Płanavali viasielle, ale nie viarnulisia z adpačynku. U avaryi ŭ Hruzii zahinuli 21‑hadovy Hleb i 20‑hadovaja Nastaśsia z Bresta
Maładziony vučylisia ŭ adnoj škole, i choć Nastaśsia pastupiła ŭ Pinsk, zastalisia razam.
Uviečary 12 žniŭnia mikraaŭtobus ź biełaruskimi turystami viartaŭsia z vysakahornaha kurorta Homismta ŭ Hruzii. Na 16‑m kiłamietry darohi ŭ bok Azurheci mašyna źjechała z prajeznaj častki, sarvałasia ŭ ciaśninu i ŭrezałasia ŭ dreva. Čaćviora biełarusaŭ zahinuli. Siarod ich — 21‑hadovy Hleb Mielnik i jahonaja 20‑hadovaja niaviesta Nastaśsia Filuk z Bresta.
Homismta znachodzicca ŭ hruzinskim rehijonie Huryja, na vyšyni 2755 mietraŭ. Jaho nazyvajuć «kurortam u abłokach»: u jasnaje nadvorje adtul vidać Čornaje mora, a abłoki lažać nižej za naziralnyja placoŭki. Ludzi padymajucca tudy, kab pabačyć zachad sonca i viarnucca z fatahrafijami, na jakich zdajecca, što staiš vyšej za nieba. Hleb i Nastaśsia taksama jechali tudy pa hetyja ŭražańni. Dadomu jany ŭžo nie viarnulisia.
Nastaśsia vučyłasia na ekanamista, Hleb cikaviŭsia rybałkaj
Hleb i Nastaśsia rodam z Bresta, aboje vučylisia ŭ siaredniaj škole № 28. Hleb byŭ na hod starejšy. Razam jany minimum ź leta 2023 hoda. Na sumiesnych zdymkach u sacsietkach — zvyčajnaje žyćcio maładoj pary: prahułki, pacałunki, abdymki i ŭśmieški.
Niadaŭna para zaručyłasia. U Hruziju maładyja ludzi pajechali na adpačynak.
Paśla škoły ŭ 2023 hodzie Nastaśsia pastupiła ŭ Paleski dziaržaŭny ŭniviersitet u Pinsku — na fakultet ekanomiki i finansaŭ. U lutym 2025 hoda jana razam ź inšaj studentkaj pryjechała ŭ rodnuju škołu, kab raspavieści pra svoj fakultet.
Hlebu byŭ 21 hod. U starejšych kłasach škoły jon dvojčy ŭdzielničaŭ u mižnarodnym konkursie pa infarmatycy. U jaho instahramie zachavalisia školnyja fatahrafii ŭ paradnaj kadeckaj formie.
Jość tam i kadry ŭ savieckaj formie kala čyhunačnaha vakzała Bresta. Jany byli zroblenyja padčas histaryčnaj rekanstrukcyi abarony stancyi Brest-Centralny ŭ sakaviku 2022 hoda. Kala paŭsotni ŭdzielnikaŭ tady adnaŭlali padziei červienia 1941-ha.
Hleb zachaplaŭsia strajkbołam i rybałkaj. U biełaruskaj supołcy rybakoŭ jon rehularna pytaŭsia, dzie i na što ciapier łovicca ryba. Chłopiec łaviŭ na fidar, uzimku praviaraŭ stan lodu i šukaŭ u Breście žyŭca.
Daroha, na jakoj pachnie tarmazami
Pavodle hruzinskaj prakuratury, mikraaŭtobus vylecieŭ z darohi, zvaliŭsia ŭ ciaśninu i sutyknuŭsia z drevam. Čatyry pasažyry zahinuli, 15 biełarusaŭ atrymali traŭmy. Paciarpieŭ i sam kiroŭca. Miascovyja žychary raskazvajuć, što na hetym spusku niaredka možna adčuć smurod pierahretych tarmazoŭ. Kiroŭca moh pierahreć tarmazy i paśla hetaha nie dać rady kiravańniu.
Śledstva vyznačyła, što kiroŭca nie mieŭ katehoryi paśviedčańnia, nieabchodnaj dla pieravozki takoj kolkaści ludziej. Niahledziačy na heta, jon vaziŭ zamiežnych turystaŭ. Mužčynu zatrymali i abvinavacili pavodle častki 8 artykuła 276 Kryminalnaha kodeksa Hruzii — parušeńnie pravił biaśpieki ruchu, jakoje pryviało da śmierci bolš jak dvuch čałaviek. Jamu pahražaje da dziesiaci hadoŭ pazbaŭleńnia voli. 15 žniŭnia sud pakinuŭ jaho pad vartaj.
Pavodle infarmacyi na 16 žniŭnia, z hruzinskich balnic vypisali ŭžo 12 paciarpiełych biełarusaŭ, siarod ich piaciora dziaciej. Jašče troje zastavalisia pad nahladam miedykaŭ.
Akramia Hleba i Nastaśsi, achviarami avaryi stali 38‑hadovy Siarhiej i 55‑hadovaja Žanna.
Cieły zahinułych prajšli sudmiedekśpiertyzu ŭ Batumi. Pavodle infarmacyi biełaruskaha MZS, spačatku na radzimu pavinny repatryjavać Nastaśsiu i Hleba. Pytańnie płanavali vyrašyć najbližejšymi dniami.
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?88
Kamientary
uražańni? ci fotazdymki siabie lubimaha(maj) na fonie?