U pryharadzie Ryma Kalafiera dniom 13 žniŭnia adbyłasia mahutnaja vybuchovaja avaryja na zavodzie bojeprypasaŭ KNDS Ammo Italy, jaki raniej naležaŭ kampanii Simmel Difesa, paviedamlaje La Repubblica.
Pavodle papiaredniaj infarmacyi, spačatku na pradpryjemstvie ŭźnik pažar. Kala 14:45 pa miascovym časie ŭ adnym z cechaŭ zahareŭsia kampaktar — mašyna, jakaja vykarystoŭvajecca dla presavańnia porachu. Paśla ahoń raspaŭsiudziŭsia pa terytoryi zavoda, što ŭ vyniku pryviało da vybuchu. Jaho było čuvać navat u susiednich nasielenych punktach.
Pažarniki i palicyja prybyli na miesca jašče da vybuchu. Usie 24 supracoŭniki, jakija ŭ toj dzień znachodzilisia na pradpryjemstvie, pavodle najaŭnaj infarmacyi, zastalisia ŭ biaśpiecy. Źviestak pra zahinułych abo paranienych pakul niama.
Ź mierkavańniaŭ biaśpieki ŭ rajonie zavoda pierakryli niekalki daroh. Vybuchovaja chvala paškodziła vokny ŭ niekatorych raźmieščanych pablizu damach.
Mer Kalafiera Džulia Kałamita zajaviŭ, što situacyja znachodzicca pad kantrolem i ŭłady čakajuć kančatkovaha paćviardžeńnia, što nichto nie zahinuŭ i nie atrymaŭ traŭmaŭ. Jon taksama adznačyŭ, što vybuch adbyŭsia ŭ pieryjad, kali pradpryjemstva nie pracavała ŭ poŭnym režymie. U žniŭni mnohija italjanskija kampanii sychodziać na letnija kanikuły, što, pavodle mera, mahło praduchilić značna bolš surjoznyja nastupstvy.
Pryčyna ŭzharańnia i vybuchu pakul nieviadomaja.
Zavod KNDS Ammo Italy śpiecyjalizujecca na vytvorčaści bojeprypasaŭ siaredniaha i bujnoha kalibru, a taksama ćviordaha paliva dla aerakaśmičnaj pramysłovaści.
Padobny surjozny incydent užo adbyvaŭsia na hetym pradpryjemstvie ŭ 2007 hodzie, kali zavod jašče naležaŭ Simmel Difesa. Tady ŭ vyniku vybuchu zahinuŭ adzin rabočy, jašče 13 čałaviek atrymali traŭmy.
Ciapier čytajuć
31‑hadovy rasijanin akruciŭ 17‑hadovuju biełarusku. Finał historyi strašny: turma za narkotyki, śmierć dziciaci, «SVA» i skradzienyja hrabavyja11
Kamientary