У Мюнхене беларус, украінец і немец у масках і са зброяй абрабавалі мінака. Ужо праз восем хвілін іх арыштавалі
Трое мужчын у масках напалі на мінака, пагражаючы зброяй і электрашокерам, забралі ягоную паясную торбачку і з’ехалі. Але далёка ўцячы не паспелі. Сярод затрыманых — 23‑гадовы грамадзянін Беларусі.
У пятніцу, 16 кастрычніка, каля 23‑й гадзіны 23‑гадовы жыхар Мюнхена ішоў па тратуары ў раёне Максфорштат. Побач раптам спыніўся аўтамабіль. З яго выйшлі трое мужчын у масках і напалі на хлопца, паведамляе паліцыя.
Нападнікі пагражалі зброяй і электрашокерам, пасля чаго сарвалі з пацярпелага торбачку, селі назад у машыну і з’ехалі.
Напад бачылі некалькі сведкаў. Яны выклікалі паліцыю.
Ужо каля 23:08 паліцэйскія спынілі патрэбны аўтамабіль. Усе трое хлопцаў здаліся без супраціву.
У салоне знайшлі электрашокер, зброю, адзенне для маскіроўкі і торбачку пацярпелага. Рэчы канфіскавалі, машыну забралі на паліцэйскую стаянку.
У аўтамабілі знаходзіліся 23‑гадовы беларус, ягоны аднагодак — грамадзянін Германіі і 19‑гадовы ўкраінец.
Больш за тое, беларуса і ўкраінца паліцыя падазрае яшчэ і ў крадзяжы з ужываннем гвалту, які адбыўся 15 кастрычніка ў баварскім раёне Хасберге.
Усіх трох затрыманых змясцілі ў паліцэйскі ізалятар.
Каментары
Там iq меней за 100 сумарна на траіх.
Но что пошло не так?