«Čakali 2 hady. Viza — na 9 dzion». Jak biełarusy ciapier prabivajucca ŭ Jeŭropu

Ekśpierty: praź Ispaniju «ryzyka admovy minimalnaja», a ambasada Italii — «samaja ščodraja»

Vizavyja ekśpierty ŭ Threads rajać padacca praź Ispaniju, bo «ryzyka admovy minimalnaja». Pry hetym zapisacca možna ciaham 1‑2 miesiacaŭ, razhlad dakumientaŭ zojmie da 6 tydniaŭ, a vizu daduć na 1‑3 miesiacy.

Ambasada Italii — taksama varyjant, na dumku adnaho z karystalnikaŭ sacsietki. Jana «samaja ščodraja»: u čysty pašpart stavić vizy na 3‑6 miesiacaŭ (choć i daty pad pajezdku taksama byvajuć), kali jość paćviardžeńnie znachodžańnia ŭ Italii, mohuć na 1‑3 hady dać. Dakumienty razhladajuć 2 tydni. Adnak padača mahčymaja, kali jość numar u žyvoj čarzie.

A voś niamieckaja ambasada «stała stavić drenna»: «navat kali jość paćviardžeńnie, što ludzi jeździli raniej u Hiermaniju, dajuć pad pajezdku abo na 3 miesiacy, radziej — ad paŭhoda da dvuch hadoŭ». Pry hetym čakać padačy daviadziecca 15‑18 miesiacaŭ.

Jašče adzin vizavy ekśpiert taksama adznačaje, što samy chutki i niedarahi varyjant ciapier — praz Hrecyju, lepš pad tur, ale «harantyj atrymańnia niama» i ŭ hetym vypadku. Choć «u siezon admoŭ mienš».

Ispancy, pavodle jaho słoŭ, adkryvajuć pieršuju vizu ŭ siarednim na 30 dzion, nastupnuju — na 3 miesiacy, i tak pa ŭzrastajučaj. Ale i ad ich možna čakać siurpryzaŭ. «Jak pašancuje» adkryvajuć i francuzy.

Niamiecki šenhien: «Čakała daty na padaču z kastryčnika 2024 hoda, atrymała ŭ krasaviku»

Ina čakała daty na padaču na niamieckuju vizu z kastryčnika 2024 hoda, atrymała ŭ krasaviku — na hod.

«Padača ŭžo ŭ ambasadzie była nieskładanaj: my prydumali maršrut, pierakłali ŭsio na niamieckuju — i pryjšli z poŭnym pakietam dakumientaŭ. Taksama da jaho prykłali čeki z papiaredniaj pajezdki ŭ Hiermaniju i kvitki (raniej u nas była viza na hod pa zaprašeńni)».

Ina kaža, što zapisvałasia praź sistemu anłajn-zapisu.

«Paśla taho, jak ty paśpiachova ŭniasieš usie nieabchodnyja danyja, na poštu pryjdzie paćviardžeńnie zapisu. A dalej čakaješ lista z dataj padačy. Terminy ŭva ŭsich varjirujucca (zdajecca, jany zaležać ad mety pajezdki) — ad hoda da dvuch hadoŭ. Paśla atrymańnia daty vizit nieabchodna paćvierdzić, pierajšoŭšy pa spasyłcy».

Jana taksama zapisałasia na padaču ŭ ambasadu Hiermanii ŭ kastryčniku 2024 — i kala miesiaca tamu atrymała vizu na 2 hady. Valeryja zapisałasia ŭ list čakańnia ŭ žniŭni ŭsio taho ž 2024 hoda, padavałasia ŭ kancy studzienia. Vynik — dali vizu na 30 dzion, choć dziaŭčyna raźličvała na bolšaje, bo ŭ jaje było zaprašeńnie ad siabroŭ.

Karystalnica Threads Marharyta paśla dvuch hadoŭ čakańnia atrymała niamiecki šenhien na jašče mienšy termin — 9 dzion. A inšaja karystalnica Iryna — na 5 hadoŭ, u jaje było zaprašeńnie ad siabroŭki, i heta jaje piataja niamieckaja viza.

