Ich Zareckaja: deputat-jabaćka Aleh Navicki kinuŭ biełaruskich inviestaraŭ na 20 miljonaŭ. Detali schiemy
Aleh Navicki — pradprymalnik, jaki da padziej 2020‑ha nikoli nie chapaŭ ź nieba zorak. Ale aktyŭnaje zaniaćcio «pravilnaj» palityčnaj pazicyi dazvoliła jamu pa-sapraŭdnamu razharnucca i dakranucca da miljonaŭ. Pramiežkavy vynik — častka 4 artykuła 209 Kryminalnaha kodeksa (machlarstva ŭ asabliva bujnym pamiery). Ciozka kasmanaŭta nie ŭźlacieŭ — padrabiaznaści.
Hetyja hady «Naša Niva» časta piša pra piersanažaŭ z parody dziaciej lejtenanta Šmita, jakim spryjajuć čas i abstaviny: «Vriemia vybrało nas».
U Biełarusi kryminalniki čaplajuć sabie na łackany čyrvona-zialony ściah i robiać karjery.
Čytajcie taksama:
Mścisłaŭ Miekta: jašče adzin recydyvist rviecca va ŭładu, prykinuŭšysia śpiecnazaŭcam-jabaćkam
Jabaćka lejtenanta Šmita. Šmatrazova sudzimy recydyvist vydaŭ siabie za vieterana śpiecnaza i daros da ministerskaha ŭzroŭniu
Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava
U Jeŭropie inšyja pudrać mazhi čynoŭnikam, vydajučy siabie za praryŭnych pradprymalnikaŭ, kab atrymać i zasvoić hrant.
Čytajcie taksama: Paśpiachovaja startapierka ci baranesa Miunchhaŭzien? Jak Zareckaja trapiła ŭ Abjadnany kabiniet i čamu jana jaho pakinuła
Pamiatajecie Taćcianu Zareckuju, jakaja sa skandałam zvalniałasia z Kabinieta Cichanoŭskaj? U Estonii jaje padazrajuć u machlarstvie
Naš novy hieroj sumiaščaje ŭ sabie adrazu ŭsie archietypy: jon i sudzimy, i ŭ «patryjoty» zapisaŭsia na chvali, i taksama nie biez talentu da viadzieńnia pieradavych biznesaŭ.
Aleh Navicki — deputat Minskaha abłasnoha savieta. Šmatdzietny baćka, hieroj prapahandysckich pieradač. Bienieficyjar dziasiatka kampanij z sumnieŭnymi biznes-madelami ci admoŭnymi vynikami. Na hety momant — padazravany pa č. 4 artykuła 209 Kryminalnaha kodeksa Biełarusi (machlarstva ŭ asabliva bujnym pamiery).
Vypadak Navickaha nie admietny, a prosta ŭ čarhovy raz pakazalny: dzivak z kryminalnym minułym, vykarystoŭvajučy tolki mietad publičnaj pachvały Łukašenki, z nula i za karotki čas zdoleŭ stvaryć takuju bijahrafiju i takuju stupień davieru da siabie, što adnyja panieśli jamu miljony, a druhija paličyli svaim i pryznačyli ŭ deputaty.
Z chabzy ŭ top-mieniedžary
Zhodna z aficyjnaj bijahrafijaj, Aleh Alehavič Navicki naradziŭsia ŭ Minsku ŭ 1979 hodzie, skončyŭ Minski enierhietyčny technikum pa śpiecyjalnaści «Pramysłovaje i hramadzianskaje budaŭnictva». Paśla hetaha pracavaŭ majstram u ramontna-budaŭničym upraŭleńni «Minskrembuda».
U 2000 hodzie, pa jaho słovach, pačaŭ zajmacca pradprymalnictvam. Skončyŭ Instytut pradprymalnickaj dziejnaści, vyvučyŭsia na markietołaha i «maje vopyt viadzieńnia biznesu ŭ 18 krainach»: u Iranie, Mieksicy, Indyi i hetak dalej.
Druhuju častku tezisa paćvierdzić niemahčyma, a voś IP u Navickaha sapraŭdy było z 1998 pa 2008 hod.
