31‑гадовы расіянін акруціў 17‑гадовую беларуску. Фінал гісторыі страшны: турма за наркотыкі, смерць дзіцяці, «СВА» і скрадзеныя грабавыя
Гісторыя кахання, якая пачалася са звычайнай перапіскі ў інтэрнэце, абярнулася для маладой мінчанкі турмой для мужа, смерцю нованароджанага сына, анкалогіяй і жорсткай здрадай. Яе абранніка, асуджанага за наркотыкі, забралі з калоніі на вайну ва Украіну, дзе ён згінуў без вестак. Ягоныя ж сваякі праз ваенкамат спешна аформілі смерць і падзялілі шматмільённыя выплаты, пакуль цяжка хворая ўдава ляжала ў бальніцы. Расказваем гэтую гісторыю.
Усё пачалося ў 2021 годзе, калі беларусцы Маргарыце К. (на той момант 17‑гадовай дзяўчыне) у інтэрнэце напісаў 31‑гадовы ўраджэнец Кабардзіна-Балкарыі Зураб Кацінаў. Праз паўгода анлайн-адносін маладыя людзі з'ехаліся.
Зураб у 2012‑м выпусціўся з Пяцігорскага дзяржаўнага лінгвістычнага ўніверсітэта. У 2017 годзе мужчына афіцыйна працаваў у расійскім «Пошта Банку», нейкі час быў барменам, а напярэдадні свайго арышту размяшчаў у сеціве рэзюмэ, дзе шукаў працу выкладчыка англійскай мовы.
На момант жа затрымання і сумеснага жыцця з непаўналетняй беларускай ён ужо нідзе не працаваў і не меў легальных крыніц даходу. Кацінаў удзельнічаў у рэп-батлах, пісаў вершы і публікаваў фота з тусовак і канцэртаў.
29 снежня 2021 года ў іх маскоўскае жытло ўварваўся АМАП. Кацінава затрымалі за замах на збыт наркотыкаў у буйным памеры. У чэрвені 2022 года яму прысудзілі 8 гадоў калоніі строгага рэжыму.
Нягледзячы на суровы артыкул і вялікую розніцу ў гадах, Маргарыта не кінула каханага. Яна пагадзілася на шлюб проста ў зняволенні. З турмы Кацінаў пісаў ёй вершы пра каханне, якія нехта публікаваў на ягонай старонцы Укантакце.
Падчас аднаго са спатканняў у 2024 годзе Маргарыта зацяжарыла ад Зураба. Але нават знаходзячыся за кратамі, муж завёў адносіны на баку і неяк умудрыўся здрадзіць жонцы.
Сямейнае жыццё канчаткова разбурылася адпраўкай Кацінава на фронт. Адбылося гэта, падобна, у чэрвені 2024 года — тады ж на ягонай старонцы Укантакце зноўку пачалі з'яўляцца публікацыі.
Яго забралі ў штурмавую роту — паводле публікацый жонкі ў сацсетках, без добраахвотнай згоды і менавіта тады, калі яна выношвала іх дзіця. Зураб атрымаў пазыўны «Шайтан» і трапіў у 5‑ы атрад 2‑й штурмавой роты 1‑й гвардзейскай мотастралковай брыгады.
17 верасня 2024 года ён афіцыйна знік без вестак. Як пазней высветлілася, у тым баі перастаў існаваць амаль увесь ягоны атрад. На фоне гэтых навін у Маргарыты адбыліся заўчасныя роды на сёмым месяцы, акурат пад Новы год. Слабое немаўля пражыло нядоўга.
Адносіны са сваякамі мужа, якія павінны былі стаць апорай у гэты змрочны час, ператварыліся ў цынічную гісторыю пра тое, хто атрымае грабавыя. Пасля страты дзіцяці дзяўчына яшчэ кантактавала з імі. Аднак неўзабаве ў яе дыягнаставалі анкалогію.
Пакуль нявестка больш за год змагалася з ракам у беларускіх клініках, родныя Кацінава пачалі дзяўбці ваенкамат у Кабардзіна-Балкарыі, каб хутчэй прызнаць зніклага байца загінулым.
Як толькі афіцыйны статус быў атрыманы, а грабавыя апынуліся на іх рахунках, сваякі кінулі дзяўчыну ў поўнай невядомасці. Яны змянілі нумары тэлефонаў, выдаліліся з сацыяльных сетак і выехалі ў невядомым кірунку. Калі Маргарыта спрабавала датэлефанавацца да іх ці знайсці хоць нейкую інфармацыю, суседзі па месцы іх прапіскі паведамілі, што там даўно ўжо ніхто не жыве.
Толькі ў ліпені 2026 года, дасягнуўшы рэмісіі, 22‑гадовая беларуска здолела прыехаць на Каўказ, каб даведацца праўду. У ваенкамаце ёй паведамілі, што пахаванне даўно адбылося, дакументы здадзеныя ў архіў, а сам Кацінаў ляжыць у безыменнай магіле. Ніякіх ДНК-экспертыз не праводзілася.
Удава лічыць пахаванне бутафорыяй з пустой труной дзеля хуткага атрымання выплат. Так Маргарыта засталася адна, без мужа і без нічога.
«Наша Нiва» — бастыён беларушчыны
ПАДТРЫМАЦЬ46‑гадовы берасцеец шукаў працу ў Амстэрдаме. А як не склалася, то пайшоў на фронт з відавочным вынікам
Мінскі медык пайшоў ваяваць за Расію, праз месяц атрымаў цяжкае раненне, а цяпер выбівае выплаты, седзячы ў інвалідным вазку
Сяргей з Хойнікаў назбіраў даўгоў па аліментах на радзіме і паехаў штурмаваць Ваўчанск. Але грабавыя забярэ другая жонка — расійская
Цяпер чытаюць
31‑гадовы расіянін акруціў 17‑гадовую беларуску. Фінал гісторыі страшны: турма за наркотыкі, смерць дзіцяці, «СВА» і скрадзеныя грабавыя11
Каментары