Budaŭnictva treciaj čarhi Zialonałužskaj linii mietro: što ŭžo zroblena i što jašče napieradzie

Novyja stancyi treciaj čarhi buduć niehłybokaha zalahańnia — 15—16 m. Kanstrukcyja stancyi «Park Družby Narodaŭ» — sklapienistaha typu, a «Kamaroŭskaja» i «Piarespa» — kałonnyja trochpralotnyja.

Zaraz zadziejničanyja rabotniki na troch abjektach, častka ź ich — na budaŭnictvie abarotnych tupikoŭ praciahłaściu 250 m pamiž Płoščaj Banhałor i vulicaj Niakrasava. Jany adnačasova raspracoŭvajuć katłavan i robiać «ścianu ŭ hruncie» — aharodžvalnuju bietonnuju kanstrukcyju. Taksama vykonvajecca ŭmacavańnie dvuch jarusaŭ katłavana.

U nastupnym miesiacy BMU №2 razam z Upraŭleńniem miechanizacyi «Minskmietrabud» prystupić da ŭźviadzieńnia kanstrukcyj abarotnych tupikoŭ.

Asablivaściu hetaj čarhi Minskaha mietrapalitena źjaŭlajecca vysoki ŭzrovień hruntovych vod. Pierad pačatkam raspracoŭki katłavanaŭ stvarajecca sistema panižeńnia ŭzroŭniu vady. Jana ŭklučaje śvidraviny — kožnaja hłybinioj bolš za 30 m. Z abodvuch bakoŭ abarotnych tupikoŭ ich 33, užo zroblena 30.

— Stancyja «Park Družby Narodaŭ» raźmieścicca pad kołam płoščy Banhałor, — praciahvaje Uładzimir Doŭhal.

— 18 m jaje viestybiula ŭžo pabudavana. Nam jašče treba pierakłaści inžyniernyja sietki, hałoŭnaja ź jakich — vialikaja ciepłatrasa. Ciapier uzhadniajucca terminy jaje pieraklučeńnia i pieranosu. Paśla hetaha dabudujem astatnija 50 m viestybiula. Zatym upraŭleńnie miechanizacyi prakładzie źvierchu abjezdny ŭčastak darohi.

Ad stancyi minułym letam pačałasia prachodka levaha tunela ščytom «Alesia». Paźniej adsiul pačnie prakładvać druhi tunel jašče adzin miechanizavany kompleks. Na 26 lutaha «Alesia» prajšła 1 111 m.

Na stancyi «Kamaroŭskaja», na skryžavańni vulic Viery Charužaj i Maksima Bahdanoviča, viaducca raboty pa ŭładkavańni «ściany ŭ hruncie» i ŭmacavańni katłavana tam, dzie heta mahčyma.

Da budaŭnictva stancyi «Piarespa», jakaja raźmieścicca na skryžavańni praśpiekta Mašerava i vulicy Krapotkina, mietrabudaŭniki pakul nie prystupali.

Na hetym učastku jašče nie pieraniesieny ŭsie inžyniernyja sietki. U krasaviku — mai, kali dazvolić nadvorje, płanujecca stvaryć dva abjezdnyja šlachi na praśpiekcie. Uźviadzieńniem samoj stancyi zojmiecca SMU № 1.

Jašče adzin abjekt budaŭnictva hetaj čarhi Zialonałužskaj linii — na bierazie raki Śvisłač niedaloka ad haścinicy «Jubilejnaja» na praśpiekcie Pieramožcaŭ. Tut užo aharodžana budaŭničaja placoŭka, nad jakoj uzvyšajecca strała vialikaha krana.

— My ŭžo ŭstalavali 100‑tonny husieničny kran, — tłumačyć namieśnik hałoŭnaha inžyniera BMU № 1 Raman Šluhin. — Zaviaršajem padrychtoŭku budaŭničaj placoŭki i zavoz špunta — elemienta macavańnia aharodžvalnaj kanstrukcyi katłavana ŭ rečyščy raki.

Kanstrukcyju padzielać papiarok na dźvie častki:

— ad siaredziny rečyšča Śvisłačy da pravaha bieraha;

— ad siaredziny da levaha bieraha.

Špunt zabivajecca na vialikuju hłybiniu. Paśla spatrebicca pravieści składanyja technałahičnyja raboty pa panižeńni ŭzroŭniu vady, adkačać vadu i vyniać hrunt nižej dna raki dla ŭładkavańnia manalitnaj plity.

Jana budzie z armavanaha bietonu taŭščynioj 50 sm, daŭžynioj 41 m i šyrynioj 13 m. Da kanca maja ŭ dva etapy plita pavinna być hatova dla biaśpiečnaj prachodki ščyta «Alesia».

• 2
• 0
• 0
• 0
• 0
• 0
• 0
• 0