U 2010‑ch hadach razam sa svaimi šmatlikimi bratami i inšymi svajakami Aleh Navicki sprabavaŭ handlavać adździełačnaj plitkaj i naadkryvaŭ masu kampanij. U ciapierašnich intervju jon časta adsyłaje da tych časoŭ, nazyvajučy siabie «najbujniejšym imparcioram plitki ŭ Biełarusi». Ale heta kryvadušša. Adkrytaje ŭ 2014 TAA «AlfaKieramika-Bieł» nabrała pazyk, mienš čym praz try hady zbankrutavała i było likvidavana praz sud. TAA «Kafiel Baj» praz hod paśla adkryćcia była pradadziena inšamu čałavieku z Bresta, Navickija da jaje dačynieńnia bolš nie mieli. Adkrytaje ŭ 2015 TAA «Sindykat kieramiki» zakryłasia ŭ 2018-m, kazachstanski filijał pražyŭ na hod mienš.
Pieraličvać usie adkrytyja, a ŭ nastupnym začynienyja praz sud abo rearhanizacyju kampanii Navickaha naŭrad ci maje sens.
A što treba zhadać abaviazkova, dyk heta niejkija zahadkavyja kryminalnyja spravy za miažoj, dzie z padrabiaznaściaŭ nam viadomy tolki vynik: pa dadzienych bazy Belpol, u 2013 hodzie Aleha Navickaha asudzili ŭ polskaj Białaj Padlascy za padrobku dakumientaŭ na paŭtara hady pazbaŭleńnia voli ŭmoŭna z vyprabavalnym terminam u 3 hady.
Napierad možna skazać, što niekatoryja ź jahonych siońniašnich biznes-partnioraŭ majuć sudzimaści pa tym ža samym artykule, tolki ŭ Biełarusi.
Taksama z baz viadoma, što da 2021‑ha prynamsi adzin raz Navickamu vystaŭlałasia zabarona na vyjezd z krainy pa inicyjatyvie adnaho z bankaŭ — tak robicca, kali čałaviek vinien hrošaj.
U «darevalucyjnyja» hody Navicki jak moh imknuŭsia prabicca na telebačańnie, spačatku prosta zasiadajučy ŭ masoŭcy tok-šou, potym zadajučy pytańni z zały, a potym užo vystupajučy za trybunaj jak ekśpiert to pa plitcy, to pa budaŭnictvie, to jak aŭtamabilist z aryhinalnym mierkavańniem pa prablemach parkoŭki. Ničoha surjoznaha. Bolš pra jaho ničoha nie raśpišaš — tak sabie paśpiachovy pradprymalnik z pravincyi, sprabavaŭ uźlacieć, ale nie atrymlivałasia.
Pra sapraŭdy maštabnyja prajekty Navicki pačaŭ dumać užo paśla 2020-ha, kali ŭ 2022‑m, na vypalenym va ŭsich sensach kamiercyjnym poli, staŭ łaŭreatam nacyjanalnaha biznes-konkursa «Čałaviek spravy» ŭ naminacyi «Za samuju aryhinalnuju biznes-ideju, jakuju ažyćciaviŭ ajčynny pradprymalnik». U tym ža konkursie, ale ŭ inšaj naminacyi, u toj hod pieramoh miljarder Pavieł Tapuzidzis.
Što takoje ŭvohule hetaja premija? Mnohija biełaruskija biźniesmieny atrymlivali prapanovy stać jaje łaŭreatam za ścipłyja paru tysiač dalaraŭ. Mastadontaŭ, kaniečnie ž, uznaharožvajuć biaspłatna, kab u «płatnikaŭ» była dobraja kampanija. A «samaj aryhinalnaj idejaj» Navickaha ŭ 2022‑m staŭ śmiećcievy navinavy ahrehatar 024.by, jaki pa zadumie stvaralnika mieŭsia stać «anałaham Bi-Bi-Si».
Za pieršyja try hady dziejnaści navatarskaja kampanija TAA «24Miedyja» zhienieravała bolš za miljon rubloŭ strat. Siońnia sajt sa składanaściu adkryvajecca, vystaŭlaje pa paŭtary naviny na dva dni, a vypadkovy karystalnik pravodzić na im 38 siekund.
Tym nie mienš, dziaržynskaja rajonka chutka źlapiła z Navickaha vizijaniera.
