У прыгарадзе Рыма Каляфера днём 13 жніўня адбылася магутная выбуховая аварыя на заводзе боепрыпасаў KNDS Ammo Italy, які раней належаў кампаніі Simmel Difesa, паведамляе La Repubblica.
Паводле папярэдняй інфармацыі, спачатку на прадпрыемстве ўзнік пажар. Каля 14:45 па мясцовым часе ў адным з цэхаў загарэўся кампактар — машына, якая выкарыстоўваецца для прэсавання пораху. Пасля агонь распаўсюдзіўся па тэрыторыі завода, што ў выніку прывяло да выбуху. Яго было чуваць нават у суседніх населеных пунктах.
Пажарнікі і паліцыя прыбылі на месца яшчэ да выбуху. Усе 24 супрацоўнікі, якія ў той дзень знаходзіліся на прадпрыемстве, паводле наяўнай інфармацыі, засталіся ў бяспецы. Звестак пра загінулых або параненых пакуль няма.
З меркаванняў бяспекі ў раёне завода перакрылі некалькі дарог. Выбуховая хваля пашкодзіла вокны ў некаторых размешчаных паблізу дамах.
Мэр Каляфера Джуліа Каламіта заявіў, што сітуацыя знаходзіцца пад кантролем і ўлады чакаюць канчатковага пацвярджэння, што ніхто не загінуў і не атрымаў траўмаў. Ён таксама адзначыў, што выбух адбыўся ў перыяд, калі прадпрыемства не працавала ў поўным рэжыме. У жніўні многія італьянскія кампаніі сыходзяць на летнія канікулы, што, паводле мэра, магло прадухіліць значна больш сур'ёзныя наступствы.
Прычына ўзгарання і выбуху пакуль невядомая.
Завод KNDS Ammo Italy спецыялізуецца на вытворчасці боепрыпасаў сярэдняга і буйнога калібру, а таксама цвёрдага паліва для аэракасмічнай прамысловасці.
Падобны сур'ёзны інцыдэнт ужо адбываўся на гэтым прадпрыемстве ў 2007 годзе, калі завод яшчэ належаў Simmel Difesa. Тады ў выніку выбуху загінуў адзін рабочы, яшчэ 13 чалавек атрымалі траўмы.
Цяпер чытаюць
У 2020 годзе ябацька Аміна «актыўна галасавала» за Лукашэнку. А цяпер не разумее, чаму родная маці на яе данесла, а міліцыя затрымала41
Каментары