«Сіл няма, рэсурсаў няма, усе стаміліся». Лукашэнка заявіў, што вайна ва Украіне ў найбліжэйшыя месяцы будзе скончаная
Лукашэнка не раз прадказваў хуткае заканчэнне вайны ва Украіне, але гэтым разам аргументацыя змянілася.
Аляксандр Лукашэнка мяркуе, што ў бліжэйшыя месяцы вайна ва Украіне будзе завершана. Пра гэта ён заявіў на IV Мінскай міжнароднай канферэнцыі па еўразійскай бяспецы, піша БелТА.
«Павінен сказаць, што вайна ва Украіне ў бліжэйшыя месяцы будзе скончана. Гэта маё асабістае меркаванне. Усё: сілаў няма і рэсурсаў няма, стаміліся ўсе, — заявіў Лукашэнка. — Калі я кажу пра рэсурсы, гэта не значыць, што бракуе дзесьці нейкіх рэсурсаў. У Расіі іх, дай бог, на ўвесь свет хопіць. Я не пра гэтыя рэсурсы. Рэсурсаў няма ў галовах ужо. Усе стаміліся ад гэтай вайны».
Лукашэнка не раз прадказваў хуткае заканчэнне вайны ва Украіне. Яшчэ 6 лютага 2022 года, да пачатку поўнамаштабнага ўварвання, ён заяўляў, што вайна з Украінай, калі і пачнецца, то працягнецца «максімум тры-чатыры дні», бо «там не будзе каму супраць нас ваяваць».
Пасля ён зноў і зноў запэўніваў, што вайна хутка скончыцца, у розных варыянтах прагназуючы канец вайны.
Праўда, раней ён заклікаў Украіну капітуляваць, прадракаючы, што далей умовы для капітуляцыі будуць горшыя.
24 лістапада 2025 года Лукашэнка нават назваў вайну цягамоцінай: «Скончым гэтую цягамоціну, я думаю, найбліжэйшым часам ва Украіне, і зоймемся сваімі ўнутранымі справамі».
16 кастрычніка 2026‑га ён прагназаваў мір «калі не сёлета, то ў наступным годзе».
Цяпер ён назваў чарговы тэрмін — «у найбліжэйшыя месяцы».
Заўважна, што аргументацыя ў яго стала зусім іншай — вайна скончыцца, бо ўжо «сіл няма, рэсурсаў няма, усе стаміліся».
Хто такая Алеся Пархоменка з Кіпра, якая развязала беларуска-беларускую вайну88
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары
[Зрэдагавана]