Toj užyŭsia ŭ rolu, prysvoiŭ sabie novyja rehalii i ŭžo nie chacieŭ fihuravać na staronkach presy inačaj jak «paśpiachovy» ci «miecenat»; paralelna razradžajučysia inšymi hienijalnymi biznes-prajektami: ad veb-barachołki 24city.by (začyniena) i ahrehatara mahčymaściaŭ dla padarožžaŭ places.gold (Navicki žyva raśpisvaŭ pierśpiektyvy: «vykupim Booking!», realny vynik — začyniena) da stvareńnia biznes-płanaŭ pa zabudovie Minskaha rajona, na jakija nichto nie daŭ hrošaj (začyniena).
Z rajonnaj presy Navicki pierajechaŭ na ekrany ANT i BT.
«Biaśpieka, čyścinia, pracujučyja orhany ŭłady […] našy plusy […]», — nachvalvaŭ jon dasiahnieńni režymu. Publičny vobraz i padkreślenaja łajalnaść nieŭzabavie vynieśli Navickaha ŭ abłasnyja deputaty.
Pavieryŭšy ŭ svaju zorku, mužčyna palez u novy dla siabie finansavy biznes, u jakim hałoŭny aktyŭ — davier.
Afiora na miljony
U mai 2022‑ha na ŭlik u Fond sacyjalnaj abarony nasielnictva stała kampanija TAA «Śvis Lizinh». Zarehistravanaja ŭ 2019-m, jana try hady isnavała na papiery, nie majučy supracoŭnikaŭ. U druhoj pałovie taho ž 2022 hoda byli zarehistravanyja inšyja važnyja dla našaj historyi kampanii: TAA «Hłobałfinmarkiet», TAA «Fajnieks», TAA «HFM-Inviest».
Pa pary słovaŭ pra kožnuju. «Śvis Lizinh» — na papiery lizinhavaja kampanija, publična prapanoŭvała pasłuhi pa zvarotnym lizinhu nieruchomaści i techniki. TAA «Fajnieks» — heta apieratar placoŭki pa raźmiaščeńni tokienaŭ Fainex.by. TAA «HFM-Inviest» — kampanija, jakoj naležyć TAA «Fajnieks», a TAA «Hłobałfinmarkiet» — heta kampanija, jakoj naležyć mažarytarnaja 70% dola TAA «HFM-Inviest». Usie faktyčna kantralavalisia Navickim.
«Śvis Lizinh» prezientavaŭ siabie jak «častku mižnarodnaj hrupy kampanij UAB Lemures» (takoj hrupy kampanij nie isnuje, a UAB Lemures — prosta litoŭskaja jurydyčnaja asoba, aformlenaja na Aleha Navickaha, pa-našamu — tavarystva z abmiežavanaj adkaznaściu. U 2019‑m — hodzie apošniaj zdadzienaj finansavaj spravazdačnaści, — UAB Lemures pakazała čystyja straty ad dziejnaści i rost doŭhu. Na hety momant kampanija nie isnuje. TAA «Śvis Lizinh» u nastupnym stała naležać inšaj kampanii Navickaha, užo biełaruskaj — TAA «KHS-Handal»).
Za karotki pieryjad dziejnaści TAA «Śvis Lizinh» nie paśpieła zarabić hrošaj i ŭ lutym 2026‑ha skandalna syšła ŭ likvidacyju.
Ale što paśpieła, dyk heta pryciahnuć dziasiatki čužych miljonaŭ, kab nibyta ich vyhadna ŭkłaści i viarnuć pazyki ź vialikimi pracentami.
Jak uvohule pracujuć inviestycyi ŭ lizinhavyja kampanii?
Sens lizinhu ŭ tym, što kali kamuści dla viadzieńnia biznesu patrebna technika ci nieruchomaść, ale hrošaj jašče niama (abo naadvarot — technika i nieruchomaść jość, ale ŭ momancie spatrebiłasia šmat hrošaj), to tady hety chtości idzie da lizinhavaj kampanii i kaža «kupi mnie heta» abo «vykupi ŭ mianie heta». Lizinhavaja kampanija kuplaje i zdaje hetamu ž klijentu ŭdoŭhuju. Heta finansavy biznes, dla jakoha važna mieć dastupnaje fandziravańnie. Najbolšyja lizinhavyja kampanii — pry bankach. Nie pry bankach kampanii taksama jość. Banki kredytujuć svaich kankurentaŭ nieachvotna i kiepska. Tamu adno z vyjściaŭ — zajmać hrošy na finansavym rynku.
