Крыты рынак чырвоных дзяцей у парыжскім квартале Марэ існаваў з 1615 года і славіўся перадусім вулічнай ежай.
Сваю назву (даслоўна — «Рынак чырвоных дзяцей») ён атрымаў дзякуючы чырвонаму адзенню, якое насілі сіроты з прытулку, што знаходзіўся непадалёк да 1772 года. Гэты рынак, вядомы сваёй вулічнай ежай, неаднаразова ўключалі ў дзясятку найлепшых у свеце, піша Бі-бі-сі.
Паводле паведамленняў французскіх СМІ, узгаранне пачалося каля трох гадзін ночы. Праз некалькі гадзін пажарныя ўсё яшчэ пралівалі вадой тлеючыя руіны. Прычына пажару пакуль не высветленая.
— Калі мы прыбылі, пажар ужо разгарэўся на поўную сілу: высокія языкі полымя ахапілі ўсю ўнутраную прастору крытага рынку, — паведаміў журналістам прадстаўнік пажарнай службы П'ер дэ Був'е.
Паводле яго слоў, «агонь знішчыў 1000 квадратных метраў».
«Рынак цалкам разбураны — ад яго і металічнай канструкцыі нічога не засталося. Галоўнай задачай ратавальнікаў было не дапусціць распаўсюджвання агню «на жылыя дамы і крамы, размешчаныя над рынкам», удакладніў пажарны.
Мэр цэнтральнага сектара Парыжа Арыэль Вейль, які прыбыў на месца здарэння раніцай, заявіў выданню Le Parisien: «Цяпер сёмая раніцы, пачынаюць падыходзіць людзі і гандляры: рынак Анфан-Руж знішчаны, ён згарэў дашчэнту».
«На шчасце, пажарныя прыбылі вельмі хутка, задзейнічаўшы шмат адзінак тэхнікі, да таго ж яны добра ведалі мясцовасць», — дадаў ён і адзначыў, што «найгоршага ўдалося пазбегнуць», бо агонь мог перакінуцца і на суседнія дамы.
Каментары