U Biełarusi adčuvalna padaraželi aŭtazapčastki — voś čamu

Plus 67% za čatyry miesiacy

Aŭtamabilnyja zapčastki mocna padaraželi ŭ pieršuju čarhu praz toje, što z 19 lipienia jany bolš nie znachodziacca ŭ śpisie tavaraŭ, na jakija raspaŭsiudžvajecca 713‑ia pastanova — taja samaja, pra rehulavańnie cen. Praz heta cenaŭtvareńnie stała całkam svabodnym jak dla pastaŭščykoŭ i dystrybjutaraŭ, tak i dla roźničnych handlaroŭ.

Karystalnik tredsaŭ, jaki nabyvaŭ zapčastki ŭ kancy krasavika, a nastupny raz — u kancy žniŭnia, padzialiŭsia skrynšotami, na jakich bačna, što košyk z anałahičnymi tavarami za čatyry miesiacy padaražeŭ na 67%. Kali ŭ krasaviku jon kaštavaŭ jamu 246 rubloŭ, to ŭžo praz čatyry miesiacy — 412 rubloŭ.

Bolš za ŭsio ŭ canie dadała katuška zapalvańnia, za čatyry miesiacy jana padaražeła roŭna ŭdvaja. Pavietrany filtr vyras u canie z 9,20 da 16 rubloŭ, a čatyry śviečki zapalvańnia — z 28,40 da 51 rubla.

Heta i jość vynik taho, što ceny na zapčastki adpuścili i ciapier kožnaje źviano moža pavyšać canu jak choča. Asabliva adčuvalna vyraśli ceny mienavita na niedarahija pazicyi, jakija tradycyjna mieli najbolš vysokuju handlovuju nadbaŭku. Tamu ŭmoŭny kamplekt sčapleńnia ŭ pracentnym vymiareńni prybaviŭ u canie značna mienš, čym niejkija filtry, śviečki i inšaja drobiaź, bo na darahija pazicyi nadbaŭka i raniej była mienšaja.

Pavialičyć

Biznes viartajecca na staryja rejki

I kali dla šarahovych aŭtamabilistaŭ vykreślivańnie aŭtazapčastak z 713‑j pastanovy — heta minus, to pradstaŭniki biznesu kažuć, što ŭzdychnuli z palohkaj.

Tyčycca heta jak aptavikoŭ, tak i razdrobnych pradaŭcoŭ.

Asabliva ŭ plusie buduć bujnyja razdrobnyja selery. Reč u tym, što ŭ zaležnaści ad abjomaŭ zakupak adpusknyja aptovyja ceny mahli davoli prykmietna adroźnivacca dla drobnych, siarednich i bujnych pradaŭcoŭ.

Źjaŭleńnie 713‑j pastanovy hetuju roźnicu amal całkam nivielavała, što staviła bujnoha razdrobnaha pradaŭca ź sietkaj kram i drobnaha IP amal u adzin šerah. Ad čaho bujnomu biznesu było składaniej praz bolš vysokija vydatki ŭ paraŭnańni z drobnymi handlarami.

Ciapier pastaŭščyki viartajucca da starych pravił, kali abjomy zakupak upłyvajuć na aptovuju canu.

Pavialičyć

Druhaja pryčyna, čamu ceny rastuć, kryjecca ŭ tym, što za hety pieryjad biełaruski rubiel patańnieŭ adnosna dalara i jeŭra na 6—6,7%, a ceny aŭtazapčastak pryviazanyja da jeŭra i dalara.

Taksama na košt zapčastak u pastaŭščykoŭ u ciapierašnich umovach dastatkova adčuvalna ŭpłyvajuć vydatki na łahistyku, jakija mohuć jak raści, tak i mienšać.

A situacyja, jakaja skłałasia vakoł Armuzskaha praliva, vyklikaje dadatkovy rost cen na matornaje masła va ŭsim śviecie, što taksama adbivajecca na canie ŭ Biełarusi.

• 1
• 1
• 0
• 3
• 1
• 1
• 4
• 0