I voś «Śvis Lizinh» pierakonvała biełaruski rynak — inviestaraŭ, — što klijenty i prajekty ŭ ich jość, patrebny tolki hrošy. I zajmała ich praz raźmiaščeńnie tokienaŭ.
Za paru hod kampanija pryciahnuła 36 čužych miljonaŭ biełaruskich rubloŭ, ź jakich pahasiła 16 miljonaŭ i stanam na kaniec vieraśnia 2025‑ha mieła abaviazki na 20 miljonaŭ.
Abiacany pracent dla kredytoraŭ kožny raz ros i ŭ vyniku dabraŭsia da 24% hadavych — u razy bolš, čym pracent pa depazitach u banku abo pa tokienach inšych lizinhavych kampanij.
Pa sutnaści heta była piramida. Usia ekanomika «Śvis Lizinhu» trymałasia nie na talencie deputata Navickaha, a na patoku pazyk, kožnaja ź jakich pierakryvała papiarednija.
Ale pierad tym jak iści dalej, treba patłumačyć kantekst i terminałohiju.
«Raspracoŭka temki»
Paśla pryniaćcia abnoŭlenaha dekreta ab Parku vysokich technałohij u Biełarusi na bazie kampanij PVT stała mahčymym praviadzieńnie ICO i vypusk tokienaŭ z zapisam u błakčejnie.
U našaj situacyi tokien — heta pa sutnaści elektronnaja ablihacyja, błakčejn — heta pa sutnaści publičnaja elektronnaja buchhałtarskaja kniha. ICO (initial coin offering) — heta pa sutnaści prodaž abaviazku.
Kampanija (emitent) vypuskaje tokien (robić emisiju) praź licenzavanuju placoŭku (rezidenta PVT), dzie jaho kuplajuć udzielniki finansavaha rynku. Placoŭka biare svoj pracent, hrošy pastupajuć emitentu, u jakoha źjaŭlajucca finansavyja abaviazki pierad trymalnikami tokienaŭ pa pahašeńni z vypłataj pracentaŭ. Z pazicyi emitenta — heta atrymanaja pazyka pad pracent, z pazicyi ŭdzielnika rynku — inviestycyja.
Adroźnieńnie ad vypusku ablihacyj — chutkaść pracesu, mienšaja strohaść acenki kampanii-pazyčalnika.
Prastata ICO heta nie abaviazkova kiepska, tokieny vypuskajuć mnohija salidnyja biełaruskija kampanii prosta dla ekanomii času (ci ź inšych pryčyn, jakija nie źjaŭlajucca temaj publikacyi). Inviestaram heta taksama cikava praz prastatu, dastupnaść (možna inviestavać małymi sumami) i adsutnaść padatkaabkładańnia takoha prybytku dla fizasobaŭ.
U Biełarusi pijanieram siarod ISO placovak staŭ Finstore, jaki naležyć banku BiełVEB. Finstore pracuje z 2019 i doŭhi čas byŭ manapalistam. Zdaralisia vypadki, kali emitenty nie mahli vykanać abaviazki, ale vialikich skandałaŭ nie było.
Pieršy surjozny zalot, u jakim orhany ŭbačyli nie biznes-ryzyku, a mienavita namier emitenta kinuć inviestaraŭ, zdaryŭsia napačatku 2023-ha.
«Samy chutki defołt: emitenta tokienaŭ padazrajuć u machlarstvie na 1 miljon rubloŭ», — pisaŭ Office Life tolki ŭ 2025-m, kali spravaj zacikaviłasia Hienprakuratura.
Akazvajecca, u 2022 hodzie kampanija «Akrykam» vypuściła praz Finstore tokieny ahułam na sumu 1 miljon rubloŭ i 130 tysiač dalaraŭ, a ŭ pačatku 2023 hoda kinuła svaich inviestaraŭ, nie vypłaciŭšy pracentny prybytak.
I voś u 2025 hodzie Hienprakuratura paličyła, što ŭ zasnavalnikaŭ kampanij adrazu byŭ złačynny namier nikoli nie viartać hrošy.
