U Biełarusi prydumali, jak rabić žanočyja prakładki z kruchmału
Biełaruski brend Lino kampanii «MiedLon» raspracavaŭ žanočyja hihijeničnyja prakładki, u jakich vykarystoŭvajecca materyjał na asnovie bulbianoha kruchmału. Raspracoŭščyki imknulisia stvaryć sapraŭdy naturalny pradukt, jaki byŭ by ekałahičnym i adnačasova nadziejnym u vykarystańni, piša «Minskaja praŭda».
Prablema zaklučałasia ŭ tym, što navat «naturalnyja» srodki hihijeny zvyčajna majuć u składzie płastyk, jaki vykarystoŭvajecca jak vodaniepranikalny płast. Mienavita z-za jaho takija vyraby praktyčna nie raskładajucca ŭ pryrodzie i mohuć zachoŭvacca sotni hadoŭ. Tamu technołahi pačali šukać alternatyvu i źviarnuli ŭvahu na kruchmał z kukuruzy i bulby, ź jakoha možna atrymać śpiecyjalny bijaraskładalny palimier.
U pracesie vytvorčaści kruchmał prachodzić składanuju apracoŭku i pieratvarajecca ŭ vielmi tonkuju miembrannuju plonku. Jana vykonvaje tuju ž funkcyju, što i polietylen, — abaraniaje ad praciakańnia, ale pry hetym zdolnaja raskładacca. U jaje struktury jość mikraskapičnyja pory: vadkaść praź ich nie prachodzić, ale para moža vychodzić, tamu materyjał «dychaje» i nie stvaraje parnikovaha efiektu dla skury.
Inšyja płasty vyrabu taksama zrobleny z naturalnych materyjałaŭ. Vierchni płast składajecca z sumiesi bavoŭny i lonu, jaki maje naturalnyja antysieptyčnyja ŭłaścivaści. Pry apracoŭcy syraviny zamiest chłornaha adbielvańnia vykarystoŭvajecca technałohija z aktyŭnym kisłarodam.
Padčas raspracoŭki ŭźnikła niamała ciažkaściaŭ. Lon sam pa sabie davoli ćviordy, tamu jaho daviałosia śpiecyjalna apracoŭvać i źmiešvać z bavoŭnaj, kab materyjał staŭ miakkim. Akramia taho, palimiery z kruchmału bolš krochkija za zvyčajny płastyk, tamu śpiecyjalistam treba było znajści bałans pamiž tryvałaściu i tonkaściu plonki, a taksama raspracavać klejki płast, sumiaščalny z naturalnymi kampanientami.
U vyniku atrymałasia pradukcyja, jakaja raskładajecca značna chutčej za tradycyjnyja anałahi. Materyjały na asnovie kruchmału pastupova pieratvarajucca ŭ vadu, vuhlakisły haz i bijamasu, tamu mienš škodziać navakolnamu asiarodździu. Tak bulba, zvykłaja dla biełaruskaj kuchni, znajšła niečakanaje prymianieńnie ŭ sučasnych ekałahičnych technałohijach.
Ciapier čytajuć
Minski miedyk pajšoŭ vajavać za Rasiju, praź miesiac atrymaŭ ciažkaje ranieńnie, a ciapier vybivaje vypłaty, siedziačy ŭ invalidnym vazku9
Minski miedyk pajšoŭ vajavać za Rasiju, praź miesiac atrymaŭ ciažkaje ranieńnie, a ciapier vybivaje vypłaty, siedziačy ŭ invalidnym vazku
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1313
Kamientary
Ú bulbie kruchmalu amal 30% , heta niebiaśpiečna .