moža być u znošanych za paŭstahodździa trubach abo ŭ niedachopie vady ŭ śvidravinie.
Pryblizna try hady tamu z Maładziečna praviali vodapravod u susiedniuju Słabodku, adkul vada idzie dalej u Chožava. Mojsičy da hetaj sistemy tak i nie padklučyli, choć, pavodle žychara vioski Vasila, ad raźmierkavalnaj stancyi treba prakłaści kala 450 mietraŭ truby.
U sielsaviecie ludziam prapanavali stvaryć kaapieratyŭ i apłacić raboty samastojna.
«Vy bačyli, chto pryjšoŭ na sustreču z vami? U nas ža praktyčna adny piensijaniery. Z kim tut arhanizoŭvać kaapieratyŭ? Adkul piensijanieram brać hrošy?» — kaža Vasil.
Žychary sabrali ŭžo jak minimum 26 podpisaŭ pad zvarotam, jaki źbirajucca pieradać u Maładziečanski rajvykankam. Pakul ža pitnuju vadu jany kuplajuć, pryvoziać z horada abo nabirajuć u znajomych u Słabodcy. A kali pompa znoŭ łamajecca, zastajecca, jak kažuć viaskoŭcy, «stavić bočki z tazikami i čakać daždžu».
Ciapier čytajuć
Rasijanie sapraŭdy stali čaściej kuplać nieruchomaść u Biełarusi? Voś što raskazvajuć ryełtary15
Rasijanie sapraŭdy stali čaściej kuplać nieruchomaść u Biełarusi? Voś što raskazvajuć ryełtary
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»1111
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»11
Niebaraka ź Lachavičaŭ źnik «na SVA» ŭžo na treci dzień, a ŭ baraćbie za hrabavyja sčapilisia siastra, sužycielka i žonka — z čatyrma dziećmi, ale čužymi88
Kamientary