Няма гуманітарнага калідора для эвакуацыі з Газы ў бок Егіпта, таму пакуль не ўдаецца вывезці адтуль беларускіх грамадзян. Амбасадар Беларусі ў Ізраілі Яўген Вараб'ёў дадаў, што для арганізацыі гэтага зроблена ўсё, што ў сілах дыпламатаў.
«Думаю, што гэтая праца ўвянчаецца поспехам», — прыводзіць яго словы БелТА.
Вараб'ёў паведаміў, што на гэты момант вядома аб трох загінулых грамадзянах Беларусі, двое з якіх загінулі на поўдні Ізраіля ў першыя дні канфлікту. Яшчэ адна беларуская грамадзянка была цяжка параненая ў выніку прамога трапляння ракеты ў жылы дом. Тыдзень таму яна памерла ў бальніцы. Яе цела пры садзейнічанні пасольства было дастаўлена ў Беларусь для пахавання.
Таксама вядома пра гібель трох выхадцаў з Беларусі, якія былі грамадзянамі Ізраіля і даўно жылі на яго тэрыторыі.
Раней было вядома пра гібелі 25-гадовай Алены Астапенка, якая нарадзілася ў Рэчыцы і працавала ў паліцыі, а таксама следчага Віталя Карасіка, які паходзіў з Магілёва.
Міжнародны аэрапорт Ізраіля працягвае працаваць, і кошт квіткоў ужо паменшаў, адзначыў пасол.
У дыпмісіі таксама вядуць улік усіх грамадзян на выпадак з'яўлення больш зручнага і хуткага варыянта вярнуцца ў Беларусь. Яўген Вараб'ёў адзначыў, што, нягледзячы на атрыманы дазвол ізраільскага боку, санкцыі не даюць «Белавіі» рэалізаваць прамы рэйс з Ізраіля ў Беларусь.
Цяпер чытаюць
Юліяна Шаметавец з «Кіберпартызанаў» стала маці — расказвае пра дэкрэтны адпачынак у ЗША і тое, ці сапраўды можна сумяшчаць працу з мацярынствам5
Каментары