Вірусіцца гульня, дзе можна нарадзіцца ў любой краіне на свеце
Гульню 1 in 8 Billions («Адзін з 8 мільярдаў») выпусцілі 5 кастрычніка, і менш чым за месяц яна скарыла карыстальнікаў па ўсім свеце. Чаму пражываць чужыя жыцці так зацягвае?
1 in 8 Billions — праект паўднёвакарэйскага распрацоўшчыка, які працуе пад псеўданімам Джын Хвіёс. З дапамогай нейрасеткі Claude ён усяго за чатыры гадзіны стварыў гульню, што ператварылася ў інтэрнэт-фенамен.
Цяпер гульня даступная на 14 мовах. Каб распачаць яе, трэба зайсці на сайт гульні і націснуць на кнопку «Нарадзіцца» — «To be born», калі вы абіраеце англамоўную версію. Праграма падбірае, у якой краіне народзіцца ваш персанаж, у залежнасці ад сапраўднага насельніцтва розных краін: зразумела, што і ў рэальным жыцці шанс нарадзіцца ў Кітаі ці Індыі нашмат большы, чым, напрыклад, у Беларусі.
Далей праграма стварае асобную старонку для вашага персанажа. Яго жыццё будзе залежыць ад даходу сям’і, здольнасцей, месца нараджэння і шматлікіх іншых фактараў, якія вы не зможаце выбраць — усё гэта залежыць ад статыстычнай верагоднасці. Вы зможаце прымаць важныя рашэнні за персанаж, але давядзецца будаваць яго шчаслівае жыццё, нягледзячы на крызісы, хваробы і войны, а часам і на адсутнасць доступу да кантрацэпцыі і сродкаў гігіены.
Напрыклад, алгарытмы вырашылі, што ваш персанаж — дзяўчынка з сям’і фермераў ва Угандзе. У першыя гады жыцця яе атачае нястача ежы, яна хварэе на малярыю. У 6 гадоў ваш персанаж зарабляе грошы фізічнай працай і толькі ў 8 ідзе ў школу. Але ў 10 гадоў персанажу даводзіцца кінуць вучобу і вяртацца да фізічнай працы.
Калі гераіня трохі падрасце, з’явіцца магчымасць зарабіць ёй грошы хаця б на некалькі гадоў вучобы ў школе. Яна сыходзіць ад мужа праз хатні гвалт, нараджае шэсць дзяцей і толькі ў 32 гады заканчвае ўніверсітэт, а потым ледзь дае рады пазыкам і атрымлівае залежнасць ад наркотыкаў.
Гульня хутка набрала папулярнасць у сацсетках: праз дзесяць дзён пасля запуску, паводле лічыльніка на сайце гульні, яе праходзілі адначасова больш за 84 тысячы чалавек. Тыя, хто ўжо паспеў пагуляць у 1 in 8 Billions, дзеляцца сваімі ўражаннямі ў сацсетках — ёсць водгукі і па-руску, і нават па-беларуску. Шмат каму з карыстальнікаў гульня дапамагла зразумець, наколькі жыццё чалавека залежыць ад краіны і сям’і, дзе ён нарадзіўся.
«Наша Нiва» — бастыён беларушчыны
ПАДТРЫМАЦЬЦяпер чытаюць
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2020
Каментары