«Strata ŭradžaju — 40 %». Pradaŭcy ciulpanaŭ raskazali, čamu nie buduć źnižać ceny
Da 8 sakavika zastałosia zusim mała, i Minsk užo raskvitnieŭ — praŭda, pakul tolki ŭ handlovych kropkach. Žurnalisty vydańnia Myfin prajšlisia pa kvietkavych radach, kab daviedacca, kolki siońnia kaštujuć ciulpany, jak paŭpłyvała surovaja zima na ich uradžaj i jak aščadzić na kupli kvietak.
Žurnalisty vybralisia na Kamaroŭski rynak kala 12‑j hadziny dnia 5 sakavika. Radujuć nie tolki tony kvietak, ale i pa-viesnavomu ciopłaje nadvorje, choć ažyjatažu kala pałatak nie zaŭvažajecca. Pradaŭcy tolki razhortvajuć svaje płantacyi ŭ «palavych umovach»: chtości vystaŭlaje viodry z vadoj, chtości chavaje dalikatnyja butony ad vietru. Kupcoŭ niašmat — u abiedzienny čas da handlovych punktaŭ padychodziać adzinki.
«Pakul tolki pryhladajucca», — uzdychajuć pradaŭcy.
Samyja tannyja ciulpany, jakija ŭdałosia znajści ŭ pałatcy kala rynku, addavali pa 2 rubli. Ale siaredniaja cana pa rynku vyšejšaja — ad 3 rubloŭ i da 5 za vysokija, mocnyja butony.
«U mianie palacieŭ kacioł, i ja straciła 40% uradžaju»
Nina (u Instagram jaje možna znajści jak @semitsvetik.by) vyroščvaje kvietki daŭno, ale ź ciulpanami ŭ hetym hodzie ŭ jaje debiut. I adrazu — bajavoje chryščeńnie.
— Zima była chałodnaja, i heta paŭpłyvała na ŭradžaj. U mianie palacieŭ kacioł, pryjšłosia abahravać ciaplicu padručnymi srodkami. Z-za hetaha zahinuła 40% ciulpanaŭ.
— A jaki sabiekošt adnaho ciulpana?
— Ciapier možna ŭziać tysiaču hałandskich kłubniaŭ pa 450 jeŭra. Adna cybulina budzie vychodzić u 0,45 jeŭra. Da ŭsiaho treba dadać uhnajeńnie hruntu, aciapleńnie ciaplicy, što krychu składaniej paličyć, tamu i sabiekošt skazać ciažka. Maje ciulpany kaštujuć ad 4 da 5 rubloŭ, ale ŭsio zaležyć ad dnia prodažu, pamieru ściabła, sortu ciulpana i h. d. Tamu ja b skazała, što ciapierašniaja cana — heta jašče niadoraha.
Na pytańnie, čamu nie vykarystoŭvajuć biełaruskija cybuliny, adkaz prosty: ich prosta niama.
«Našy cybuliny nie pradajucca; technałohija takaja, što pryžyvajucca tolki hałandskija».
Druhoha pradaŭca, Alenu Mackievič, marazy nie zakranuli, ale ŭradžaj usio adno panios straty. Choć, pa słovach dziaŭčyny, heta častaja źjava, i ŭ hetym ničoha takoha niama.
«Ja pasadziła 4000 cybulin, vyjšła dzieści 3000. Tysiača ŭ adkidy — narmalnaja strata, byvaje, cybulina prosta nie ŭzychodzić», — dzielicca Alena.
«Źnižać ceny? Nie»
Isnuje mierkavańnie, što vyhadniej za ŭsio kuplać kvietki ŭviečary 8 sakavika, kali pradaŭcy, sprabujučy pazbavicca ad reštkaŭ, źnižajuć ceny. Žurnalisty vyrašyli pravieryć hetuju teoryju.
— Budziecie źnižać ceny 9 sakavika ci ŭviečary vośmaha?
— Napeŭna, nie, — adkazvaje Nina. — Maksimum da 3 rubloŭ źmienšu canu. Što nie pradam — lepš padaru znajomym.
Iryna ź Dziaržynska, jakaja zajmajecca kvietkami ŭžo 10 hadoŭ, nastrojenaja jašče bolš rašuča. U jaje 50 sotak ziamli, i da 8 sakavika jana pryviezła nie tolki zrezku, ale i harškovyja raśliny — hijacynty, krokusy.
«Źnižać ceny? Nie. Toje, što ŭ harškach, pradamo paźniej, jany kaštujuć uvieś siezon. Kali ŭ mianie zastajucca zrezanyja kvietki, ja zavožu ich u miascovy chram u rodnym horadzie».
Darečy, pa słovach Iryny, popyt dzielicca paroŭnu: pałova pakupnikoŭ biare kłasičnyja ciulpany (pa 3—5 rubloŭ), druhaja pałova vybiraje kvietki ŭ harškach (naprykład, hijacynt pa 15 rubloŭ), kab padarunak radavaŭ daŭžej.
Łajfchak ad fiermieraŭ: jak zachavać ciulpany na dva tydni
Kali vy kupili kvietki zahadzia, 5—6 sakavika, nie pieražyvajcie: jany spakojna dažyvuć da śviata, kali viedać sakret.
«Ciulpan zrazajecca jašče za tydzień da 8 sakavika, — raspaviadaje Iryna. — Hałoŭnaje — zachoŭvać jaho «na suchuju». Jon lažyć biez vady ŭ chałodnym miescy. Potym vy jaho padrazajecie, stavicie ŭ vadu — i jon staić u vas jašče dva tydni».
Tak što kvietki možna śmieła brać užo zaraz, pakul jość vybar sartoŭ i niama čerhaŭ.
Ceny na Kamaroŭskim rynku 5 sakavika ŭ rajonie abiedu byli takija: ciulpany (rynak/pałatki) — ad 2 rub. (drobnyja) da 5 rub. (vysokija); hijacynty ŭ harškach — 15 rub.; halinka mimozy — ceny pačynajucca ad 5 rub., u asnoŭnym pa 15—20 rub.
Ciapier čytajuć
Mabilnym apierataram zabaranili zahaniać biełarusaŭ u vialiki minus8
Mabilnym apierataram zabaranili zahaniać biełarusaŭ u vialiki minus
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary