Alaksiej Ščarbakoŭ — były śpiecnazaviec HRU i mantažnik mietro, jaki zrabiŭ karjeru na TNT i byŭ hościem u Juryja Dudzia.
U Rasii raptoŭna admianili kancerty adnaho z samych viadomych humarystaŭ Alaksieja Ščarbakova. Z afiš źnikli jaho solnyja vystupy ŭ rasijskich haradach, u tym liku kancert u maskoŭskaj kancertnaj zale «Moskva», jaki byŭ zapłanavany na 2 krasavika. Pakupnikam kvitkoŭ pačali viartać hrošy, a na sajcie samoha komika ciapier nie paznačana nivodnaha vystupu ŭ Rasii.
Ščarbakoŭ pryjšoŭ u humar z zusim nie tvorčaj bijahrafijaj. Budučy komik naradziŭsia ŭ padmaskoŭnym Źvianiharadzie. Paśla zakančeńnia Maskoŭskaha instytuta kiravańnia jon słužyŭ u 16‑j bryhadzie śpiecnazu HRU, jakaja raźmiaščajecca ŭ Tambovie. Paśla demabilizacyi, kab utrymlivać siamju, małady čałaviek pracavaŭ adrazu na dźviuch pracach: dniom na budoŭli, a nočču — mantažnikam u maskoŭskim mietro.
Šlach u stendap Ščarbakoŭ pačaŭ u 2012 hodzie. U 2015‑m jon staŭ rezidentam papularnaha šou Stand Up na telekanale TNT, jakoje i vyvieła jaho na šyrokuju aŭdytoryju.
Šyrokuju papularnaść jamu prynios internet-prajekt «Čto było dalšie?» — adno z samych papularnych ruskamoŭnych humarystyčnych šou na YouTube. Mienavita paśla zapusku hetaha prajekta ŭ 2019 hodzie Ščarbakoŭ staŭ adnym z samych zapatrabavanych komikaŭ Rasii. Jaho paznavalny vobraz — hrubavaty «prosty chłopiec» z pracoŭnym minułym, jaki žartuje pra siamju, słužbu i štodzionnaje žyćcio.
U 2020 hodzie komik staŭ hościem vialikaha intervju ŭ błohiera Juryja Dudzia. Razmova sabrała dziasiatki miljonaŭ prahladaŭ i jašče bolš pavialičyła jaho viadomaść.
Paśla pačatku poŭnamaštabnaj vajny Rasii suprać Ukrainy Ščarbakoŭ publična nie kamientavaŭ padziei i ŭ svaich vystupach imknuŭsia nie zakranać palityčnych tem. Adnak paśla padziej u Kurskaj vobłaści jon, pavodle paviedamleńniaŭ ŚMI, pryvoziŭ tudy humanitarnuju dapamohu miascovym žycharam.
Čamu mienavita ciapier byli admienienyja kancerty, aficyjna nie paviedamlajecca. Adnoj z mahčymych pryčyn nazyvajuć jaho siabroŭstva z komikam Nurłanam Saburavym — viadoŭcam prajekta «Čto było dalšie?»
U minułym hodzie vystupy Saburava taksama pačali admianiać u roznych haradach Rasii. 6 lutaha hetaha hoda komika, jaki maje hramadzianstva Kazachstana, nie puścili ŭ Rasiju i zabaranili jamu ŭjezd na 50 hadoŭ. Paśla hetaha Ščarbakoŭ palacieŭ u Kazachstan i zajaviŭ, što pryjechaŭ naviedać siabra. Pavodle niekatorych paviedamleńniaŭ, paśla hetaj pajezdki staŭleńnie arhanizataraŭ kancertaŭ da jaho rezka źmianiłasia i pačałasia chvala admienaŭ.
Adnak inšyja nahadvajuć, što prablemy ŭ komika mahli pačacca jašče raniej. U 2024 hodzie Ščarbakoŭ aktyŭna hastralavaŭ i vystupiŭ u 33 haradach. U nastupnym hodzie kancertaŭ stała prykładna ŭdvaja mienš, a ciapier jany faktyčna zusim źnikli z afiš.
Ciapier čytajuć
Biełaruska raspačała čelendž «40 spatkańniaŭ», ale ŭžo na siaredzinie nie chavaje rasčaravańnia ŭ mužčynach54
Kamientary