Механіка-матэматычны факультэт БДУ паведаміў, што 14 кастрычніка памёр доктар фізіка-матэматычных навук, прафесара і шматгадовы загадчык кафедры дыферэнцыяльных ураўненняў Валерый Грамак. Яму было 76 гадоў.
Валерый Грамак. Фота: mmf.bsu.by
Валерый Грамак нарадзіўся 9 красавіка 1950 года ў гарадскім пасёлку Мір Карэліцкага раёна. У 1972 годзе скончыў факультэт прыкладной матэматыкі БДУ, а ў 1975 годзе — аспірантуру з датэрміновай абаронай кандыдацкай дысертацыі.
Працоўную дзейнасць пачаў асістэнтам, пазней стаў дацэнтам і прафесарам кафедры дыферэнцыяльных ураўненняў. У 1992 годзе абараніў доктарскую дысертацыю, а ў 1993 годзе ўзначаліў кафедру дыферэнцыяльных ураўненняў, якой кіраваў да 2021 года. Працаваў запрошаным лектарам у вядучых навуковых цэнтрах розных краін свету і ўдзельнічаў у міжнародных праектах.
Даследаванні Валерыя Грамака тычыліся аналітычнай тэорыі дыферэнцыяльных ураўненняў, тэорыі нелінейных хваль і салітонных ураўненняў. Узначальваў беларускую навуковую школу па аналітычнай тэорыі дыферэнцыяльных ураўненняў. Пад яго кіраўніцтвам было абаронена 6 кандыдацкіх і 2 доктарскія дысертацыі.
Валерый Грамак з'яўляўся адным з арганізатараў спецыяльнасці «Камп'ютарная матэматыка» і міжнародных матэматычных канферэнцый «Яругінскія чытанні».
Развітанне з навукоўцам адбудзецца 18 кастрычніка ў 12:00 па адрасе Кульман, 33А.
У мінскім гандлёвым цэнтры Palazzo сабралася даўжэзная чарга. Па дармовых мядзведзікаў!5
Каментары