Što za «Akrykam»? «Śpiecyjalizujecca na vyrabie kuchonnych mojek sa štučnaha kamieniu i akryłavych vannaŭ premium-kłasa».
«Akrykam» byŭ zarehistravany ŭ 2018 hodzie jak dačynnaja kampanija litoŭskaj jurydyčnaj asoby Navickaha UAB Lemures, a paśla taho, jak taja ŭ 2019 hodzie zahnułasia, matčyna kampanija źmianiłasia na biełaruskuju, ale taksama Navickaha — «Elfhandalbud». U červieni 2022 hoda, mienš čym praź miesiac paśla vypusku pieršaj emisii tokienaŭ, «Akrykam» byŭ pierapisany na niejkaha Siarhieja Pasiečnika.
Pry hetym handlovy znak «Akrykama» i pa siońnia zastaŭsia naležać Alehu Navickamu. Što abo ŭkazvaje na składanaść schiemy (praz vypłaty za karystańnie znakam možna vyvodzić hrošy z kampanii, jakuju pa papierach ty naŭprost nibyta nie kantraluješ — heta viadomy fokus), abo na toje, što prosta kiepska padčyścili chvasty.
Tak ci inačaj, «Akrykam» spyłasosiŭ z rynku adzin miljon rubloŭ i nie viarnuŭ ich. Ci była kampanija «žyvoj» — uvohule pytańnie. U 2021‑m hadavy zarpłatny fond składaŭ 5000 rubloŭ, što aznačaje — za paŭhoda da vychadu na finansavy rynak u kampanii byŭ tolki dyrektar na minimałcy.
Zabiahajučy napierad, treba skazać, što hrošy inviestaram «Akrykama» viarnuli. Ale pa naminale — to-bok biez pracentaŭ, a prosta čystuju sumu ŭkładzienaha. Heta adbyłosia praz try hady i stała vynikam kalektyŭnaj zajavy inviestaraŭ u śledčyja orhany.
Ale tady, u 2021-2022, abkatanuju na «Akrykamie» schiemu zdorava masštabavali sa «Śvis Lizinham».
Daradca ŭ Nacbanku
Na momant pieršaj emisii machlarskich tokienaŭ «Akrykama» kamiercyjnym dyrektaram placoŭki Finstore pracavaŭ Alaksiej Stašeŭski, były supracoŭnik Biełźniešekanombanku i daradca ŭ Nacbanku.
Paralelna z vypuskam tokienaŭ «Akrykama» pry Stašeŭskim (ź viasny 2021 pa červień 2022 hoda) na Finstore było vypuščana ź dziasiatak praśpiektaŭ emisij tokiena «Śvis Lizinh» Aleha Navickaha (ahułam bolš, ale ŭ kantekście my padkreślivajem čas, kali Stašeŭski moh upłyvać na rašeńni, bo heta budzie važna ŭ dalejšym).
Kampanija, u štacie jakoj u 2021 hodzie — pavodle vypisak z rehistra — taksama nie było nivodnaha supracoŭnika, aproč dyrektara biez zarobku, užo pačała pryciahvać praz Finstore sotni tysiač u valucie: pieršaja emisija na 200 tysiač dalaraŭ, druhaja na 200 tysiač jeŭra i hetak dalej.
Samyja pieršyja tokieny vydavalisia pad zakład majomaści, jakoj faktyčna vałodaŭ Navicki ŭ Sienicy.
U Sienicy, na vulicy Armiejskaj, 7, staić ofisny budynak, pabudavany ź litaralna samych tannych materyjałaŭ na rynku. Niaścipła nazyvajecca «biznes-centr Viktoryja».
Na momant pieršaj emisii Finstore acaniŭ hety budynak u 884 tysiačy dalaraŭ (pa 1100 dalaraŭ za kvadratny mietr!). Budynak naležaŭ Navickamu praz kantrol nad kampanijaj «KHS-Handal», ale byli niuansy.
Stanam na 2021 hod kampanija-ŭłaśnik hetaj nieruchomaści, jak my bačym u bazach, mieła daŭhoŭ na 1 390 000 rubloŭ, u toj čas jak bałansavy košt samoj nieruchomaści byŭ 1 232 000 rubloŭ. A hadavy prybytak ad jaje — 26 tysiač rubloŭ. Kamu i pad jaki pracent byŭ vinny «KHS-Handal» za budaŭnictva «Viktoryi», my nie viedajem.
