У Беларусі з 1 кастрычніка памяняўся парадак разліку платы за жыллёва-камунальныя паслугі для незанятых у эканоміцы грамадзян. Ролік у тыктоку пра тое, што сем’і «дармаедаў» у шоку ад жыровак за кастрычнік, выклікаў бурнае абмеркаванне. Як вынікае з каментароў, у шоку ад сум не толькі «дармаеды».
Камуналка істотна павысілася нават у тых, хто афіцыйна працаўладкаваны і не трапляе ў базы незанятых. Людзі параўноўваюць свае сумы з поўнымі тарыфамі і не бачаць вялікай розніцы.
«Я працую, а плачу як дармаед»
Многія каментатары падкрэсліваюць, што ўсе працаздольныя члены сям'і маюць афіцыйную працу, але лічбы ў квітанцыях усё роўна выраслі.
«Мне таксама прыйшла 292 рублі жыроўка, але я афіцыйна працую і жонка таксама, незразумела чаму».
«Я працую, і жонка працуе, а плачу за кватэру 330 рублёў, тое ж, што і дармаеды, невялікая розніца 365 ад 330 рублёў».
«У мяне 39 метраў і цана 250 рублёў, хоць працую».
«Тут і ў не дармаеда высокая жыроўка — 127 рублёў толькі па жыроўцы».
«У мяне кватэра 70 метраў, я ўладальніца, працую, жыроўка прыйшла 150 рублёў, прапісана тры чалавекі: я, муж, дзіця».
Ад 150 да 315 рублёў за кватэру
Карыстальнікі актыўна дзяліліся канкрэтнымі сумамі за кватэры, і гэтыя лічбы гавораць самі за сябе. Асабліва здзіўляюць рахункі за адна– і двухпакаёвыя кватэры.
«За аднапакаёвую 148 рублёў».
«Мне за ваду па 120 рублёў выстаўляюць, 3 чалавекі прапісана».
«Мы плацім за трохпакаёвую каля 310 рублёў з улікам, што маці-ўладальніца мае інваліднасць. Вось дзе 700 рублёў, гэта ўжо адчувальна, канечне».
«Аднапакаёвая кватэра — 315 рублёў прыйшло((( мама ўладальніца, жыве ў вёсцы і займаецца асабістай гаспадаркай для ўласных патрэб, яна не дармаед((, я працую ў Мінску і жыву ў мамінай кватэры, чаму я павінна плаціць такую суму. Дзе справядлівасць».
Асобная тэма — інтэрнаты
Як высветлілася, жыхары інтэрнатаў плацяць сумы, супастаўныя з платай за паўнавартасныя кватэры. Для многіх гэта выглядае абсалютна непрапарцыйна цэнам за невялікі пакой ці блок.
«Магу вас супакоіць: я жыву ў сямейным інтэрнаце, пакой 12 метраў, прапісаныя два чалавекі — за кастрычнік аплата 140 рублёў, у іншых інтэрнатах каля 200 рублёў за такі ж метраж».
«За блок у інтэрнаце, жывём я і двое дзяцей непаўналетніх, камуналка ў мінулым месяцы была 180 рублёў, а ў гэтым 250. І працую».
«Мы аплачваем інтэрнат на чатырох чалавек зімой 320 рублёў. Абое працуем на дзяржпрацы. Не ведаем, што чакаць гэтай зімой».
«160 рублёў за інтэрнат, тры чалавекі, у дэкрэце, месяц таму было 144 рублёў, шмат святла выйшла».
«Я ў інтэрнаце жыву, у мяне блок — гэта два пакоі, калідор, туалет, ванна і паўкухні, і плачу 340 рублёў беларускіх, не лічачы, што нас пяцёра чалавек: гэта трое дзяцей і мы двое».
«За што?»
Некаторыя карыстальнікі прыводзяць прыклады незразумелых налічэнняў:
«Мне налічылі 150 рублёў без святла, газу і вады. Хаця раней было 50 рублёў — гэта мая доля. Пры гэтым самі чыноўнікі па дамове не прыбіраюць фекалій».
«Пенсіянеру налічылі 194 рублёў, прапісаны адзін».
«Мне за месяц і 14 дзён прыйшло 600 рублёў».
«А ў мяне за 3‑пакаёвую атрымалася 172 рублі»
Сярод абурэнняў знайшоўся каментарый, які выклікаў не менш бурную, але ўжо іншую рэакцыю — недавер. Адна з карыстальніц напісала пра сваю нечакана нізкую жыроўку:
«Я не ведаю, у мяне кватэра трохпакаёвая, чатыры чалавекі прапісана. Квартплата 62 рублі + святло + вада + 40 рублёў сотавыя + тэлефон + тэлебачанне. Атрымалася 172 рублі».
Гэтая лічба падалася многім нерэалістычнай:
«Я таксама не ведаю — нас тры чалавекі, кватэра 43 метры, за кватэру прыйшло 103 рублі, гэта без усяго, толькі за кватэру. Незразумела, чаму вам так мала».
«Сапраўды, і мне незразумела, 43 квадраты, прапісаная адна — 72 рублі, на сетках Мінсккамунцепласеткі. У сына той жа метраж, прапісаны адзін — 53 рублі, але дом засілкаваны ад Мінскіх цеплавых сетак. Чаму такая розніца? Скажам так, перагрэву па ацяпленні няма, значыць, аўтаматыка спраўная, вада па лічыльніках, усё ў межах нормы. Дык адкуль розніца???»
Асобныя абвінавацілі яе ў хлусні, лічаць, што гэта напісаў прапагандыст або ідэолаг:
«Не слухайце гэтай хлусні. Кватэра 45,9 метра, тры чалавекі. 92,83 рубля за кастрычнік. Гэта яшчэ мала, проста вады толькі сем кубоў выйшла, а так было б больш».
«Думаю таксама, што хлусяць, або вадой практычна не карыстаюцца, эканомяць. Быць такога не можа».
«Лухты не пішы, у мяне 47 квадратаў, аднапакаёўка, за мінулы месяц заплаціла па жыроўцы 106 рублёў, гэта разам са святлом, яно ў нас уваходзіць у жыроўку, і 8 рублёў членскія ўзносы. Інтэрнэт 30 рублёў, мабільны 25 рублёў. Вось і лічы, абрыдла чытаць ужо лухту вашу».
«У мяне 47 квадратаў — 106 рублёў, каго вы чытаеце, зразумела ж, хто гэта піша».
Іншыя параўналі са сваімі значна вышэйшымі жыроўкамі:
«53 квадраты па жыроўцы — 82 рублёў».
«У мяне двушка, прапісана чатыры чалавекі, 128 рублёў толькі квітанцыя».
«Два чалавекі за трохпакаёўку прыйшло з ацяпленнем ужо 130 рублёў».
«У мяне гэтак жа, але 150 рублёў прыйшла жыроўка».
«Прыбраў — штраф. Не прыбраў — штраф». Людзі абураюцца загадамі наконт лісця
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»
З наступнага года засяляць у арэнднае жыллё будуць хутчэй, чым цяпер
23‑гадовы рэпер з Астраўца загінуў за Расію на вайне. Паваяваў ён, відаць, каля месяца17
Каментары