Чалавек гадамі ходзіць па брытанскіх судах і патрабуе беларускага перакладчыка, хоць сам піша па-англійску

Высокі суд Англіі адмовіў жыхару Лондана Серджыа Графту (Sergio Graft) адразу ў трох скаргах. У судовых пасяджэннях ён удзельнічаць не хоча, пакуль яму не дадуць перакладчыка з беларускай мовы, які б яшчэ і валодаў «усходнім дыялектам». Пры гэтым суддзі адзначаюць, што па-англійску ён піша свабодна.

22 верасня 2026 года суддзя Высокага суда Хэзер Уільямс разгледзела тры заявы Графта на судовы перагляд (judicial review). Адна датычыла рашэння акруговага суда Уілздэна, дзве — раёна Хамерсміт і Фулем. Графт прыйшоў у Каралеўскія суды на вуліцы Стрэнд, але ў залу не зайшоў. Супрацоўніку суда ён перадаў «паведамленне суду». У ім ён піша, што не можа ўдзельнічаць у працэсе, бо яму «незаконна адмовілі» ў «абавязковых разумных прыстасаваннях»: у пасрэдніку з дзяржаўнай праграмы Мінюста і ў беларускім перакладчыку.

Гэта ўжо трэці раз, калі Графт прыходзіць у будынак суда і адмаўляецца зайсці ў залу. Тое ж самае было ў ліпені 2025 года ў акруговым судзе Уілздэна і ў жніўні 2026 года ў Высокім судзе.

Суддзі сумняваюцца, што Графту патрэбны перакладчык. Яшчэ ў жніўні суддзя Эндру Кініер пісаў, што паводле дакументаў Графт мае «добры, нават свабодны» ўзровень англійскай. Ён даў Графту «апошні шанец» даказаць, навошта яму перакладчык і пасрэднік, і папярэдзіў: «простых сцверджанняў будзе недастаткова».

Графт і сам прызнаў, што складае дакументы і вядзе перапіску па-англійску. Аднак, на ягоную думку, удзел у вусных слуханнях — «асобнае пытанне». Перакладчык, піша ён, павінен сядзець побач з ім, бо ў яго дрэнны слых. Суддзя Уільямс адзначыла, што ніякіх медычных доказаў праблем са слыхам Графт суду не даў. Ён таксама ні разу не прасіў нічога звязанага са слыхам, напрыклад індукцыйную пятлю.

Суддзя дадала, што Графт «выразна выклаў сваю пазіцыю» прынамсі ў чатырох пісьмовых аргументах. Аднойчы ён даслаў у суд ліст на 105 пунктаў. Яна таксама заўважыла, што ў адной са скаргаў Графт спасылаўся на чатыры судовыя справы, і тры з іх знайсці не ўдалося.

Суддзя дапусціла, што гэта можа быць вынік «галюцынацый» штучнага інтэлекту, але не мела магчымасці спытаць пра гэта ў Графта.

Суд гатовы быў дапамагаць Графту іначай: даць яму больш часу на адказы, рабіць перапынкі, гаварыць павольна. Пра гэта суддзя загадзя напісала ў сваёй пастанове. Але ў залу Графт так і не зайшоў.

У Лондане Графт жыве даўно. З 2016 года ён здымае кватэру ў жыллёвай арганізацыі Peabody у Фулеме. У маі 2025 года раён забараніў у ёй жыць праз сырасць і цвіль. Peabody хоча зрабіць рамонт і прапануе Графту часова перасяліцца. Паводле Peabody і раёна, ён не пускае рабочых і ад перасялення адмаўляецца. Графт гэта аспрэчвае, і цяпер спрэчку разглядае магістрацкі суд. Сам Графт патрабуе, каб яго перавялі ў першую чаргу на жыллё. Высокі суд прызнаў ягоныя скаргі неабгрунтаванымі. Адзін з іскаў, акрамя таго, суд адхіліў па працэдурнай прычыне: Графт не даставіў яго адказчыку, бо думаў, што гэта абавязак суда.

Яшчэ адна гісторыя — іск да ўласнай паліклінікі за медычную нядбайнасць. Гэты іск адхілілі яшчэ ў 2022 годзе. З таго часу Графт падаў прынамсі сем заяў, каб справу аднавілі, а таксама звязаныя з ёй заявы. Паліклініка просіць прызнаць іх цалкам беспадстаўнымі і мае намер дамагацца, каб Графту забаранілі падаваць новыя заявы.

Пра сябе Графт піша, што мае інваліднасць. Тая самая паліклініка North End Medical Centre у лістах 2017—2024 гадоў сведчыць, што ён пакутуе на «хранічныя праблемы з псіхічным здароўем, уключаючы посттраўматычнае стрэсавае расстройства і псіхозы», і таму не можа працаваць. Паводле ліста 2018 года, ПТСР яму дыягнаставалі ў 2002 годзе, шызафрэнічныя расстройствы — у 2009-м, расстройства асобы — у 2014-м.

Ці беларус Графт, з судовых дакументаў не вынікае: пра грамадзянства і паходжанне там нічога няма.

• 0
• 0
• 0
• 0
• 1
• 0
• 0
• 0