U Biełastoku praviaduć śviatočny kancert dziela padtrymki prastory «Novaja Ziamla»
U Biełastoku 23 žniŭnia adbudziecca ŭračysty kancert da Dnia Niezaležnaści Biełarusi, jaki maje taksama dabračynnuju metu — padtrymać biełaruskuju hramadskuju i kulturnuju prastoru «Novaja Ziamla».
Arhanizatarami mierapryjemstva vystupajuć «Nacyjanalna-vyzvolny ruch Volnaja Biełaruś» i prastora «Novaja Ziamla». Jany zaprašajuć biełarusaŭ Biełastoka i haściej horada razam adznačyć 25 žniŭnia — datu, kali ŭ 1991 hodzie Aktam Viarchoŭnaha Savieta niezaležnaść Biełarusi nabyła kanstytucyjnuju siłu.
Arhanizatary padkreślivajuć, što heta nie prosta kancert, a mahčymaść sabracca biełaruskaj supolnaściu i adnačasova dapamahčy zachavać «Novuju Ziamlu». U hetaj prastory pravodziacca kancerty, vystavy, lekcyi, sustrečy, adukacyjnyja i dabračynnyja mierapryjemstvy. Jana słužyć miescam, dzie biełarusy mohuć karystacca rodnaj movaj, zachoŭvać kulturu, sustrakacca i padtrymlivać adzin adnaho.
Hałoŭnaja prablema, dla vyrašeńnia jakoj arhanizavany zbor srodkaŭ, — apłata arendy pamiaškańnia i zabieśpiačeńnie dalejšaj dziejnaści prastory. Pavodle arhanizataraŭ, papiarednija zbory dziakujučy salidarnaści biełarusaŭ dazvolili «Novaj Ziamli» praciahnuć pracu, ale patreba ŭ pastajannaj padtrymcy zachoŭvajecca.
Na praviadzieńnie mierapryjemstva płanujecca sabrać 9000 złotych (kala 2420 dalaraŭ). Ź ich 4000 złotych chočuć nakiravać na arendu «Novaj Ziamli», 3000 — na hanarary muzykam, akcioram i inšym udzielnikam, 500 — na prajezd haściej i transpartnyja vydatki, 1000 — na rekłamu i infarmacyjnuju padtrymku, jašče 500 złotych — na kavu, harbatu i pačastunki dla haściej.
Padtrymać zbor možna pa spasyłcy.
U prahramie zapłanavanaja sustreča z deputatami, jakija ŭdzielničali ŭ padziejach, źviazanych z adnaŭleńniem niezaležnaści Biełarusi. Asabista ŭ mierapryjemstvie voźmie ŭdzieł Zianon Paźniak, a anłajn dałučycca Jury Bieleńki.
Muzyčnuju častku prahramy pradstaviać Siaržuk Doŭhušaŭ, Taćciana i Justyna Karpiłovič, Źmicier i Hierald Bartosiki, Intehracyjny chor «Kalina» ź Biełastoka i Ihar Pałynski.
Taksama adbudziecca inscenizacyja frahmienta stenahramy Siesii Niezaležnaści.
Arhanizatary zaklikajuć biełarusaŭ dałučycca da śviatkavańnia i padtrymać zbor. Pavodle ich, navat nievialikaje achviaravańnie moža dapamahčy nie tolki pravieści kancert da Dnia Niezaležnaści, ale i zachavać «Novuju Ziamlu» jak miesca sustreč i kulturnaha žyćcia biełaruskaj supolnaści ŭ Biełastoku.
Mierapryjemstva adbudziecca 23 žniŭnia ŭ Biełastoku pa adrasie: vulica Śviatoha Rocha, 5. Pačatak — u 14:00.
Kamientary