31‑hadovy rasijanin akruciŭ 17‑hadovuju biełarusku. Finał historyi strašny: turma za narkotyki, śmierć dziciaci, «SVA» i skradzienyja hrabavyja
Historyja kachańnia, jakaja pačałasia sa zvyčajnaj pierapiski ŭ internecie, abiarnułasia dla maładoj minčanki turmoj dla muža, śmierciu novanarodžanaha syna, ankałohijaj i žorstkaj zdradaj. Jaje abrańnika, asudžanaha za narkotyki, zabrali z kałonii na vajnu va Ukrainu, dzie jon zhinuŭ bieź viestak. Jahonyja ž svajaki praz vajenkamat śpiešna aformili śmierć i padzialili šmatmiljonnyja vypłaty, pakul ciažka chvoraja ŭdava lažała ŭ balnicy. Raskazvajem hetuju historyju.
Usio pačałosia ŭ 2021 hodzie, kali biełaruscy Marharycie K. (na toj momant 17‑hadovaj dziaŭčynie) u internecie napisaŭ 31‑hadovy ŭradženiec Kabardzina-Bałkaryi Zurab Kacinaŭ. Praz paŭhoda anłajn-adnosin maładyja ludzi źjechalisia.
Zurab u 2012‑m vypuściŭsia ź Piacihorskaha dziaržaŭnaha linhvistyčnaha ŭniviersiteta. U 2017 hodzie mužčyna aficyjna pracavaŭ u rasijskim «Pošta Banku», niejki čas byŭ barmienam, a napiaredadni svajho aryštu raźmiaščaŭ u siecivie reziume, dzie šukaŭ pracu vykładčyka anhlijskaj movy.
Na momant ža zatrymańnia i sumiesnaha žyćcia ź niepaŭnaletniaj biełaruskaj jon užo nidzie nie pracavaŭ i nie mieŭ lehalnych krynic dachodu. Kacinaŭ udzielničaŭ u rep-batłach, pisaŭ vieršy i publikavaŭ fota z tusovak i kancertaŭ.
29 śniežnia 2021 hoda ŭ ich maskoŭskaje žytło ŭvarvaŭsia AMAP. Kacinava zatrymali za zamach na zbyt narkotykaŭ u bujnym pamiery. U červieni 2022 hoda jamu prysudzili 8 hadoŭ kałonii strohaha režymu.
Niahledziačy na surovy artykuł i vialikuju roźnicu ŭ hadach, Marharyta nie kinuła kachanaha. Jana pahadziłasia na šlub prosta ŭ źniavoleńni. Z turmy Kacinaŭ pisaŭ joj vieršy pra kachańnie, jakija niechta publikavaŭ na jahonaj staroncy Ukantakcie.
Padčas adnaho sa spatkańniaŭ u 2024 hodzie Marharyta zaciažaryła ad Zuraba. Ale navat znachodziačysia za kratami, muž zavioŭ adnosiny na baku i niejak umudryŭsia zdradzić žoncy.
Siamiejnaje žyćcio kančatkova razburyłasia adpraŭkaj Kacinava na front. Adbyłosia heta, padobna, u červieni 2024 hoda — tady ž na jahonaj staroncy Ukantakcie znoŭku pačali źjaŭlacca publikacyi.
Jaho zabrali ŭ šturmavuju rotu — pavodle publikacyj žonki ŭ sacsietkach, biez dobraachvotnaj zhody i mienavita tady, kali jana vynošvała ich dzicia. Zurab atrymaŭ pazyŭny «Šajtan» i trapiŭ u 5‑y atrad 2‑j šturmavoj roty 1‑j hvardziejskaj motastrałkovaj bryhady.
17 vieraśnia 2024 hoda jon aficyjna źnik bieź viestak. Jak paźniej vyśvietliłasia, u tym bai pierastaŭ isnavać amal uvieś jahony atrad. Na fonie hetych navin u Marharyty adbylisia zaŭčasnyja rody na siomym miesiacy, akurat pad Novy hod. Słaboje niemaŭla pražyło niadoŭha.
Adnosiny sa svajakami muža, jakija pavinny byli stać aporaj u hety zmročny čas, pieratvarylisia ŭ cyničnuju historyju pra toje, chto atrymaje hrabavyja. Paśla straty dziciaci dziaŭčyna jašče kantaktavała ź imi. Adnak nieŭzabavie ŭ jaje dyjahnastavali ankałohiju.
Pakul niaviestka bolš za hod zmahałasia z rakam u biełaruskich klinikach, rodnyja Kacinava pačali dziaŭbci vajenkamat u Kabardzina-Bałkaryi, kab chutčej pryznać źnikłaha bajca zahinułym.
Jak tolki aficyjny status byŭ atrymany, a hrabavyja apynulisia na ich rachunkach, svajaki kinuli dziaŭčynu ŭ poŭnaj nieviadomaści. Jany źmianili numary telefonaŭ, vydalilisia z sacyjalnych sietak i vyjechali ŭ nieviadomym kirunku. Kali Marharyta sprabavała datelefanavacca da ich ci znajści choć niejkuju infarmacyju, susiedzi pa miescy ich prapiski paviedamili, što tam daŭno ŭžo nichto nie žyvie.
Tolki ŭ lipieni 2026 hoda, dasiahnuŭšy remisii, 22‑hadovaja biełaruska zdoleła pryjechać na Kaŭkaz, kab daviedacca praŭdu. U vajenkamacie joj paviedamili, što pachavańnie daŭno adbyłosia, dakumienty zdadzienyja ŭ archiŭ, a sam Kacinaŭ lažyć u biezymiennaj mahile. Nijakich DNK-ekśpiertyz nie pravodziłasia.
Udava ličyć pachavańnie butaforyjaj z pustoj trunoj dziela chutkaha atrymańnia vypłat. Tak Marharyta zastałasia adna, biez muža i bieź ničoha.
«Naša Niva» — bastyjon biełaruščyny
PADTRYMAĆ46‑hadovy bieraściejec šukaŭ pracu ŭ Amsterdamie. A jak nie skłałasia, to pajšoŭ na front ź vidavočnym vynikam
Minski miedyk pajšoŭ vajavać za Rasiju, praź miesiac atrymaŭ ciažkaje ranieńnie, a ciapier vybivaje vypłaty, siedziačy ŭ invalidnym vazku
Siarhiej z Chojnikaŭ naźbiraŭ daŭhoŭ pa alimientach na radzimie i pajechaŭ šturmavać Vaŭčansk. Ale hrabavyja zabiare druhaja žonka — rasijskaja
Ciapier čytajuć
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma14
Kamientary