Pskoŭski haradski sud pryznačyŭ namieśniku staršyni rasijskaj partyi «Jabłyk» Lvu Šłośbierhu 11 hadoŭ i adzin miesiac kałonii ahulnaha režymu. 63‑hadovaha palityka pryznali vinavatym u paŭtornaj «dyskredytacyi» rasijskaj armii i raspaŭsiudžvańni tak zvanych «fejkaŭ» pra vajnu Rasii suprać Ukrainy.
Padstavaj dla abvinavačańnia ŭ raspaŭsiudžvańni «fejkaŭ» staŭ zrobleny Šłośbierham u lutym 2022 hoda repost u Telegram publikacyi «Echa Moskvy» z vokładkaj brytanskaj haziety Daily Mirror. Na vyjavie byli namalavanyja akryvaŭlenaja žančyna i prezident Rasii Uładzimir Pucin, a podpis abviaščaŭ: «Jaje kroŭ… Jaho ruki». Pry hetym paźniej vyśvietliłasia, što samoj publikacyi ŭ momant reposta jašče nie isnavała.
Druhuju kryminalnuju spravu suprać palityka raspačali paśla jaho vystupu na debatach, dzie Šłośbierh vystupaŭ za jak maha bolš chutkaje spynieńnie vajny. Jon taksama krytykavaŭ kiraŭnictva Pskoŭskaj vobłaści.
Sam Šłośbierh svajoj viny nie pryznaŭ.
U partyi «Jabłyk» zajavili, što buduć damahacca spynieńnia pieraśledu Šłośbierha ŭsimi zakonnymi sposabami. U partyi nazvali prysud trahiedyjaj dla sučasnaj rasijskaj sudovaj sistemy i adznačyli, što palityk atrymaŭ 11 hadoŭ kałonii za publičnyja vykazvańni na karyść spynieńnia ahniu, zachavańnia žyćcia ludziej i krytyku ŭładaŭ.
Šłośbierh znachodzicca pad pieraśledam rasijskich uładaŭ užo niekalki hadoŭ. Z červienia 2025 hoda jon byŭ pad chatnim aryštam, a ŭ śniežni jaho pieraviali ŭ SIZA. U hety ž pieryjad Raśfinmanitorynh uklučyŭ palityka ŭ śpis «terarystaŭ i ekstremistaŭ».
Raniej Šłośbierha niekalki razoŭ štrafavali pavodle administracyjnych artykułaŭ ab «dyskredytacyi» armii. Akramia taho, u listapadzie sud pryznačyŭ jamu 420 hadzin abaviazkovych rabot pa kryminalnaj spravie ab nievykanańni abaviazkaŭ «zamiežnaha ahienta». Hety status jamu prysvoili ŭ 2023 hodzie.
Šłośbierh zastavaŭsia adnym ź niamnohich rasijskich apazicyjnych palitykaŭ, jakija praciahvali žyć u Rasii i adkryta vystupać suprać vajny.
U kancy červienia inšaha namieśnika staršyni «Jabłyka» — byłoha deputata Maskoŭskaj haradskoj dumy Maksima Kruhłova — asudzili da siami hadoŭ kałonii taksama pa spravie ab tak zvanych «vajennych fejkach». Padstavaj stali jaho publikacyi pra raźniu ŭ Bučy i hibiel mirnych žycharoŭ Maryupala ŭ vyniku rasijskaha ŭvarvańnia.
Ciapier čytajuć
«Kajłas, ja idu». Što za biełaruska źnikła ŭ žudasnym sieli ŭ Niepale6
Kamientary