Ceny na naftu ŭpieršyniu z 2022 hoda padnialisia vyšej za 115 dalaraŭ za baral
Skačok adbyŭsia adrazu na 20 pracentaŭ, a niekatoryja analityki miarkuć, što ceny mohuć dasiahnuć u sakaviku i 150 dalaraŭ.
Suśvietnyja ceny na naftu ŭpieršyniu z 2022 hoda pieravysili 115 dalaraŭ za baral na fonie zaściaroh, što abvastreńnie vajny ZŠA i Izraila ź Iranam moža nadoŭha parušyć pastaŭki praz Armuzski praliŭ, piša Bi-bi-si.
Ranicaj u paniadziełak u Azii nafta marki Brent padaražeła prykładna na 20% — da 115 dalaraŭ za baral, a amierykanskaja nafta Nymex Light Sweet vyrasła bolš čym na 17% — da 106,77 dalara.
Fjučarsy na Brent z pastaŭkaj u mai na łondanskaj biržy Intercontinental Exchange vyraśli na 25% — da 116 dalaraŭ za barel. Pra heta śviedčać danyja tarhoŭ pa stanie na 07:35.
Mnohija ŭdzielniki rynku prahnazavali, što na hetym tydni cana nafty dasiahnie adznaki 100 dalaraŭ za baral.
U vyniku dla skačka na 10% spatrebiłasia prykładna chvilina, a jašče praz 15 chvilin cana vyrasła jašče na 10% padčas rańnich tarhoŭ u Azii.
Na minułym tydni rynki zachoŭvali adnosny spakoj, choć miljony baralaŭ nafty i zvadkavanaha pryrodnaha hazu akazalisia zabłakavanymi ŭ Piersidskim zalivie z-za prablem z prachodam praz Armuzski praliŭ.
Adnak eskałacyja ŭ vychodnyja, a taksama kadry razbureńnia enierhietyčnaj infrastruktury jak u Iranie, tak i ŭ krainach Piersidskaha zaliva, vyklikali rezkuju tryvohu na rynkach.
Ciapier hałoŭnaje pytańnie — jak budzie raźvivacca situacyja dalej. Niekatoryja analityki ličać, što kali praliŭ zastaniecca zakrytym da kanca sakavika, ceny na naftu mohuć ustalavać rekord i pieravysić 150 dalaraŭ za baral.
Rost, vierahodna, pryviadzie da dalejšaha padaražańnia bienzinu, a taksama važnych vytvornych praduktaŭ, takich jak avijacyjnaje paliva i klučavyja kampanienty dla vytvorčaści ŭhnajeńniaŭ.
Hałoŭnymi spažyŭcami nafty i hazu z krain Piersidskaha zaliva zastajucca azijackija rynki.
Adnak užo jość prykmiety taho, što azijackija pakupniki pavyšajuć ceny na amierykanski haz: niekatoryja tankiery, jakija pieršapačatkova nakiroŭvalisia ŭ Jeŭropu, razvaročvajucca prosta pasiaredzinie Atłantyki.
Prezident ZŠA Donald Tramp, kamientujučy skačok cen, zajaviŭ, što karotkaterminovy rost — «nievialikaja płata» za likvidacyju iranskaj jadziernaj pahrozy.
«Karotkaterminovy rost cen na naftu, jaki chutka źniknie paśla likvidacyi iranskaj jadziernaj pahrozy, — heta vielmi nievialikaja płata za biaśpieku i mir dla ZŠA i ŭsiaho śvietu», — napisaŭ jon u sacsietcy Truth Social.
«TOLKI DURNI DUMAJUĆ INAKŠ!» — dadaŭ jon.
Ministr enierhietyki ZŠA ŭ niadzielu zajaviŭ amierykanskim telekanałam, što ŭdary pa enierhietyčnaj infrastruktury Irana nanosić Izrail, a nie ZŠA — na fonie zaniepakojenaści rostam unutranych cen na bienzin, vyklikanym vajnoj.
Kamientary