Французская дзяржаўная энергетычная кампанія EDF была вымушаная часова спыніць працу некалькіх атамных рэактараў праз беспрэцэдэнтную спёку, якая ахапіла Францыю і іншыя краіны Заходняй Еўропы. Прычынай сталі не тэхнічныя праблемы, а экалагічныя патрабаванні па абароне рачных экасістэм, піша Euronews.
Спыненыя рэактары знаходзяцца на атамных электрастанцыях Нажан-сюр-Сен на рацэ Сена і Бюжэ на рацэ Рона. Атамныя станцыі выкарыстоўваюць рачную ваду для ахалоджвання рэактараў, пасля чаго вяртаюць яе назад у раку. Аднак падчас моцнай спёкі тэмпература вады ў рэках ужо вельмі высокая, і дадатковае награванне можа нанесці шкоду рыбам, водным раслінам і іншым жывым арганізмам. Таму заканадаўства абавязвае аператараў абмяжоўваць або спыняць працу рэактараў у такіх умовах.
Яшчэ адзін рэактар быў спынены на станцыі Гальфеш на рацэ Гарона, а на некалькіх іншых АЭС магутнасць была зніжаная. Пры гэтым атамная энергетыка забяспечвае каля 70 працэнтаў усёй выпрацоўкі электраэнергіі ў Францыі.
Нягледзячы на абмежаванні, французскі аператар электрасетак заявіў, што краіна пакуль мае дастатковыя рэзервы для задавальнення попыту на электраэнергію.
Спёка ў Францыі ўжо прывяла да чалавечых ахвяр. Паводле афіцыйных даных, пацверджана не менш за 18 смерцяў, звязаных з высокімі тэмпературамі. Акрамя таго, з сярэдзіны чэрвеня патанулі не менш за 40 чалавек, многія з якіх спрабавалі выратавацца ад спёкі каля вадаёмаў.
У больш чым палове французскіх дэпартаментаў быў абвешчаны найвышэйшы ўзровень метэаралагічнай небяспекі. Улады заклікаюць людзей пазбягаць знаходжання на сонцы і быць асабліва асцярожнымі.
Экстрэмальнае надвор'е закранула не толькі Францыю. Высокія тэмпературы назіраюцца таксама ў Германіі, Іспаніі, Партугаліі і Швейцарыі. У шэрагу рэгіёнаў закрываюцца школы, скарачаецца рух цягнікоў, а энергасістэмы працуюць пад павышанай нагрузкай.
Сіноптыкі папярэджваюць, што ў асобных раёнах Міжземнамор'я тэмпература паветра можа дасягнуць 43 градусаў цяпла. Навукоўцы адзначаюць, што хвалі экстрэмальнай спёкі ў Еўропе становяцца ўсё больш працяглымі. Паводле апошніх даследаванняў, у некаторых рэгіёнах такія перыяды цяпер доўжацца на 40 дзён больш за год, чым гэта было ў 1970‑х гадах.
Каментары
Несмотря на сильную жару в Центральной Европе, с начала 2026 года глобальная температурная аномалия остаётся стабильной около +0,7 °C выше уровня 1981–2010.