Śpiektakli pra žyćcio ŭ Biełarusi paśla 2020 hoda, maciarynstva i ŭciekačoŭ — što jašče čakaje hledačoŭ na mižnarodnym teatralnym fiestyvali ŭ Poznani?
11 vieraśnia ŭ Poznani startuje mižnarodny teatralny fiestyval «Druhaja sproba» («Druga Próba. Teatr ponad granicami»), na jakim pakažuć pastanoŭki tvorcaŭ ź Biełarusi, Ukrainy i Polščy.
Siarod važnych anonsaŭ — pastanoŭka režysiorki Natalli Lavanavaj «Pčała ŭ horle» pa pjesie ananimnaj aŭtarki znutry krainy, jakaja ščyra raskryvaje temu žyćcia ŭ Biełarusi paśla 2020 hoda.
Hledačy taksama zmohuć ubačyć manadramu «LUBA» u režysury Maryi Bruni, jakaja zakranaje składanuju temu maciarynstva i maralnaj adkaznaści; chareahrafičny śpiektakl «Tsundoku» Volhi Kiebas, zasiarodžany na ŭnutranych manałohach sučasnaj žančyny.
Asobnaje miesca ŭ afišy zajmajuć pierfarmatyŭnyja čytańni pjes sučasnych aŭtarak, jakija projduć 18 i 19 vieraśnia ŭ Biblijatecy imia Račyńskich. Biełaruskich tvorcaŭ tut reprezientujuć dramaturhinia Ženia Davidzienka i režysiorka Julija Šaŭčuk ź ich pastanoŭkaj «Jak pazbavicca soramu».
Hledačy taksama zmohuć pabačyć pastanoŭku «Biežancy 1915» biełaruskaha režysiora i akciora Andreja Novika. Ź cikavostak śpiektakla — jaho šmatmoŭje. Sa sceny prahučyć jak polskaja, biełaruskaja, ruskaja movy, tak i padlašski dyjalekt.
Dadatkova ŭ miežach fiestyvalu projdzie dyskusija «Teatr jak adlustravańnie hramadska-palityčnych pracesaŭ: Biełaruś, Ukraina, Polšča».
Adukacyjny składnik pašyrany i za košt intensiŭnych trochdzionnych łabaratornych prac u ramkach teatra-dakumienta, dzie sumiesnyja mižnarodnyja hrupy buduć pracavać nad asabistymi bijahrafijami.
Historyja fiestyvalu «Druhaja sproba» pačałasia jak naturalny adkaz na chvali vymušanaj emihracyi tvorcaŭ, jakija pakinuli svoj dom paśla dramatyčnych padziej 2020 hoda ŭ Biełarusi i pačatku poŭnamaštabnaha rasijskaha ŭvarvańnia va Ukrainu ŭ 2022 hodzie. Mnohija prafiesijnyja akciory, režysiory i dramaturhi, apynuŭšysia ŭ čužoj krainie bieź viedańnia movy i prafiesijnych suviaziej, sutyknulisia ź fienomienam «prafiesijnaj niabačnaści», kali pryznanyja majstry sceny i ludzi kultury byli vymušanyja pracavać na budoŭlach abo składach adzieńnia.
Simvaličnaja nazva «Druhaja sproba» stała dla ich realnym šancam viarnucca ŭ prafiesijny teatr, adnavić stračanuju subjektnaść i znoŭ atrymać hołas u publičnaj prastory.
Bolš infarmacyi pra fiestyval i jaho prahrama — pa spasyłcy.
Ciapier čytajuć
Brat biełaruskaj karalevy pryhažości trapiŭ u reanimacyju ŭ Azierbajdžanie6
Brat biełaruskaj karalevy pryhažości trapiŭ u reanimacyju ŭ Azierbajdžanie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary