Аўтар «Балады аб дыктатару» цяпер адпачывае ў Парыжы

Кампазітар Валер Шмат настолькі адданы Лукашэнку, што нават напісаў музыку для «Балады аб дыктатару». Прэзентавалі яе ў 2024 годзе. Падчас патрыятычнага форуму ў гонар Дня народнага адзінства арт-гурт «Беларусы» (яго заснаваў Шмат) зрабіў Лукашэнку сюрпрыз і праспявала таму баладу.

Там ёсць такія радкі: «Страна — его альма-матер с ароматом свежего хлеба. Улыбнется спокойно диктатор, глядя в родины мирное небо». 

Шмат — актыўны прыхільнік Лукашэнкі і перыядычна атрымоўвае ад рэжыму бонусы. Так, у 2014 годзе ён атрымаў медаль Францыска Скарыны, у 2019 — нагрудны знак «За ўнёсак у развіццё культуры Беларусі». Гурт «Беларусы» ўдзельнічае ў дзяржаўных мерапрыемствах. 

Але ж якраз цяпер Валер Шмат разам з жонкай Алесяй Кузняцовай (яна генеральная дырэктарка Музычнага прадзюсарскага цэнтра «Залатыя галасы») радуецца адпачынку ў тым самым Еўрасаюзе, дзе «не могуць трываць парадку».

Павялічыць

Некалькі дзён таму кампазітар у інстаграме пахваліўся, што яны былі ў Мілане і наведалі творчую сустрэчу ў знакамітым тэатры La Scala. Цяпер жа пара ў Парыжы — гуляе па Манмартры і глядзіць на Парыж з вышыні Сакрэ-Кёр.

Павялічыць

Але ж без прыгод не абышлося. У сталіцу Францыі сям'я ехала цягніком: «У Францыі мы ўпершыню, але задача быццам бы зразумелая: дабрацца да кватэры і засяліцца. І вось тут усё і пачалося. Піша гаспадыня: пасля папярэдняга госця ў кватэры патоп, і ўся кватэра залітая вадой. Не, басейн мы, вядома, абмяркоўвалі. Але ў Мінску, пасля падарожжа — і дакладна не ў забраніраваных апартаментах. Едзем, не ведаем, ці будзе ўвечары дзе пасяліцца, слухаем аб'явы на незнаёмай мове і супакойваем сябе: нам жа ўсё роўна выходзіць на канцавой станцыі. І раптам тон аб'яў мяняецца. Увесь вагон устае і пачынае выходзіць. А мы не разумеем ні слова». 

Беларусам дапамог незнаёмы хлопец, які па-англійску растлумачыў: далей цягнік не пойдзе — здарэнне з цягніком. Таму трэба выйсці ў нейкім гарадку, знайсці аўтобус, потым зноў зрабіць перасадку і дабрацца да Парыжа.

У першы аўтобус, зразумела, увесь цягнік не змог змясціцца. Але еўрапеец не кінуў беларускага кампазітара ў бядзе: «Крысціян, праграміст, які працуе ў Парыжы, праехаў з намі амаль увесь маршрут і правёў да цэнтра. Па дарозе растлумачыў, як працуе транспарт, дзе купляць білеты, правяраць платформы і чаму сумкі лепш трымаць перад сабой. Дзякуй, Крысціяне! Вельмі нечакана ў незнаёмым горадзе адразу сустрэць такую дапамогу».

Павялічыць

Пасля гэтага муж з жонкай знайшлі новае жыллё і пачалі атрымліваць асалоду ад адпачынку ў самым рамантычным горадзе свету.

Шмат піша, што Парыж вельмі прыгожы. А беларускія прапагандысты, напрыклад, вядучая АНТ Марына Караман ставяць лайкі.

• 0
• 0
• 0
• 6
• 0
• 0
• 3
• 0