«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku
Homielski pradprymalnik niečakana daviedaŭsia, što ličycca darmajedam. Mužčyna źviarnuŭ uvahu na toje, što dva miesiacy atrymlivaje značna bolšyja rachunki za kamunalnyja pasłuhi — kala 380 rubloŭ za nievialikuju kvateru. Spačatku jon padumaŭ, što prosta vyraśli taryfy. Ale paźniej vyśvietliłasia: u dziaržaŭnych bazach jon značycca «nie zaniatym u ekanomicy». Pra heta jon raskazaŭ u svaim tyktoku.
«Mnie skazali: vy pavinny dakazać, što nie darmajed»
U videa mužčyna raskazvaje, što spačatku nie zrazumieŭ, čamu kamunałka stała značna bolšaj. Kab razabracca, jon patelefanavaŭ u raźlikova-daviedačny centr. Tam jamu paviedamili, što jon zaniesieny ŭ bazu hramadzian, nie zaniatych u ekanomicy:
«Mnie kažuć: tak, vy darmajed. Ja taki: «Ničoha sabie! Darmajedy stolki padatkaŭ płaciać?»
Hamialčuk pracuje jak indyvidualny pradprymalnik i, pa jaho słovach, płacić usie nieabchodnyja padatki, u tym liku padachodny i ŭnioski ŭ FSAN.
Kali mužčyna pasprabavaŭ vyśvietlić, jak vypravić situacyju, jamu adkazali, što jon pavinien sam paćvierdzić svaju zaniataść. Heta i stała hałoŭnaj pryčynaj jaho abureńnia:
«Ja pracuju z ranicy da viečara, kab płacić padatki, i jašče pavinien dakazvać, što ja nie darmajed!»
Pa jaho słovach, jon maje aficyjna zarehistravanaje IP, i zroblena heta ŭ toj ža administracyi, kamisija jakoj pryznała jaho nie zaniatym u ekanomicy.
Mužčyna kaža, što nie razumieje, čamu pavinien asabista chadzić pa instancyjach i paćviardžać infarmacyju, jakaja ŭžo jość u dziaržaŭnych sistemach.
«Čamu ja, nie atrymlivajučy za heta zarobak, pavinien chadzić i dakazvać, što ja nie darmajed?» — zadajecca pytańniami hamialčuk.
«Takich historyj šmat». Što pišuć u kamientaryjach
Paśla publikacyi rolika pad imi źjavilisia sotni kamientaroŭ. Mnohija karystalniki pišuć, što situacyja, pra jakuju raskazaŭ homielski pradprymalnik, daloka nie adzinkavaja.
Niekatoryja raskazvajuć, što sami traplali ŭ bazu nie zaniatych u ekanomicy pamyłkova:
«Ja była ŭ takoj samaj situacyi. Minsk. U ich niama adzinaj bazy z padatkovaj».
«Svajak taksama byŭ zarehistravany jak biespracoŭny, ale aficyjna pracaŭładkavany. Kamunalnyja pasłuhi apłačanyja maksimalna. U centry vystaŭleńnia rachunkaŭ taksama prosiać paćviardžeńnie taho, što jon nie papuhaj».
Inšyja pišuć, što taksama daviedajucca ab svaim statusie «darmajeda» vypadkova — z kamunalnych kvitancyj:
«Moj syn vučycca na dzionnym va ŭniviersitecie i niejkim čynam taksama trapiŭ u darmajedy. Daviedaŭsia pra heta z kvitancyi za kvateru».
«My daviedalisia z kvitancyi. Raniej płacili kala 250 rubloŭ, a potym amal 500».
Jość i historyi ludziej, jakija traplali ŭ bazu, niahledziačy na žyćciovyja abstaviny, naprykład, kali dahladali chvorych rodnych:
«Ja dahladała niedziejazdolnaha muža, była apiekunkaj. Ale ŭsio roŭna atrymała list, što ja darmajed».
Ludzi ličać, što dziaržaŭnyja orhany pavinny sami praviarać infarmacyju pamiž bazami źviestak:
«Dzie pryncyp adnaho akna? Bo kudy praściej zrabić zapyt pamiž arhanizacyjami, čym prymušać čałavieka źbirać daviedki».
«U narmalnym hramadstvie jość prezumpcyja nievinavataści, a ŭ nas naadvarot — prezumpcyja vinavataści».
Pry hetym niekatoryja kamientatary ličać, što sistema pieršapačatkova ŭładkavanaja tak, što čałavieku praściej zapłacić, čym raźbiracca:
«Na heta i raźličana: nie ŭsie buduć raźbiracca, mnohija prosta zapłaciać».
Sam hamialčuk, aŭtar videa, kaža, što ŭ jaho niama pytańniaŭ da zakona ab darmajedach. Ale jość da taho, jak jon vykonvajecca. Miarkujučy ź jaho adkazaŭ u kamientarach, pytańnie jon płanuje vyrašać praz sud.
Nahadajem, u Biełarusi isnuje baza hramadzian, jakich dziaržava ličyć niezaniatymi ŭ ekanomicy. Z 1 kastryčnika 2025 hoda ŭstupili ŭ siłu novyja praviły raźliku płaty za žyllova-kamunalnyja pasłuhi. Jany praduhledžvajuć, što takija hramadzianie, kali jany ŭłaśniki kvatery, pavinny apłačvać pasłuhi poŭnymi, ekanamična abhruntavanymi taryfami za ŭsiu kvateru, a nie tolki za častku płoščy, jakaja na ich prypadaje.
Mienavita tamu dla niekatorych biełarusaŭ rachunki za kamunalnyja pasłuhi vosieńniu byli značna bolšymi. U sacyjalnych sietkach mnohija pisali, što ich žyroŭki stali ŭ niekalki razoŭ ciažejšymi, a pra svoj status darmajeda ludzi daviedvalisia tolki paśla atrymańnia rachunkaŭ.
Kamientary
Boleje toho, oni vrieditieli.
Da raźvie tolko oni?
No znajem žie hdie živiem.
Po faktu zabiežať v otdieł po tuniejadstvu i priniesti spravku ,čto IP s takoho to čisła+ vypisku po nałoham zaodno.
Kvartpłatu za hod pierierasčitajut i otminusujut ot buduŝich žirovok.
Smysł tratiť vriemia na sudy?