Palitźniavoleny žurnalist Andrej Alaksandraŭ staŭ łaŭreatam Free Media Awards
Žurnalist i miedyjamieniedžar Andrej Alaksandraŭ, jaki znachodzicca ŭ turmie ŭ Biełarusi, byŭ abrany pretendentam na premiju Free Media Awards za svaju mužnaść i addanaść svabodzie presy i svabodzie vykazvańnia mierkavańniaŭ va ŭmovach usio bolš represiŭnaha režymu, piša Biełaruskaja asacyjacyja žurnalistaŭ.
4 vieraśnia 2026 hoda fondy Fritt Ord i ZEIT STIFTUNG BUCERIUS abvieścili łaŭreataŭ premii Free Media Awards. U śpis uvajšoŭ biełaruski palityčny viazień Andrej Alaksandraŭ.
«Dziakujučy svajoj pracy ŭ niezaležnym biełaruskim infarmacyjnym ahienctvie BiełaPAN i Biełaruskaj asacyjacyi žurnalistaŭ, jon dapamoh umacavać prafiesijnyja standarty žurnalistyki, padtrymać niezaležnyja ŚMI i pabudavać mižnarodnyja sietki žurnalistaŭ i pravaabaroncaŭ», — zaznačyŭ arhkamitet premii.
Razam ź biełarusam uznaharodu atrymajuć kiraŭnik adździeła žurnalisckich rasśledavańniaŭ «Ukrainskaj praŭdy» Michajła Tkač, hruzinskaje vydańnie iFact, jerevanski telekanał Factor TV i niezaležnaje rasijskaje anłajn-vydańnie «Viorstka».
Cyrymonija ŭručeńnia premii Free Media Awards adbudziecca ŭ Muziei Munka ŭ Osła 29 vieraśnia 2026 hoda.
Chto taki Andrej Alaksandraŭ
Jon naradziŭsia ŭ 1978 hodzie ŭ rasijskim Nižnim Tahile ŭ siamji vajskoŭca, ale ź dziacinstva žyŭ u Pastavach na Viciebščynie. Paśla škoły skončyŭ historyka-fiłałahičny fakultet Połackaha dziaržaŭnaha ŭniviersiteta, ale ŭrešcie zasiarodziŭsia na žurnalistycy. Karjeru pačynaŭ u navapołackaj haziecie «Chimik», daros da namieśnika dyrektara infarmacyjnaha ahienctva BiełaPAN. Ciaham 2009—2012 hadoŭ byŭ u kiraŭnictvie Biełaruskaj asacyjacyi žurnalistaŭ.
Atrymaŭ i mižnarodny dośvied: maje stupień mahistra miedyjamieniedžmientu Vestminsterskaha ŭniviersiteta ŭ Łondanie, pracavaŭ u pravaabarončych arhanizacyjach Index on Censorship i Article 19. Niahledziačy na dobryja pierśpiektyvy za miažoj, viarnuŭsia ŭ Biełaruś, ciaham 2015—2018 hadoŭ byŭ u dyrektaracie BiełaPAN, zatym pierajšoŭ na damovu jak miedyjakansultant.
Andrej Alaksandraŭ byŭ aryštavany za svaju pracu ŭ 2021 hodzie. 6 kastryčnika 2022 hoda sudździa Minskaha abłasnoha suda Viačasłaŭ Tulejka u zakrytym režymie pryznačyŭ miedyjamieniedžaru 14 hadoŭ pazbaŭleńnia voli i štraf pamieram bolš za 10 tysiač dołaraŭ u ekvivalencie. Žurnalist pryznany palityčnym viaźniem.
Što takoje Free Media Awards
Premija Free Media Awards — heta niamiecka-narviežskaja ŭznaharoda dla žurnalistaŭ Uschodniaj i Centralnaj Jeŭropy. Jaje zasnavali fondy Fritt Ord i ZEIT-Stiftung Ebelin und Gerd Bucerius. U mnohich krainach Uschodniaj Jeŭropy ŚMI zaznajuć vialiki cisk. Z dapamohaj hetaj premii fondy chočuć zaachvocić žurnalistaŭ i srodki masavaj infarmacyi praciahvać svaju pracu i ŭmacavać ich volu nie paddavacca zapałochvańniu cenzuraj i supraćstajać samacenzury. Ad troch da šaści ŭznaharod štohod uručajuć žurnalistam i redakcyjam, jakija ŭzmacniajuć niezaležnuju žurnalistyku i dapamahajuć hramadstvu atrymlivać dakładnuju infarmacyju navat va ŭmovach cisku i cenzury.
U roznyja hady premiju atrymlivali biełaruskija vydańni: «Briestskij kuŕjer», «Biełorusskaja diełovaja hazieta», «Narodnaja vola», «Biełorusy i rynok», Intex-press, «Vitiebskij kuŕjer», «Salidarnaść», «Naša Niva», CDMag, «Hazieta Słonimskaja», «Ježiednievnik», «Novy čas», «Borisovskije novosti», «Biełaruski partyzan», Reform, infarmahienctva BiełaPAN, partał TUT. by, Biełaruski rascledavalnicki centr, Biełaruskaja asacyjacyja žurnalistaŭ. A taksama łaŭreatami stanavilisia ajčynnyja žurnalisty Śviatłana Kalinkina, Maryna Koktyš, Valer Karbalevič, Alaksandr Kłaskoŭski, Kaciaryna Barysievič, Kaciaryna Andrejeva, Darja Čulcova, Natalla Łubnieŭskaja, Łarysa Ščyrakova.
Kamientary