U Budapiešcie zatrymali siem supracoŭnikaŭ ukrainskaha Aščadbanka ź dziasiatkami miljonaŭ dalaraŭ

Ministr zamiežnych spraŭ Ukrainy Andrej Sibiha zajaviŭ, što ŭ Budapiešcie ŭ čaćvier vienhierskija ŭłady zatrymali siamioch hramadzian Ukrainy, supracoŭnikaŭ Aščadbanka, pry jakich byli hrošy i kaštoŭnaści, piša «Ukrainskaja praŭda». 

«U Budapiešcie vienhierskija ŭłady ŭziali ŭ zakładniki siamioch hramadzian Ukrainy. Pryčyny, a taksama ich stan zdaroŭja i mahčymaść suviazi ź imi pakul nieviadomyja».

Sibiha adznačyŭ, što hetyja siamiora ŭkraincaŭ — supracoŭniki dziaržaŭnaha Aščadbanka, jakija vykonvali rejs na dvuch inkasatarskich aŭtamabilach pamiž Aŭstryjaj i Ukrainaj i pieravozili hrošy i kaštoŭnaści ŭ miežach rehularnych pieravozak pamiž dziaržaŭnymi bankami.

«Faktyčna, havorka idzie pra toje, što Vienhryja ŭziała zakładnikaŭ i vykrała hrošy. Kali heta taja «siła», pra jakuju siońnia kazaŭ spadar Viktar Orban, to heta siła złačynnaj bandy. Heta dziaržaŭny teraryzm i rekiet. My ŭžo nakiravali aficyjnuju notu z patrabavańniem nieadkładna vyzvalić našych hramadzian. My taksama źvierniemsia da Jeŭrapiejskaha sajuza z zapytam dać vyraznuju kvalifikacyju niezakonnym dziejańniam Vienhryi — zachopu zakładnikaŭ i rabavańniu», — napisaŭ Sibiha.

Taksama Aščadbank apublikavaŭ zajavu adnosna vykradańnia svaich supracoŭnikaŭ i sumy vykradzienych srodkaŭ i kaštoŭnaściaŭ.

«Pavodle danych GPS-sihnału, niezakonna zatrymanyja aŭtamabili Aščadbanka ciapier znachodziacca ŭ centry Budapiešta, pobač z adnoj ź siłavych struktur Vienhryi. Miesca znachodžańnia aŭtamabilaŭ paćvierdžana pradstaŭnikami pasolstva Ukrainy ŭ Vienhryi i Ministerstva zamiežnych spraŭ Ukrainy. Miesca znachodžańnia supracoŭnikaŭ Aščadbanka pakul nieviadomaje», — havorycca ŭ zajavie.

U banku dadali, što pieravozka hrošaj i kaštoŭnaściaŭ ažyćciaŭlałasia Aščadbankam u miežach mižnarodnaha pahadnieńnia z Raiffeisen Bank International (Aŭstryja).

«Hruz byŭ aformleny ŭ adpaviednaści ź mižnarodnymi praviłami pieravozak i dziejučymi jeŭrapiejskimi mytnymi pracedurami. Abjom kaštoŭnaściaŭ, jakija znachodzilisia ŭ vykradzienych aŭtamabilach, składaŭ 40 młn dalaraŭ ZŠA, 35 młn jeŭra i 9 kh zołata. Aščadbank patrabuje nieadkładnaha vyzvaleńnia svaich supracoŭnikaŭ i majomaści i ich viartańnia va Ukrainu», — padkreślili ŭ banku.

Usio heta raźvivajecca na fonie napružanych adnosin pamiž Budapieštam i Kijevam vakoł situacyi z naftapravodam «Družba».

2 sakavika premjer-ministr Viktar Orban zajaviŭ pra spadarožnikavyja zdymki, jakija nibyta dakazvajuć adsutnaść pieraškod u pracy naftapravoda «Družba».

Uładzimir Zialenski, kamientujučy heta, skazaŭ, što sa spadarožnikavych zdymkaŭ možna ŭbačyć daloka nie ŭsie detali. Taksama prezident Ukrainy papraknuŭ Viktara Orbana i Robierta Fica ŭ ehaiźmie ŭ situacyi z naftapravodam.

Orban u sacyjalnych sietkach apublikavaŭ videa, u jakim pahražaje siłaj prymusić Ukrainu adnavić tranzit nafty pa naftapravodzie «Družba».

• 2
• 1
• 3
• 10
• 3
• 0
• 19
• 0