Ambasada Hiermanii zajaviła pra namier skaracić čas čakańnia šenhienskich viz
Pra namier skaracić čas čakańnia šenhienskich viz zajaviła ŭ videazvarocie kiraŭnica niamieckaha dypłamatyčnaha pradstaŭnictva ŭ Biełarusi Katryn aŭs dem Zipien, zaŭvažyŭ «Pozirk».
«My z kamandaj ambasady vielmi radyja vialikaj cikavaści da Hiermanii. Nam vielmi važna ŭmacoŭvać najaŭnyja kantakty pamiž Hiermanijaj i Biełaruśsiu i sadziejničać ustanaŭleńniu novych. Afarmleńnie viz hraje pry hetym klučavuju rolu. Na žal, my nie možam całkam zadavolić vysoki popyt, i terminy čakańnia značna pavialičvajucca», — adznačyła Katryn aŭs dem Zipien.
Pavodle jaje słoŭ, u budučyni ambasada choča nadać hetaj prablemie jašče bolš uvahi.
«My pracujem nad rašeńniami, jakija dazvolać aptymizavać pracesy», — skazała dypłamatka.
Jana anansavała novuju rubryku na placoŭkach kamunikacyi ambasady ź biełaruskimi hramadzianami — «Visa: Mission Possible» («Viza: misija vykanalnaja»). U rubrycy buduć raźmiaščacca roliki, zaklikanyja «zrabić tak, kab padača dakumientaŭ na vizu była paśpiachovaj», paviedamiła aŭs dem Zipien.
U supravadžalnym pres-relizie adznačajecca, što ŭ 2025 hodzie ambasada Hiermanii vydała hramadzianam Biełarusi kala 42 tysiač šenhienskich viz. Jana «ŭvachodzić u dziasiatku rekardsmienaŭ pa vydačy viz siarod zamiežnych pradstaŭnictvaŭ Hiermanii va ŭsim śviecie».
«My pracujem nad tym, što možam źmianić svaimi siłami, i imkniomsia da palapšeńniaŭ, najpierš u dačynieńni da terminaŭ čakańnia», — padkreślivajecca ŭ paviedamleńni.
Akramia taho, dyppradstaŭnictva maje namier «abvierhnuć raspaŭsiudžanyja mify ab afarmleńni viz».
U kamientarach adna čytačka paviedamiła, što dvojčy čakała vykliku ŭ ambasadu 14 miesiacaŭ. Jašče adzin čytač napisaŭ, što čakaje adkazu z sakavika 2025 hoda, h.zn. prajšło taksama 14 miesiacaŭ.
Zhodna z danymi mihracyjnaj słužby Jeŭrasajuza, letaś u Biełarusi było vydadziena kala 152 tysiač šenhienskich viz. Dola Hiermanii skłała prykładna 28%.
Ciapier čytajuć
Łukašenka niervova prakamientavaŭ vizit Cichanoŭskaj u Kijeŭ45
Kamientary