Piać tysiač amierykanskich vajskoŭcaŭ praviali 250 dzion u mory, a ciapier vysadziacca ŭ Tajłandzie. Ustanovy dla darosłych rychtujucca
Pataja — adzin z centraŭ načnoha žyćcia — rychtujecca da vializnaha napłyvu naviednikaŭ: paśla bolš jak 250 dzion u mory amierykanski avijanosiec USS Abraham Lincoln pryšvartavaŭsia ŭ porcie Łajem-Čabanh. Na borcie — kala piaci tysiač marakoŭ i marskich piechacincaŭ, piša Bild.
U kancy 2025 hoda Abraham Lincoln vyjšaŭ u Cichi akijan u płanavy pachod. Adnak praz vajnu ź Iranam atamny avijanosiec byŭ pierakinuty na Blizki Uschod i zastavaŭsia tam značna daŭžej, čym płanavałasia.
Amierykanskija vydańni paviedamlali pra nadzvyčajnuju psichałahičnuju nahruzku i pieraboi z zabieśpiačeńniem na borcie, niaspraŭnyja prybiralni i mierkavanyja sproby samahubstva.
VMS ZŠA pryznali składanyja ŭmovy, ale padkreślili, što ekipaž atrymlivaŭ dastatkovuju padtrymku.
Ciapier vajskoŭcaŭ čakaje Pataja — sumnaviadomy tajski kurort na bierazie Sijamskaha zaliva. Horad viadomy va ŭsim śviecie svaim načnym žyćciom i ŭžo dziesiacihodździami ličycca simvałam seks-turyzmu ŭ Paŭdniova-Uschodniaj Azii.
Jašče padčas vajny ŭ Vjetnamie, pačynajučy ź siaredziny 1960‑ch hadoŭ, siudy pryjazdžali na adpačynak tysiačy amierykanskich vajskoŭcaŭ. Z byłoj rybackaj vioski ŭsiaho za niekalki hadoŭ vyras mižnarodny centr zabaŭ.
Miascovy biźnies ciapier uskładaje vialikija nadziei na vizit amierykancaŭ. Hateli, bary, restarany i kramy raźličvajuć na značny rost vyručki. Pavodle miascovych uładaŭ, maraki praviaduć u Patai niekalki dzion, pierš čym avijanosiec praciahnie šlach u ZŠA.
Haradskaja administracyja i palicyja Patai rychtujucca: amierykanskija vajskoŭcy pavinny sychodzić na bierah nievialikimi hrupami, kab było lahčej kantralavać praces. Im taksama zabaranili peŭnyja vidy adpačynku, naprykład, užyvańnie marychuany (jakoje ciapier u Tajłandzie častkova dazvolena) i ryzykoŭnyja vidy vodnaha sportu.
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni5
Kamientary
https://d2accbiqacj5y8.cloudfront.net/403667