На выбарах у Босніі і Герцагавіне зберагла ўплыў прарасійская партыя Додзіка
На выбарах у Босніі і Герцагавіне захавала значны ўплыў партыя прарасійскага палітыка Міларада Додзіка. Ягоная саюзніца Жэлька Цвіянавіч атрымала месца ў калегіяльным прэзідэнцтве краіны, паведамляе The Guardian.
На выбарах грамадзяне Босніі і Герцагавіны выбіралі трох членаў шматнацыянальнага прэзідэнцтва, дэпутатаў нацыянальнага парламента, а таксама кіраўнікоў органаў улады дзвюх складовых частак краіны — пераважна мусульманскай і харвацкай Федэрацыі Босніі і Герцагавіны і Рэспублікі Сербскай, дзе большасць насельніцтва складаюць этнічныя сербы.
Пасля падліку больш як 94% галасоў у барацьбе за месца, прызначанае для харватаў, лідзіравала Дарыяна Філіпавіч з нацыяналістычнага Харвацкага дэмакратычнага саюза Босніі і Герцагавіны. Месца для баснійцаў-мусульман захоўваў дзейны член прэзідэнцтва Дзяніс Бечыравіч з Сацыял-дэмакратычнай партыі.
Тым часам паплечніца Додзіка Жэлька Цвіянавіч з правай партыі «Альянс незалежных сацыял-дэмакратаў» атрымала больш за 55% галасоў. Яна перамагла найбліжэйшага суперніка прыкладна на 30 працэнтных пунктаў і атрымала трэцяе месца ў калегіяльным прэзідэнцтве краіны.
Сам Міларад Додзік у выбарах не ўдзельнічаў пасля леташняга судовага рашэння, якое забараніла яму балатавацца і займаць пасаду прэзідэнта Рэспублікі Сербскай. Аднак ён заставаўся адной з цэнтральных фігур выбарчай кампаніі. Напярэдадні галасавання Додзік таксама заявіў, што ягоная нацыяналістычная партыя атрымае «пераважную большасць» у парламенце Рэспублікі Сербскай.
Сваю перамогу Додзік звязаў з абраннем Дональда Трампа прэзідэнтам ЗША ў 2024 годзе і падтрымкай з боку прэзідэнта Расіі Уладзіміра Пуціна. Паводле яго слоў, Трамп пасля прыходу да ўлады «адхіліў ненавісныя структуры Байдэна». Додзік заявіў, што ягоныя палітычныя сілы не збіраюцца змяняць свой курс і будуць працягваць змагацца за свае інтарэсы.
Цэнтральная выбарчая камісія Босніі паведаміла, што ўсяго было пададзена 1 432 269 галасоў. Яўка склала 42%, што прыкладна на 8 працэнтных пунктаў менш, чым на папярэдніх выбарах у 2022 годзе.
Рэспубліка Сербская была створаная ў 1992 годзе як самаабвешчаная дзяржава пасля таго, як Боснія і Герцагавіна пачала працэс выхаду са складу Югаславіі. У 1995 годзе паводле Дэйтанскіх пагадненняў Рэспубліка Сербская стала часткай Босніі і Герцагавіны.
Додзік ужо неаднаразова дэманстраваў сваю падтрымку расійскаму кіраўніцтву. У 2023 годзе ён узнагародзіў Уладзіміра Пуціна ордэнам у межах святкавання 9 студзеня як Дня Рэспублікі Сербскай.
Цяпер чытаюць
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу7
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары