Pamior biełaruski historyk i knihavydaviec Iosif Chaŭratovič, paviedamili jahonyja znajomyja ŭ sacsietkach. Jamu było 96 hadoŭ.
Iosif Chaŭratovič naradziŭsia 24 śniežnia 1929 hoda ŭ vioscy Varhućcieva Kruhlanskaha rajona Mahiloŭskaj vobłaści.
U 1948 hodzie skončyŭ Minskaje mastackaje vučylišča. Pracavaŭ biblijatekaram, zatym uznačalvaŭ Tałačynski rajonny Dom kultury i pracavaŭ inśpiektaram adździeła kultaśvietustanoŭ Tałačynskaha rajvykankama. U 1955 hodzie skončyŭ Biełaruski dziaržaŭny ŭniviersitet.
Paśla hetaha pracavaŭ u Instytucie historyi partyi pry CK KPB: byŭ navukovym supracoŭnikam, zahadvaŭ siektaram, a paźniej staŭ vučonym sakratarom. U 1967 hodzie atrymaŭ stupień kandydata histaryčnych navuk, a ŭ 1976‑m staŭ łaŭreatam Dziaržaŭnaj premii Biełarusi.
Z 1967 hoda Chaŭratovič pracavaŭ u redakcyi Biełaruskaj encykłapiedyi, dzie spačatku ŭznačalvaŭ redakcyi pa historyi SSSR i BSSR, z 1973 hoda byŭ adkaznym sakratarom, a z 1975‑ha — namieśnikam hałoŭnaha redaktara. U 1983 hodzie jamu prysvoili zvańnie zasłužanaha rabotnika kultury Biełarusi.
Asnoŭnyja navukovyja pracy Chaŭratoviča pryśviečanyja historyi revalucyjnaha i nacyjanalna-vyzvalenčaha ruchu ŭ Zachodniaj Biełarusi, revalucyi 1917 hoda, historyi Druhoj suśvietnaj vajny i dziejnaści biełaruskich kamunistyčnych arhanizacyj.
Jon byŭ adnym z aŭtaraŭ manahrafii «Rievolucionnyj puť Kompartii Zapadnoj Biełoruśsii», a taksama aŭtaram daśledavańniaŭ i narysaŭ pra viadomych dziejačaŭ nacyjanalna-vyzvalenčaha i revalucyjnaha ruchu. Pisaŭ pra Vieru Charužuju, Alaksieja Sałaŭja, Leapolda Rodzieviča, Sofju Pankovu, Ivana Pulichava, Paŭła Lepiašynskaha, Uładzimira Azina, Michaiła Frunze i inšych.
Chaŭratovič taksama ŭdzielničaŭ u padrychtoŭcy šmatlikich dakumientalnych zbornikaŭ, pryśviečanych historyi Kastryčnickaj revalucyi ŭ Biełarusi, revalucyjnamu ruchu ŭ Zachodniaj Biełarusi, partyzanskaj baraćbie ŭ hady Druhoj suśvietnaj vajny, złačynstvam nacystaŭ na terytoryi Biełarusi i saviecka-polskim adnosinam.
Akramia navukovaj pracy, jon u 1990‑ch udzielničaŭ u stvareńni «Ilustravanaj chranałohii historyi Biełarusi» i raspracoŭcy pryncypaŭ padrychtoŭki encykłapiedyčnych vydańniaŭ.
Kamientary