Stralba pamiž HUR i SBU. Chto staŭ pryčynaj kanfliktu?

Ranicaj 2 vieraśnia ŭ Kijevie dajšło da pierastrełki pamiž supracoŭnikami SBU i vajskoŭcami HUR. Pavodle ŭkrainskich ŚMI, troje pradstaŭnikoŭ vajennaj raźviedki byli paranienyja. Baki pa-roznamu apisvajuć, chto spravakavaŭ sutyknieńnie i pieršym užyŭ zbroju.

Ciapier stali viadomyja novyja padrabiaznaści spravy, jakaja, jak miarkujecca, i stała pryčynaj kanfliktu. U jaje centry — namieśnik kamandzira Rasijskaha dobraachvotnickaha korpusa Ściapan Kapłunoŭ.

Chto taki Ściapan Kapłunoŭ

Kapłunoŭ — hramadzianin Rasii i namieśnik kamandzira Rasijskaha dobraachvotnickaha korpusa (RDK) pa bajavoj pracy. RDK uvachodzić u skład «Śpiecpadraździaleńnia Cimura» Hałoŭnaha ŭpraŭleńnia raźviedki Minabarony Ukrainy. Pavodle ŭkrainskich ŚMI, Kapłunoŭ pierajechaŭ va Ukrainu paśla anieksii Kryma ŭ 2014 hodzie, słužyŭ u pałku «Azoŭ» i Uzbrojenych siłach Ukrainy. U 2022 hodzie padčas bajoŭ pad Kijevam jon atrymaŭ ciažkaje ranieńnie, a paźniej dałučyŭsia da RDK.

23 žniŭnia Kapłunoŭ źnik. Jaho advakat śćviardžaŭ, što mužčynu kala doma pasadzili ŭ aŭtamabil nieviadomyja, pry hetym aficyjnaha pratakoła zatrymańnia nie było. Pra miescaznachodžańnie Kapłunava, pavodle advakata, nie było viadoma da viečara 1 vieraśnia.

Pavialičyć

Što jamu inkryminuje SBU

3 vieraśnia SBU raskryła svaju viersiju spravy. Pavodle śpiecsłužby, Kapłunoŭ supracoŭničaŭ z FSB i pahadziŭsia vykanać jaje zadańnie — zabić adnaho ź lidaraŭ rasijskaj apazicyi, jaki pavinien byŭ pryjechać va Ukrainu.

Jaho imia SBU nie nazyvaje. Ukrainski telehram-kanał INSIDER UA sa spasyłkaj na svaje krynicy śćviardžaje, što Kapłunovu prapanoŭvali likvidavać Achmieda Zakajeva.

U SBU śćviardžajuć, što atrymali infarmacyju pra padrychtoŭku FSB hetaha zabojstva napiaredadni Dnia Niezaležnaści Ukrainy 24 žniŭnia. Padčas pravierki vyśvietliłasia, što da spravy moža być datyčny Kapłunoŭ.

Pavodle SBU, u jaho telefonie znajšli pierapisku z pradstaŭnikom FSB. Z apublikavanych śpiecsłužbaj paviedamleńniaŭ vynikaje, što surazmoŭca prapanoŭvaŭ Kapłunovu zadańni za hrošy.

Pavialičyć

SBU śćviardžaje, što havorka išła nie tolki pra rasijskaha apazicyjaniera. Nibyta Kapłunovu taksama prapanoŭvali zabivać inšych vajskoŭcaŭ Sił abarony Ukrainy za hrašovuju ŭznaharodu.

SBU apublikavała videa, u jakim Kapłunoŭ pryznaje, što kantaktavaŭ z FSB. U śpiecsłužbie taksama zajavili, što jon daŭ infarmacyju pra inšych mahčymych udzielnikaŭ spravy i supracoŭničaŭ sa śledstvam. Hetym u SBU patłumačyli, čamu Kapłunovu nie abirali mieru strymańnia.

Kapłunoŭ zajaviŭ, što pryznaŭsia pad ciskam

Sam Kapłunoŭ paśla vyzvaleńnia ŭ intervju Radio NV raskazaŭ svaju viersiju.

Pavodle Kapłunova, 23 žniŭnia jaho schapili kala doma, nadzieli kajdanki, zalapili vočy skotčam i advieźli ŭ nieviadomaje miesca. Usiaho jaho ŭtrymlivali dzieviać sutak na dvuch roznych abjektach.

Najbolš intensiŭna, jak śćviardžaje mužčyna, jaho dapytvali pieršyja dvoje sutak. Fizičnaha hvałtu pry hetym nie ŭžyvali, adnak kazali, što jon moža «źniknuć nazaŭsiody», i zhadvali pra «kapańnie jamy».

Na dopytach Kapłunova abvinavačvali ŭ suviaziach z FSB. Pavodle jaho słoŭ, pad psichałahičnym ciskam jon pryznaŭ, što kantaktavaŭ z rasijskaj śpiecsłužbaj, a paśla nibyta pieradaŭ hety kantakt svajmu niepasrednamu kamandziru Dźmitryju Ivanovu.

Ciapier Kapłunoŭ śćviardžaje, što nasamreč ničoha padobnaha nie było. Pa jaho słovach, metaj taho, što adbyłosia, mahła być dyskredytacyja «Śpiecpadraździaleńnia Cimura» HUR i jaho kamandzira.

Praź dzieviać sutak Kapłunova adpuścili i pryvieźli da doma, kala jakoha zatrymali. Pra toje, što ŭ kvatery buduć pravodzić pieratrus, zahadzia nie papiaredzili.

Mienavita padčas hetaha pieratrusu 2 vieraśnia i adbyŭsia kanflikt pamiž SBU i HUR. Abstaviny samoj stralby ciapier rasśleduje Dziaržaŭnaje biuro rasśledavańniaŭ.

• 1
• 0
• 0
• 11
• 5
• 0
• 1
• 0