U Minsku da kanca hoda abiacajuć adkryć vielizarny handlovy centr, jaki budujecca ŭžo 15 hadoŭ

Kampanija «Mieha-Aktyŭ», jakaja źjaŭlajecca ŭładalnikam i zabudoŭščykam Mega Park, paviedamiła, što atrymała stanoŭčaje zaklučeńnie dziaržaŭnaj ekśpiertyzy na architekturny prajekt budynka. Budaŭničyja raboty ŭžo adnavilisia, a adkryć handlovy centr płanujuć da kanca 2026 hoda.

«Mieha-Aktyŭ» uvachodzić u hrupu kampanij «Santa». Prajekt realizujecca pad kantrolem kampanii «Santa-Servis», u partfieli jakoj jość CUM u Breście, CUM u Hrodnie i minski handlovy centr Magnit.

Ahulnaja płošča dvuch pavierchaŭ Mega Park składaje kala 58 tysiač kvadratnych mietraŭ. Na pieršym paviersie płanujuć raźmiaścić supiermarkiet «Susiedzi» płoščaj 4,5 tysiačy kvadratnych mietraŭ, a taksama pieršy ŭ Minsku multybrendavy mahazin adzieńnia, abutku i tavaraŭ dla doma «CUD» płoščaj kala 4 tysiač kvadratnych mietraŭ.

Pieršapačatkova handlovy centr pačali budavać u Kamiennaj Horcy jašče ŭ 2012 hodzie pavodle inviestycyjnaj damovy. Adkryć jaho płanavali ŭ 2017 hodzie. Prajekt praduhledžvaŭ vialiki sučasny kompleks z parkoŭkaj prykładna na 1200 aŭtamabilaŭ.

U Mega Park źbiralisia adkryć šmatzalny kinateatr, ladovuju arenu, siamiejny zabaŭlalny centr, dziciačy raźvivajučy centr, fitnes-centr, kafe i fudkort.

Adnak u 2017 hodzie adkryćcio nie adbyłosia. Novym terminam nazyvali 2020 hod, ale i tady handlovy centr nie zapracavaŭ. Choć budynak praktyčna dabudavali, raboty ŭ vyniku spynilisia, i niekalki hadoŭ jaho vyhlad amal nie źmianiaŭsia.

Pieršapačatkovym zakazčykam budaŭnictva było TAA «Vinterainviest» z zamiežnym kapitałam. Paźniej pieršaja namieśnica staršyni Minharvykankama Nadzieja Łazarevič raskazvała, što inviestar źjechaŭ, paśla čaho horad razhladaŭ mahčymaść samastojna zaviaršyć budaŭnictva. U vyniku ŭłady vyrašyli pradać abjekt na aŭkcyjonie.

Pieršyja sproby pradać kompleks u 2023 hodzie byli niaŭdałymi. Aŭkcyjon, zapłanavany na kastryčnik, nie adbyŭsia — nichto nie zachacieŭ nabyvać abjekt pa startavaj canie kala 121 miljona rubloŭ.

Nie znajšłosia kupca i na nastupnych tarhach u listapadzie. U śniežni startavuju canu źnizili prykładna ŭdvaja — da 60,8 miljona rubloŭ, ale i hety aŭkcyjon nie adbyŭsia.

U kancy śniežnia 2023 hoda niedabudavany HC vystavili na prodaž užo za 24,67 miljona rubloŭ. U hetuju sumu ŭvachodzili košt samoha budynka i prava arendy ziamielnaha ŭčastka na piać hadoŭ.

Takim čynam, za niekalki miesiacaŭ startavy košt abjekta źniziŭsia amal u piać razoŭ. Hetym razam aŭkcyjon adbyŭsia, i ŭ studzieni 2024 hoda Mega Park narešcie znajšoŭ novaha ŭładalnika. Kančatkovuju sumu, za jakuju byŭ pradadzieny niedabudavany handlovy centr, nie raskryli.

Ciapier novy ŭładalnik adnaŭlaje raboty i raźličvaje, što paśla ŭsich hetych hadoŭ Mega Park usio ž adkryjecca dla naviedvalnikaŭ da kanca 2026 hoda.

• 1
• 0
• 1
• 1
• 1
• 0
• 0
• 0