Pad łavinaj u Kabardzina-Bałkaryi zahinuli 13 rasijskich śpiecnazaŭcaŭ
Alpinisty, jakich 6 vieraśnia nakryła łavina ŭ Biezienhijskaj ciaśninie Kabardzina-Bałkaryi, akazalisia supracoŭnikami rasijskich siłavych struktur. Jany prachodzili płanavyja zbory pa hornaj padrychtoŭcy.
Siarod alpinistaŭ, jakich nakryła łavina ŭ Biezienhijskaj ciaśninie, byli vajskoŭcy Centra śpiecyjalnaha pryznačeńnia «Viciaź» Rashvardyi, śćviardžaje telehram-kanał «Dośje špiona».
Pavodle jaho infarmacyi, zahinuli 13 vajskoŭcaŭ, jašče adzin znachodzicca ŭ komie.
Hrupa alpinistaŭ, jakaja trapiła pad łavinu ŭ Biezienhijskaj ciaśninie Kabardzina-Bałkaryi, prachodziła płanavyja navučalnyja zbory dla pradstaŭnikoŭ siłavych viedamstvaŭ, a nie ździajśniała spartyŭnaje ŭzychodžańnie, piša «Kommiersant».
Staršynia kamiteta spartyŭnaha alpinizmu Fiederacyi alpinizmu Rasii Alaksandr Jakavienka raskazaŭ vydańniu, što pad łavinu trapili nie zvyčajnyja turysty, a supracoŭniki siłavych viedamstvaŭ, jakija prachodzili płanavyja vučebnyja zbory.
«Heta nie kłasičnaje ŭzychodžańnie, a mienavita vučebny praces. Udzielniki raźbivajuć namiotavy łahier i vychodziać na niekalki dzion, kab adpracavać techniku pieramiaščeńnia pa lodavym reljefie i arhanizacyju strachoŭki», — patłumačyŭ Jakavienka.
Na jaho dumku, pradkazać abrušeńnie było niemahčyma: padobnych kataklizmaŭ u hetym rajonie nie zdarałasia dziesiacihodździami. Rasijski Śledčy kamitet raspačaŭ kryminalnuju spravu ab chałatnaści.
Łavina syšła 6 vieraśnia sa schiłu hary Mižyrhi i nakryła hrupu, u jakoj, pavodle ŭdakładnienych źviestak, byli 33 čałavieki. Spačatku rasijskaje MNS paviedamlała tolki pra 15 alpinistaŭ.
Pavodle aficyjnych źviestak MNS Rasii, paćvierdžanaja hibiel 12 čałaviek. Dziesiać udzielnikaŭ hrupy spuścilisia samastojna, šaściarych špitalizavali, los jašče piaci zastajecca nieviadomym.
Pošuki ŭskładniajuć niebiaśpiečny reljef i paŭtornaje abrušeńnie śniežna-ledzianoj masy. Dla abśledavańnia hary i dastaŭki ratavalnikaŭ pryciahnuli viertalot Mi-8.
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž20
Kamientary