500 ракет Patriot Украіна можа пачаць атрымліваць ад ЗША толькі праз 4 гады
Украіна атрымае 500 ракет-перахопнікаў PAC-3 для зенітных ракетных комплексаў Patriot, магчымы продаж якіх Дзярждэпартамент ЗША ўхваліў 30 кастрычніка 2026 года, у перыяд з чацвёртага квартала 2030‑га да чацвёртага квартала 2033 года. Пра гэта выданню «Еўрапейская праўда» на ўмовах ананімнасці паведаміў прадстаўнік амерыканскага Дзярждэпартамента.
Такім чынам, першыя ракеты ў межах гэтай дамоўленасці Украіна зможа атрымаць не раней за чацвёрты квартал 2030 года.
У Дзярждэпартаменце патлумачылі, што заключыць пагадненне аб закупцы PAC-3 можна будзе пасля ўзгаднення здзелкі ў Кангрэсе ЗША. На разгляд адводзіцца 30 дзён. Пасля заканчэння гэтага тэрміну бакі змогуць падпісаць адпаведны Ліст-прапанову і прыняцце (Letter of Offer and Acceptance, LOA), які афармляе продаж амерыканскага ўзбраення замежным дзяржавам.
30 кастрычніка Дзярждэпартамент ЗША ўхваліў магчымую здзелку па продажы Украіне ракет PAC-3 для сістэм Patriot. Закупку плануюць фінансаваць міжнародныя партнёры, у тым ліку Канада, Германія і Нарвегія, праз амерыканскую праграму JUMPSTART. Таксама будуць выкарыстаныя нацыянальныя сродкі, прадугледжаныя ў межах 90‑мільярднага крэдыту Еўрасаюза для Украіны — Ukraine Support Loan.
Цяпер Украіна вядзе перамовы з партнёрамі, каб некаторыя краіны саступілі ёй сваю чаргу на закупку ракет PAC-3 у амерыканскай кампаніі Lockheed Martin. Гэта дазволіла б украінскай арміі атрымаць перахопнікі раней за вызначаныя тэрміны.
Акрамя таго, абмяркоўваецца магчымасць перадачы Украіне ракет з цяперашніх запасаў краін-саюзніц, найперш дзяржаў Еўрасаюза. Узамен гэтыя краіны маглі б атрымаць новыя ракеты пасля 2030 года.
Раней прэзідэнт Украіны Уладзімір Зяленскі заявіў, што ў 2026 годзе Украіна атрымлівае ў сярэднім толькі 12 ракет для сістэм Patriot у месяц.
У ЗША ўхвалілі продаж Украіне 500 ракет Patriot
Зяленскі: Украіна гатовая прыпыніць удары па расійскіх НПЗ, але ёсць умова
Расія ўдарыла па энергетыцы — тысячы сем’яў засталіся без святла
Кіеў аднавіў інтэнсіўныя ўдары па расійскіх НПЗ пасля таго, як Вашынгтон праігнараваў яго патрабаванні
Рубіа дапусціў, што ЗША затрымліваюць перадачу Украіне купленых Еўропай ракет-перахопнікаў
Каментары
Думаеш, пры дэмакратах будзе хутчэй?
Куды як наадварот, яны будуць скакаць паміж папулісцкімі абяцанкамі народу і патрэбамі дзяржавы, і гэта яшчэ далей адкладзецца. Рэспубліканцы звычайна адсыпаюць ВПК без усялякіх аўдытаў ды бюджэтных гульняў колькі папросяць.
Справа ў тым, што ЗША ня ў стане абслугоўваць УСІХ сваіх партнёраў - еўрапейскіх, азіяцкіх, арабскіх... І авіяцыйныя, і ракетныя, і любыя кантракты расцягваюцца з затрымкамі на гады. Бо амерыканская прамысловасць усё слабейшая, хутка будзе ледзьве патрэбы ўласнай арміі закрываць.
І Украіне трэба выпрасіць цэльныя чэргі кліентаў амерыканскіх кампаній, якія таксама чакаюць па 4-5 год.