Nieviadoma, ci ŭvohule nie byŭ na momant vychadu «Śviss Lizinh» na ISO hety budynak užo ŭ zakładzie inšamu kredytoru kampanii «KHS-Handal».
Druhaja emisija tokienaŭ «Śvis Lizinh» na 1 miljon dalaraŭ adbyłasia 19 lipienia 2021 hoda. Jany ŭžo byli nie zabiaśpiečanyja (biez zakładu).
U metach pisałasia, što pryciahnutyja hrošy mohuć być vykarystany ŭ tym liku dla pahašeńnia abaviazkaŭ emitenta.
U lipieni 2022‑ha kamiercyjny dyrektar Finstore Alaksiej Stašeŭski (kali vieryć jahonaj staroncy ŭ Linkedin) zvolniŭsia (jak ličycca ŭ bankaŭskaj tusoŭcy — prychapiŭšy z saboj prahramny kod rašeńnia Finstore) i pajšoŭ rabić kankurenta manapalistu. Razam z kim?
Vosieńniu 2022‑ha Stašeŭski staŭ dyrektaram novaj placoŭki pa raźmiaščeńni tokienaŭ — Fainex (TAA «Fajnieks»). Jak my ŭžo pisali vyšej, TAA «Fajneks» naležyć TAA «HFM-Inviest», a taja — na 70% naležyć TAA «Hłobałfinmarkiet». Inšymi słovami, za dźviuma firmami-prakładkami chavajucca realnyja ŭłaśniki: 10% TAA «Hłobałfinmarkiet» u samoha Alaksieja Stašeŭskaha, a 90% — u Tamary Navickaj, žonki Aleha Navickaha.
Takim čynam, novy hulec biełaruskaha rynku tokienaŭ de-fakta staŭ kantralavacca tym, chto zusim niadaŭna — jak u nastupnym zajavić prakuratura — śpiecyjalna kinuŭ inviestaraŭ na inšaj placoŭcy ad imia «Akrykama» i byŭ u pracesie — jak akažacca ŭ nastupnym — našmat bolšaha kidka pa tokienach «Śvis Lizinh».
Ciaham 2023‑2024 hadoŭ finansavaja spravazdačnaść «Śvis Lizinhu» stała vyhladać vielmi niezdarova dla lizinhavaj kampanii navat u vačach tych, chto nie źjaŭlajecca ekśpiertami ŭ inviestycyjach.
Pierahružanaść zapasami i tavarami ŭ bałansie, nizkaja abaročvajemaść kapitała i amal nulavyja prybytki — i heta ŭ finansavaj arhanizacyi?
U śniežni 2023‑ha «Śvis Lizinh» vypuściŭ treciuju emisiju tokienaŭ na Finstore. Pad zakład pajšła asabistaja majomaść Navickaha i jaho žonki: dva parkovačnyja miescy, dva kabiniety…
Mahčyma, praź niežadańnie ci niemahčymaść prajści pravierku dla dopusku na Finstore «Śvis Lizinh» ź vieraśnia 2024 staŭ prapanoŭvać svaje tokieny na svajoj ručnoj płatformie Fainex.
A Fainex nikoli nie paviedamlaŭ pra afilavanaść placoŭki z kampanijaj, u intaresach jakoj jana raźmiaščaje tokieny.
Tak ci inačaj, vynik viadomy: 28 studzienia 2026 hoda Ministerstva finansaŭ apublikavała reliz «Ab nievykanańni abaviazkaŭ pa ablihacyjach, emitavanych TAA «Śvis Lizinh». Niavypłata pracentaŭ aznačaje, što kampanija nie spraviłasia z uziatym abaviazkam. Inviestaraŭ kinuli. Sama kampanija «Śvis Lizinh» syšła ŭ likvidacyju, jak i absalutnaja bolšaść adkrytych Navickim kampanij da taho.
Kolki ludziej kinuli i na jakuju sumu?
