«Trymajcie svaich kijeŭskich hadavancaŭ pad kantrolem». Pradstaŭnik Biełarusi ŭ ABSIE vystupiŭ z chamskaj pramovaj

Povadam dla vystupu Dapkiunasa staŭ ultymatum, jaki prezident Ukrainy Uładzimir Zialenski pastaviŭ pierad Łukašenkam, patrabujučy spynić pracu retranślataraŭ, što vykarystoŭvajucca dla naviadzieńnia rasijskich bieśpiłotnikaŭ. Učora Zialenski zajaviŭ, što hetyja pryłady ŭžo nie pracujuć.

«Tydzień tamu, natchniony padbuchtornickimi stasunkami ź biezmandatnaj jeŭrapiejskaj «trojkaj» i vialikaj hłabalnaj «siamiorkaj», kiraŭnik faktyčnaha kiraŭnictva Ukrainy vystaviŭ Biełarusi ŭltymatum. Upieršyniu za čatyry z pałovaj hady z pačatku vajennaj apieracyi va Ukrainie čałaviek, jaki pryjšoŭ da svajoj pasady na abiacańni narodu Ukrainy ŭrehulavać adnosiny z Rasijaj, adkryta pahražaje prymianieńniem vajennaj siły krainie, jakaja nie źjaŭlajecca bokam kanfliktu.

U apošnija dni ŭvieś śviet samaaddana sprabuje adčuć usio charastvo trapnaj charaktarystyki «mister Bin pad krekam». Trahiedyja ŭ tym, što śmiešnaje ŭ hetym vypadku nie vyklikaje ŭśmieški. Heta, chutčej, śmiech skroź ślozy. U Biełarusi, kali ŭ kahości jany i byli, raśsiejalisia apošnija iluzii adnosna taho, što susiedniaj dziaržavaj kirujuć adkaznyja dziaržaŭnyja dziejačy, jakich sapraŭdy chvaluje dabrabyt svajho naroda», — skazaŭ jon.

«Siońnia, jak i try tydni tamu, kali Biełaruś padniała ŭ Pastajannym saviecie pytańnie ab dziaržaŭnym usłaŭleńni va Ukrainie nacyjanalistaŭ, jakija supracoŭničali z nacystami i byli datyčnyja da masavych zabojstvaŭ, biełaruski bok nie źviartaŭsia da delehacyi Ukrainy.

Tam nas nie pačujuć. Nie pačujuć dakładna tak sama, jak Zialenski nie pačuŭ zaklik prezidenta Polščy admianić svajo rašeńnie ab prysvajeńni adnoj z voinskich častak imia tak zvanych hierojaŭ UPA.

Pijar-demarš paśla hetaha šerahu pradstaŭnikoŭ ciapierašniaha i byłoha dziaržaŭnaha kiraŭnictva Ukrainy, jakija viarnuli ŭ znak salidarnaści ź Zialenskim dziaržaŭnyja ŭznaharody Polščy, heta nie śviedčańnie suvierennaj siły Ukrainy. Heta haniebnaja prykmieta biazdušnaj karumpavanaj sistemy», — dadaŭ jon.

Pavodle jaho słoŭ, kiraŭnictva Ukrainy nie chvaluje, što UPA dla mnohich — simvał «kryvažernaści, zabojstvaŭ i varvarstva».

«Zachodnim kaleham zaŭsiody niekamfortna, kali Biełaruś i Rasija i dziasiatki inšych dziaržaŭ havorać pra nieabchodnaść baraćby ź nieanacyzmam, jaki padymaje hałavu. Vy praciahniecie nastojvać, što našy aściarohi nadumanyja? U Kijevie havorać pra pahrozu z boku Biełarusi, ale na zaklik Biełarusi dać acenku napadu ŭkrainskaha drona na aŭtobus ź biełaruskimi dziećmi ŭ Branskaj vobłaści ŭkrainskija ŭłady nie znajšli ničoha lepšaha, jak vykarystać apošni arhumient chitrych machinataraŭ: «Ja nie ja i kabyła nie maja», — skazaŭ jon.

