Lisički ad 3 rubloŭ, ryžyki — ad 8. Dzie vyhadniej za ŭsio kuplać hryby ŭ Minsku
Vosieńskaja chvala hryboŭ nakryła Biełaruś, adnak cana daroŭ lesu na rynkach kusajecca: za maładyja baraviki prosiać da 100 BYN za kiłahram. Dzie kupić viadro lisičak za 15 BYN i jak naniać «asabistaha hrybnika» dla zboru ŭradžaju, daviedałasia ahienctva «Minsk-Naviny».
U Biełarusi pajšła pieršaja vosieńskaja chvala hryboŭ: sacyjalnyja sietki i tematyčnyja kanały ŭ miesiendžarach strakaciać ščodrymi darami pryrody. Adnak pakul adnyja biełarusy chvalacca svaimi znachodkami, inšyja tolki ŭzdychajuć abo iduć pa lisički i baraviki na najbližejšy rynak.
Ceny tam, viadoma, demakratyčnymi nie nazavieš. Tak, u minułyja vychadnyja na Kamaroŭskim rynku pradavali lisički pa canie ad 12 da 15 BYN za kiłahram, mocnyja bujnyja baraviki — pa 50 BYN, a maładyja — i ŭvohule pa 100 BYN za kiłahram.
Adnak i na taki darahi tavar znajšoŭsia kupiec. Pradaviec Alaksandr sumlenna raskazaŭ u tyktoku, što zdoleŭ zarabić za dzień na hrybach kala 700 BYN. Mužčyna vydatkavaŭ na paliva 52 BYN, a za łabaratorny analiz hryboŭ i miesca na rynku zapłaciŭ jašče 46 BYN. Pradaŭšy ŭvieś sabrany ŭ lesie ŭradžaj, jon atrymaŭ 800 BYN.
Dla tych, chto nie hatovy addać za kiłahram baravikoŭ bolš za dźvie bazavyja vieličyni, zastajecca jašče adzin varyjant — časam navat z dastaŭkaj. Finansava jon moža akazacca navat vyhadniejšym, čym samastojny zbor hryboŭ u lesie: bo navat vosieńskaje bahaćcie nie harantuje poŭnyja viodry i košyki amataram cichaha palavańnia, a patracicca na paliva pa-lubomu daviadziecca.
Havorka idzie pra papularnuju placoŭku abjaŭ, dzie ŭdačlivyja hrybniki prapanujuć dary lesu, pryčym u šyrokim asartymiencie: tut možna znajści i polskija hryby, i apieńki, i maślaki. Tak, śviežyja lisički možna kupić pa canie ad 3 BYN za litr.
«Lisički śviežyja, cana za piacilitrovaje viadro (1,3 kh) 15 BYN. Znachodzimsia ŭ ah. Aziarco, 2,5 km za MKAD. Pa Malinaŭcy mahčymaja dastaŭka», — havorycca ŭ adnoj z abjaŭ.
Za anałahičnuju canu — 50 BYN — možna było ŭziać i 12 litraŭ adbornych apieniek, jakija prapanavaŭ žychar Maskoŭskaha rajona.
Duchmianyja, mocnyja baraviki na placoŭcy prapanujuć pa 40—45 BYN za kh, polskija — ad 25, «karaleŭskija» ryžyki — ad 8 BYN za litr.
Samyja daśviedčanyja (i samaŭpeŭnienyja) hrybniki prapanujuć patencyjnym kupcam zbor na zakaz. Naprykład, 5 litraŭ kuračak (padbałacianak) abydziecca kupcu ŭ 25 BYN.
«Źbiaru pad zakaz hryby z ekałahična čystaha lesu, miks baraviki — 30 %, padasinaviki — 30 %, rešta — padbiarozaviki i lisički. Možna inšyja suadnosiny. Zialony Łuh, mietro «Uručča» mahčyma padvieźci pa damoŭlenaści», — prapanuje haradžanin z Centralnaha rajona.
Jak dokaz svaich słoŭ mužčyna prykłaŭ fota poŭnych viodraŭ hryboŭ i dreŭ, usypanych apieńkami.
Toj ža pradprymalny minčuk prapanuje jašče adnu pasłuhu dla amataraŭ cichaha palavańnia — pavazić pa hrybnych miescach. Praŭda, košt takoj ekskluziŭnaj «ekskursii» ŭ les nie paznačany.
Ciapier čytajuć
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma12
Kamientary