Больш за палову інфарктаў і інсультаў можна прадухіліць — навукоўцы
Вялікае даследаванне паказала, што пяць фактараў рызыкі абумоўліваюць развіццё кожнага другога захворвання сардэчна-сасудзістай сістэмы. Пытаннем застаецца, што ёсць прычынай другой паловы выпадкаў.
Міжнароднае даследаванне, праведзенае Універсітэцкай бальніцай Гамбург-Эпендорф і Цэнтрам інавацый у галіне аховы здароўя, паказала, што такіх сардэчна-сасудзістых захворванняў, як сардэчны прыступ, атэрасклероз або інсульт, можна было б пазбегнуць больш чым у паловы пацыентаў.
Вынікі даследавання апублікаваныя ў «Медыцынскім часопісе Новай Англіі».
Навукоўцы прааналізавалі даныя 112 кагортных даследаванняў, якія ахапілі 1,5 мільёна чалавек (54,1% — жанчыны) з сярэднім узростам 54,4 года з 34 краін.
Вынікі паказалі, што залішняя вага, гіпертанія, падвышаны ўзровень халестэрыну, курэнне і цукровы дыябет маюць прамую сувязь з больш чым паловай выпадкаў сардэчна-сасудзістых захворванняў.
Так, на працягу 10 гадоў яны абумовілі развіццё гэтага тыпу захворванняў у 57% мужчын і 53% жанчын. Смяротнасць у 10-гадовай перспектыве склала 22% сярод мужчын і 19% сярод жанчын.
Навукоўцы адзначаюць, што атрыманыя вынікі былі нечаканымі, так як да гэтага лічылася, што названыя пяць фактараў рызыкі абумоўліваюць 75% сардэчна-сасудзістых захворванняў. Новыя высновы асабліва важныя, бо сведчаць аб неабходнасці правядзення далейшых даследаванняў дзеля пошуку тлумачэння для другой паловы выпадкаў.
У кожным разе, як адзначаюць даследчыкі, атрыманыя вынікі сведчаць аб неабходнасці сур'ёзнага стаўлення да правядзення прафілактычных мерапрыемстваў.
Здаровы лад жыцця, а таксама кантроль і лячэнне названых фактараў рызыкі могуць прадухіліць развіццё такіх сардэчна-сасудзістых захворванняў, як атэрасклероз ці сардэчная недастатковасць.
Асабліва гэта датычыць карэкціроўкі высокага ціску, які ёсць распаўсюджанай прычынай сардэчных прыступаў і інсультаў.
Чытайце яшчэ:
«Ціхі забойца». Як абараніць сябе ад трамбозу
Цяпер чытаюць
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2323
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі23
«Час, які патрабуе надзвычайнай асцярожнасці». Польскі вундэркінд, які стаў галоўным навукоўцам OpenAI, патлумачыў, чаму менавіта зараз ШІ можа вырвацца з-пад кантролю88
Каментары