«Usie kazali, što heta nierealna». Biełaruska zmahła zrabić baćkam vizy niezvyčajnym šlacham

U Biełaruś žančyna nie jeździć. Kab ubačyć dačku, baćki imknulisia atrymlivać turystyčnyja vizy inšych jeŭrapiejskich krain. U hetym hodzie nie vyjšła.

Taćciana dumała aformić im haściavoje zaprašeńnie dla polskaj vizy. Ale sutyknułasia z prablemaj. Vajavodskaje zaprašeńnie (jakoje ŭnosicca ŭ adpaviedny rejestr) mohuć zrabić inšaziemcy z pastajannym dazvołam na žycharstva (stałym pobytam abo kartaj rezidenta ES) i tyja, chto lehalna i bieśpierapynna žyvie ŭ Polščy na praciahu apošnich piaci hadoŭ. Ni pad adnu z hetych katehoryj žančyna nie traplaje.

Tamu jana aformiła nie vajavodskaje, a zvyčajnaje nataryjalnaje zaprašeńnie. Voś tolki polskaje konsulstva pryniać dakumient admoviłasia.

«Ja kansultavałasia ź jurystami. Usie kazali, što heta nierealna — zrabić vizu pa nataryjalnym zaprašeńni», — uzhadvaje jana.

Pasiaredniki prapanoŭvali chiba što tolki kupić vajavodskaje zaprašeńnie ad starońniaha čałavieka za 1250 złotych (kala 335 dalaraŭ).

«Heta niejkaja dzirka ŭ zakonie»

Zvyčajna nataryjalnaha zaprašeńnia chapaje hramadzianam Polščy, jakija chočuć zaprasić da siabie inšaziemca, a ŭ niekatorych vypadkach taksama asobam pad mižnarodnaj abaronaj, jakija žyvuć u Polščy mienš za piać hadoŭ.

U Taćciany abarony niama, ale ŭ Polščy jana znachodzicca na humanitarnych padstavach — pryjechała pa humanitarnaj vizie, a potym na jaje asnovie atrymała DNŽ. Jana ličyła, što jaje vypadak musić padparadkoŭvacca toj ža łohicy, što dziejničaje ŭ dačynieńni da asob pad mižnarodnaj abaronaj.

«Razumieła, što heta niejkaja dzirka ŭ zakonie», — kaža jana.

Tady jana pačała pisać u roznyja instancyi, jakija dapamahajuć biełarusam za miažoj adstajać pravy. Usiaho adpraviła 15 listoŭ. Ale spracavaŭ adzin — adpraŭleny ŭ Abjadnany pierachodny kabiniet. Namieśnik kiraŭnika APK Pavieł Łatuška nakiravaŭ zapyt z apisańniem prablemy ŭ MZS Polščy, i adtul pryjšoŭ adkaz dyrektarki konsulskaha departamienta Justyny Chšanoŭskaj.

«Što tyčycca situacyi hramadzian Biełarusi, jakija znachodziacca na terytoryi Respubliki Polšča na padstavie humanitarnych viz, kartaŭ časovaha pobytu, atrymanych pa humanitarnych pryčynach, abo statusu dadatkovaj abarony, ja chacieła b asabliva padkreślić, što najbližejšyja členy siemjaŭ hetych asob (baćki, dzieci, dziaduli i babuli, unuki) majuć mahčymaść padavać zajavy na vizy na padstavie nataryjalna zaśviedčanych zaprašeńniaŭ», — havaryłasia ŭ adkazie.

U im taksama adznačałasia, što zaprašalniki pry hetym musiać padać poŭnuju infarmacyju pra pryčyny znachodžańnia ŭ Polščy, a nie tolki skan karty pobytu.

Prykład dla inšych

Paśla hetaha Taćciana paŭtorna nakiravała list u konsulstva Polščy ŭ Minsku, prykłaŭšy skan adkazu MZS. Narešcie, adtul patelefanavali i pryznačyli baćkam žančyny daty dla padačy zajaŭ. U vyniku vizy im vydali da kanca terminu dziejańnia DNŽ Taćciany. Doŭhačakanuju sustreču siamja zapłanavała na vosień.

Ciapier žančyna spadziajecca, što hety šlach stanie mahčymym i dla inšych biełarusaŭ z humanitarnymi DNŽ.

Jak zaprasić svajaka, kali vy znachodziciesia ŭ Polščy pad mižnarodnaj abaronaj abo pa inšych humanitarnych padstavach

Dla afarmleńnia nataryjalnaha zaprašeńnia dastatkova skłaści dakumient u svabodnaj formie, paznačyŭšy ŭ im svaje pašpartnyja danyja, numar PESEL, rašeńnie pra mižnarodnuju abaronu (kali jano jość), adras pražyvańnia i danyja asoby, jakuju zaprašajecie. A paśla — źviarnucca da nataryusa dla jaho zaśviedčańnia.

Paśla hetaha rekamiendujecca nakiravać konsułu elektronny list z temaj «Zaprašeńnie dla svajaka ad asoby sa statusam mižnarodnaj abarony (abo inšym statusam)». Da jaho prykłaści skany nataryjalna zaśviedčanaha zaprašeńnia, dakumientaŭ, jakija paćviardžajuć svajactva, kopiju pašparta abo karty pobytu zaprašalnika, a taksama pašparta i rehistracyi zaprašanaha.

U liście treba apisać situacyju i paprasić pryznačyć pryjom niepasredna ŭ konsulstvie, kab nie padviarhać niebiaśpiecy svajakoŭ u Biełarusi. Pradstaŭnik konsulstva źviažacca z zajaŭnikam i pryznačyć jaho svajakam datu dla padačy dakumientaŭ na vizu.

Paśla pryznačeńnia daty nieabchodna vysłać zaśviedčany nataryusam aryhinał zaprašeńnia svajakam u Biełaruś: u konsulstvie jany musiać padać aryhinał dakumienta.

• 19
• 1
• 0
• 0
• 0
• 0
• 0
• 2