Dapkiunas zaklikaŭ sajuźnikaŭ Ukrainy paŭpłyvać na kiraŭnictva krainy, supravadziŭšy zaklik namiokami na prymianieńnie vajennaj siły da ich.

«Siońnia my źviartajemsia nie da ŭładaŭ Ukrainy. My źviartajemsia da ŭładaŭ dziasiatkaŭ dziaržaŭ, jakija nie dajuć kanfliktu va Ukrainie ścichnuć. My źviartajemsia z surjoznaj pieraściarohaj da ludziej, jakija nie znachodziacca pad uździejańniem psichastymulataraŭ, da ludziej, jakija nie stracili zdolnaść dumać, da ludziej, jakich usurjoz chvaluje dabrabyt svaich narodaŭ. Apošniaja vychadka faktyčnaha kiraŭnika Ukrainy zdolnaja stvaryć najniebiaśpiečniejšy precedent. Mienavita pavodle łohiki Zialenskaha ŭsie vidy prostaj i ŭskosnaj vajennaj padtrymki Ukrainy ŭ kanflikcie z Rasijaj členami roznaha rodu kaalicyj — Ramštajna i tak zvanych achvotnych, — u vypadku vašaj abyjakavaści i maŭčańnia, mohuć de-fakta stać padstavaj dla prymianieńnia vajskovaj siły da tych, chto akazvaje takuju padtrymku. Vy pra heta zadumvajeciesia? Vy hetaha chočacie?» — pryhraziŭ jon.

Jon adrasavaŭ svajo pytańnie nie kiraŭnictvu Jeŭrasajuza, z pazicyjaj jakoha, pavodle słoŭ Dapkiunasa, usio zrazumieła, a da krain ES.

«Naša pytańnie da dziaržaŭ Jeŭropy, jakija ličać siabie suvierennymi i nie stracili zdolnaść adstojvać svoj dziaržaŭny intares. Ci z vašaj zhody, ci biez uzhadnieńnia z vami robić svaje pravakacyjnyja zajavy faktyčny kiraŭnik Ukrainy, my nie viedajem. Adnak važna viedać, što ŭkrainskaje kiraŭnictva siońnia stvaraje pahrozu nie tolki dla Biełarusi. Jano stvaraje prostuju i vidavočnuju pahrozu biaśpiecy vašych krain», — skazaŭ jon.

Dalej Dapkiunas źviarnuŭsia da pryjomu abiesčałaviečvańnia ŭkrainskaha kiraŭnictva, paraŭnaŭšy jaho z sabakam.

«U bolšaści dziaržaŭ čałaviek niasie adkaznaść za škodu, pryčynienuju jaho žyviołaj. Kali sabaka pakusaŭ čałavieka, nie sabaka, a jaho ŭładalnik niasie hramadzianskuju, administracyjnuju ci navat kryminalnuju adkaznaść. Pakarańnie niaŭchilnaje. Vy vyhadavali, pieścicie i ŭsimi siłami padtrymlivajecie svajho hadavanca. Vy śviadoma zrabili svoj vybar na karyść taho, kab začaravacca «hierojem», jaki biezumoŭna daražyć svaim miescam u historyi, ale lohka achviaruje vašym intaresam, vašaj zakłapočanaściu, vašaj tryvohaj.

Začaroŭvacca lohka. Rasčaravańnie, jakoje prychodzić, kali stała zrazumieła, što karol ža hoły, moža być vielmi balučym. Dobra ŭdumajciesia ŭ sens prymaŭki, jakuju niadaŭna Zialenskamu adrasavaŭ prezident Biełarusi: «jak śpiavajuć, tak i adpiavajuć». Jana značna bolš hłybokaja, čym vam moža zdacca na pieršy pohlad.

Pavažanyja siabry ŭkrainskaha kiraŭnictva (ale nie Ukrainy), dziela ŭłasnaj biaśpieki i dabrabytu, trymajcie svaich kijeŭskich hadavancaŭ pad kantrolem i, pakul nie pozna, dumajcie, pavažanyja kalehi, dumajcie», — padsumavaŭ Dapkiunas.

• 8
• 8
• 15
• 27
• 2
• 0
• 19
• 0