Jak my pisali vyšej, suma kala 20 miljonaŭ biełaruskich rubloŭ. Analityčny resurs castle.by dakładniej aceńvaje, što na siońnia ŭ «Śvis Lizinha» abaviazkaŭ pa tokienach na bolš čym 3,6 miljona dalaraŭ, 1,3 miljona jeŭra i 4,6 miljona rubloŭ.
Dakładnuju kolkaść inviestaraŭ nazvać niemahčyma, tamu što ŭ adkrytych krynicach my bačym kolkaść pakupnikoŭ kožnaha vypusku tokienaŭ, ale niejkaja častka ŭ kožnym ź ich mohuć być adnymi i tymi ž ludźmi. Adpaviedna, paciarpiełych ad niekalkich socien da pary tysiač.
Fainex praciahvaje dziejnaść.
Dyk dzie hrošy? I dzie Navicki?
My nie viedajem, ci mieŭ Aleh Navicki z samaha pačatku namier kinuć inviestaraŭ. Možna ž dapuścić i inšaje — prosta biestałkovy biznesmien, u jakoha nie atrymałasia, chacia jon sumlenna staraŭsia. Heta ŭsio biznes-ryzyki.
Ale z ulikam acenki jaho bijahrafii i doŭhaj historyi stratnych biznesaŭ i daŭhoŭ uźnikaje pytańnie — a čym ryzykavaŭ jon sam? Ci byli ŭ jaho samoha hrošy? Ci jon hulaŭ tolki na čužyja? Abo hasiŭ svaje papiarednija daŭhi? Bo faktyčna to źnikli miljony. I hetaja historyja — ci nie najbolšaja na hety momant afiora na biełaruskim ISO rynku.
Historyja sa «Śvis Lizinham» ad samaha pačatku budavałasia na chłuśni. I havorka nie tolki pra nazvu i piačatku arhanizacyi ŭ vyhladzie šviejcarskaha biełaha kryža na čyrvonym fonie.
Nijakim lizinham hetaja kampanija pa sutnaści nie zajmałasia. Jaje klijenty nieviadomyja. Na momant pačatku ISO u kampanii navat nie było supracoŭnikaŭ.
Prapanova źniać pamiaškańni ŭ Sienicy i siońnia visić na «Kufary». Ale faktyčna adzinyja realnyja klijenty — heta šmatlikija kampanii samoha Navickaha biez prybytkaŭ, a taksama ofis Fainex. Bolš nijakija kampanii svajo znachodžańnie pa hetym adrasie nie dekłaravali.
Ab aryštach majomaści Navickaha my viedajem ad kinutych inviestaraŭ, jakija ciapier chodziać na apytańni ŭ Śledčy kamitet. Na deputata zaviedzienaja kryminalnaja sprava pa č. 4 art. 209 — machlarstva ŭ asabliva bujnym pamiery. Majomaść u Sienicy aryštavanaja. Tam usiaho 825 mietraŭ. Tych samych, pad zakład jakich vypuskalisia pieršyja tokieny. Jaje nie chopić dla pahašeńnia abaviazkaŭ pierad kinutymi roźničnymi inviestarami.
Čamu Navicki palez u 2024 u deputaty? U teoryi heta dapamahała jamu padmanvać inviestaraŭ. Inšy bok pytańnia — mienavita podpisami takich deputataŭ časta vyrašajucca ziamielnyja pytańni ŭ rajonach. Moža, ličyŭ što niešta vyharyć. A tak jak u siońniašniaj Biełarusi luby durań, jaki hatovy adkryta nachvalvać režym i prapaviedavać u masach — kaštoŭny, to jaho i łukašysty pryniali ŭ svaje šerahi.
Praŭda, kali nastupny raz fanipalskija vybarščyki ŭbačać svajho deputata — nieviadoma. Z kastryčnika 2025‑ha ŭ rajoncy pierastali publikavacca anonsy pryjomu nasielnictva Navickim.
Dzie ciapier znachodzicca Navicki — u SIZA ci na voli, a kali na voli, to ŭ Biełarusi ci za miažoj — nieviadoma. «Naša Niva» dazvaniłasia da jaho žonki, taja byccam by paabiacała paklikać jaho da telefonu, a potym vyklik abarvaŭsia i jana pierastała zdymać.
«Naša Niva» — bastyjon biełaruščyny
PADTRYMAĆCiapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary
[Zredahavana]