U Polščy paviedamili pra zatrymańnie biełaruskaha «złodzieja ŭ zakonie». Voś tolki niezrazumieła, što ź im rabić dalej
U Polščy ź minułaha hoda zatrymali piać tak zvanych «zładziejaŭ u zakonie» — kryminalnych aŭtarytetaŭ, jakija kirujuć złačynnymi hrupami z krain byłoha SSSR. Pra heta paviedamlaje vydańnie RMF FM. Siarod zatrymanych — čaćviora hramadzianin Hruzii i adzin hramadzianin Biełarusi.
Zatrymańni pravodzili supracoŭniki Centralnaha biuro rasśledavańniaŭ polskaj palicyi. Jany vyznačali miescy znachodžańnia hetych ludziej dziakujučy apieratyŭnaj pracy i mižnarodnamu supracoŭnictvu. Adnak dalejšy los zatrymanych vyrašaje pamiežnaja słužba Polščy.
Asnoŭnaja prablema ŭ tym, što polskim pravaachoŭnikam ciažka dakazać, što hetyja ludzi ŭčyniali złačynstvy mienavita ŭ Polščy. Tamu ŭ adnosinach da ich užyvajuć administracyjnyja miery.
Ich źmiaščajuć u zakrytyja centry dla inšaziemcaŭ i prymajuć rašeńnie ab prymusovym vydvareńni z krainy, bo ličać, što jany mohuć pahražać hramadskaj biaśpiecy. Častku ŭžo departavali, a astatnija abskardžvajuć hetyja pastanovy.
Pry hetym u polskich słužbaŭ uźnikajuć składanaści ź viartańniem takich ludziej u krainy pachodžańnia. Naprykład, u Hruzii zakon dazvalaje pazbaŭlać hramadzianstva asob, jakija majuć status «złodzieja ŭ zakonie», tamu ŭłady mohuć nie prymać ich nazad. Byŭ vypadak, kali departavanaha z Polščy hruzina nie chacieli prymać na radzimie, i paśla doŭhich pieramoŭ jaho ŭ vyniku adpravili ŭ Iran.
Padobnyja prablemy ŭźnikajuć i pry sprobach pieradać takich ludziej Biełarusi abo Rasii — hetyja krainy taksama nieachvotna prymajuć ich i vystaŭlajuć roznyja ŭmovy.
Pavodle infarmacyi polskich słužbaŭ, «zładziei ŭ zakonie» redka žyvuć u Polščy pastajanna. Zvyčajna jany pryjazdžajuć na karotki čas, najčaściej u Varšavu abo Krakaŭ. Tam jany arandujuć darahija kvatery i sustrakajucca ŭ prestyžnych restaranach.
Takija ludzi zajmajuć najvyšejšaje miesca ŭ kryminalnaj ijerarchii. Jany atrymlivajuć hrošy ad padnačalenych złačynnych hrup, a taksama z roznych nielehalnych krynic — naprykład, ad niezakonnaha biznesu abo «daniny» ad inšych ludziej, źviazanych ź ich sietkami.
Polskija pravaachoŭniki adznačajuć, što tradycyjny «kodeks» hetaj kryminalnaj subkultury z časam źmianiŭsia. Raniej «zładziei ŭ zakonie» nie mieli siamji i mieli charakternyja tatu. Ciapier mnohija ź ich majuć žonak i dziaciej, i nie ŭsie nosiać tatu. Adnak jany pa-raniejšamu nie supracoŭničajuć z pravaachoŭnymi orhanami i adkryta pryznajuć svoj status u kryminalnym śviecie.
Znoŭ aryštavali złodzieja ŭ zakonie Pašteta. Pra jaho zatrymańnie paviedamlali i viasnoj, ale tady adpuścili
Rekiet, rejdarstva, zhvałtavańni, žorstkija zabojstvy, siłaviki na zarpłacie i łajalnaść uładaŭ. Raskazvajem pra najbujniejšuju bandu Biełarusi
U Biełarusi zatrymali hruzinskaha złodzieja ŭ zakonie, jaki praryvaŭsia z Rasii biez pašparta
HUBAZiK: My vyznačyli čyrvonyja linii dla złodzieja ŭ zakonie «Miedźviažonka»
Kamientary