Francuzskaja dziaržaŭnaja enierhietyčnaja kampanija EDF była vymušanaja časova spynić pracu niekalkich atamnych reaktaraŭ praź biesprecedentnuju śpioku, jakaja achapiła Francyju i inšyja krainy Zachodniaj Jeŭropy. Pryčynaj stali nie techničnyja prablemy, a ekałahičnyja patrabavańni pa abaronie račnych ekasistem, piša Euronews.
Spynienyja reaktary znachodziacca na atamnych elektrastancyjach Nažan-siur-Sien na race Siena i Biuže na race Rona. Atamnyja stancyi vykarystoŭvajuć račnuju vadu dla achałodžvańnia reaktaraŭ, paśla čaho viartajuć jaje nazad u raku. Adnak padčas mocnaj śpioki tempieratura vady ŭ rekach užo vielmi vysokaja, i dadatkovaje nahravańnie moža nanieści škodu rybam, vodnym raślinam i inšym žyvym arhanizmam. Tamu zakanadaŭstva abaviazvaje apierataraŭ abmiažoŭvać abo spyniać pracu reaktaraŭ u takich umovach.
Jašče adzin reaktar byŭ spynieny na stancyi Halfieš na race Harona, a na niekalkich inšych AES mahutnaść była źnižanaja. Pry hetym atamnaja enierhietyka zabiaśpiečvaje kala 70 pracentaŭ usioj vypracoŭki elektraenierhii ŭ Francyi.
Niahledziačy na abmiežavańni, francuzski apieratar elektrasietak zajaviŭ, što kraina pakul maje dastatkovyja reziervy dla zadavalnieńnia popytu na elektraenierhiju.
Śpioka ŭ Francyi ŭžo pryviała da čałaviečych achviar. Pavodle aficyjnych danych, paćvierdžana nie mienš za 18 śmierciaŭ, źviazanych z vysokimi tempieraturami. Akramia taho, ź siaredziny červienia patanuli nie mienš za 40 čałaviek, mnohija ź jakich sprabavali vyratavacca ad śpioki kala vadajomaŭ.
U bolš čym pałovie francuzskich departamientaŭ byŭ abvieščany najvyšejšy ŭzrovień mietearałahičnaj niebiaśpieki. Ułady zaklikajuć ludziej paźbiahać znachodžańnia na soncy i być asabliva aściarožnymi.
Ekstremalnaje nadvorje zakranuła nie tolki Francyju. Vysokija tempieratury nazirajucca taksama ŭ Hiermanii, Ispanii, Partuhalii i Šviejcaryi. U šerahu rehijonaŭ zakryvajucca škoły, skaračajecca ruch ciahnikoŭ, a enierhasistemy pracujuć pad pavyšanaj nahruzkaj.
Sinoptyki papiaredžvajuć, što ŭ asobnych rajonach Mižziemnamorja tempieratura pavietra moža dasiahnuć 43 hradusaŭ ciapła. Navukoŭcy adznačajuć, što chvali ekstremalnaj śpioki ŭ Jeŭropie stanoviacca ŭsio bolš praciahłymi. Pavodle apošnich daśledavańniaŭ, u niekatorych rehijonach takija pieryjady ciapier doŭžacca na 40 dzion bolš za hod, čym heta było ŭ 1970‑ch hadach.
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha16
Kamientary
Niesmotria na silnuju žaru v Cientralnoj Jevropie, s načała 2026 hoda hłobalnaja tiempieraturnaja anomalija ostajotsia stabilnoj około +0,7 °C vyšie urovnia 1981–2010.