Ispanski šenhien: «na 3 miesiacy ŭ čysty pašpart», ale ŭ niekaha i admova

Jaŭhienii zrabili sioleta ispanski šenhien — na 3 miesiacy ŭ čysty pašpart: dakumienty joj padrychtavali ŭ ahienctvie, na padaču zapisali za 1,5 tydnia — dziaŭčyna zapłaciła za heta 550 rubloŭ.

Arsienij padavaŭsia sam praz VIP-zału vizavaha centra Ispanii, bo tam «miescaŭ zaŭsiody bolš», i vynik toj ža — u pašparcie viza na 3 miesiacy z dvuchrazovym ujezdam. Jon rekamienduje ŭstupić u hrupu ŭ telehram i prytrymlivacca hajdaŭ — jany vielmi padrabiaznyja.

Sofja taksama padavałasia sama. Praz 5 tydniaŭ čakańnia atrymała vizu na miesiac (choć spadziavałasia na 3), inšych viz u dziaŭčyny raniej nie było.

Volzie pašancavała mienš — jana sprabavała adkryć ispanskuju vizu dla siabie i pažyłoj maci praz pamahataraŭ, ale atrymała admovu. U ahienctvie, ź jakim pracavała dziaŭčyna, tolki rukami raźviali.

Italjanski šenhien: «U čarzie na hanku tolki tyja, u kaho jość numar», ale možna i z turam

Usie surazmoŭcy, jakija atrymali italjanski šenhien, — z toj samaj «sšytkavaj» čarhi. Da studzienia 2025 hoda ŭ vizavy centr Italii možna było zapisacca pa žyvoj čarzie — ale zatym rehistracyju takim šlacham prypynili i adnavili tolki ŭ listapadzie.

A z 1 lipienia zapis i pryjom zajavak budzie rabić vizavy centr VF Worldwide na vulicy Maksima Tanka ŭ Minsku.

«Ciapier u čarzie na hanku tolki tyja, u kaho jość numar u žurnale, — jak praviła, ad 40+ tysiač», — raskazvaje Anhielina.

Jana sama atrymała vizu ŭ studzieni, zapisałasia jašče vosieńniu 2024 hoda — ale potym płany źmianilisia, i jana nie sprabavała vyśviatlać, što ź jaje numaram, vyrašyła, što «prapaŭ». Adnak kali dziaŭčyna znoŭ zaharełasia idejaj zrabić vizu, znajomyja paraili joj padyści ŭ vizavy centr i pasprabavać. Vynik — viza na 2 hady. Raniej u Anhieliny była hadavaja viza. Jość paćviardžeńnie znachodžańnia ŭ Italii.

Ivan taksama atrymaŭ italjanski šenhien — na 3 miesiacy. Jon kaža, što vyvučyŭ čaty ŭ telehramie i zrazumieŭ: najlepšy varyjant — kupić aŭtobusny tur. «Tak, nie vielmi kamfortna, ale zatoje vizu robiać albo biaspłatna, albo za simvaličnyja hrošy». Taksama zrabiła i Volha: jana paličyła, kolki aščadzić, kali budzie zajmacca arhanizacyjaj svajho padarožža sama, i pryjšła da vysnovy, što praściej kupić aŭtobusny tur na tydzień.

«Ja zapłaciła 700 jeŭra, plus konsulski i servisny zbor — a ŭ Threads pamahatary tolki za vizu prosiać 900 jeŭra».

Nastaśsia ŭ 2024 hodzie zapisałasia i ŭ «sšytak» u vizavym centry Italii, i ŭ čarhu ŭ ambasadzie Hiermanii. U vyniku italjanski šenhien joj dali ŭ kancy minułaha hoda — u čysty pašpart, a ciapier jana čakaje, što voś-voś budzie data padačy na niamiecki.

Hrečaski i vienhierski šenhien: kamu viarnuli pašparty bieź viz, a kamu — dali vizu na 3 hady

Natalla zrabiła hrečaskuju vizu sama — sabrała dakumienty i zapisałasia praz sajt. Na heta, pavodle słoŭ dziaŭčyny, pajšoŭ adzin viečar, data padačy była praz tydzień. U vyniku jana atrymała vizu pad daty pajezdki — na 14 dzion.

A voś karystalnica Threads Maryna skardzicca, što joj i synu viarnuli pašparty bieź viz — choć jany padavali dakumienty pad aŭtobusny tur u Hrecyju. Tłumačeńniaŭ nichto nie daŭ. Rašeńnie možna abskardzić, ale Maryna nie choča, bo heta robicca na hrečaskaj movie.

Volha atrymała ŭzimku vienhierski šenhien — pad tur. Joj dali vizu pad daty pajezdki, ale ŭ ich hrupie byli i ludzi, jakija atrymali na bolšy termin, «maksimalna — na hod». Dziaŭčyna kaža, što spačatku płanavała padavacca sama, ale nie zmahła złavić słoty. A potym paličyła, što z turam i šancaŭ na stanoŭčy vynik budzie bolš.

A jašče adna Natalla, kupiŭšy tur u Vienhryju, u sakaviku atrymała vizu na 3 hady.

Francuzski šenhien: «Prykłali stos vypisak i skrynaŭ, a ŭ vyniku atrymali vizy na miesiac»

Ambasada Francyi ŭ lutym źmianiła praceduru padačy zajavak na atrymańnie vizy, pieradała funkcyi pa zapisie kampanii TLScontact.

Kaciaryna padavałasia ŭ kancy zimy. Dziaŭčyna kupiła aŭtobusny tur — i atrymała vizy na 10 dzion. Adnak jana ličyć, što heta drenny vynik, bo ŭ jaje ŭ pašparcie ŭžo była šenhienskaja viza na 1,5 hoda, i jana raźličvała na bolšaje.

«U ahienctvie mnie skazali, što Francyja daje minimum na paŭhoda, a tym, u kaho ŭžo byli vizy, — na try. A tut takoje rasčaravańnie».

Karystalnica Threads Halina taksama kupiła tur u Francyju, «kab dali narmalnuju vizu». U pašparcie ŭ jaje ŭžo jość paŭhadavaja viza ad francuzaŭ, atrymanaja pad tur, i dźvie ispanskija — pa 3 miesiacy. U vyniku ŭ mai jana atrymała vizu na 15 dzion.

Aleh taksama niezadavoleny: padajučysia na vizy ŭ francuzskuju ambasadu (pa zaprašeńni ad siabroŭ), jany z žonkaj prykłali «ceły stos vypisak i skrynaŭ», jakija paćviardžajuć, što jany nieadnarazova byli ŭ Paryžy. A ŭ vyniku atrymali vizy na miesiac.

«Nas z žonkaj papiaredžvali: francuzy bolš lubiać čystyja pašparty, a italjancy — z historyjaj padarožžaŭ. Našy siabry rabili pad tur u Italiju (bo numarkoŭ z «žyvoj čarhi» ŭ ich nie było) — i im dali vizy na hod. Ale my paličyli, što ŭ francuzskaj ambasadzie aceniać našuju łajalnaść. Darma!

Zatoje zapisalisia chutka — ciaham adnaho viečara (dakładniej, nočy), słot atrymali na nastupny dzień, nu i daty padačy daviałosia pačakać krychu bolš za dva miesiacy».

Hanna padavałasia ŭ francuzskuju ambasadu ŭ kastryčniku minułaha hoda (kupiła tur) — atrymała vizu na 6 miesiacaŭ u čysty pašpart. Ciapier chacieła b paŭtaryć hety dośvied, ale, «načytaŭšysia paviedamleńniaŭ u čatach, pabojvajecca», što tak nadoŭha nie daduć.

• 2
• 0
• 0
• 0
• 0
• 2
• 1
• 0