МЗКЦ паставіць расійскай абароннай кампаніі шасі для ракетных комплексаў
Мінскі завод колавых цягачоў заключыў кантракт з маскоўскай кампаніяй «Абарончыя сістэмы». Расійскі заказчык павінен атрымаць 30 спецыяльных аўтамабільных платформаў, на якіх можна размяшчаць зенітныя ракеты, радары і камандныя пункты. Пастаўкі разлічаныя да 2029 года.
Аб’яднанне былых сілавікоў BELPOL атрымала дакументы пра новы кантракт паміж Мінскім заводам колавых цягачоў і расійскім прадпрыемствам «Абарончыя сістэмы», якое працуе ў абароннай прамысловасці.
Паводле апублікаваных звестак, МЗКЦ павінен паставіць расійскай кампаніі 30 шасі:
- 20 адзінак МЗКЦ-8021-021;
- пяць МЗКЦ-8022-021;
- пяць МЗКЦ-80211-021.
Шасі — гэта спецыяльная цяжкая машына без усталяванага баявога абсталявання. На такую платформу заказчык можа паставіць ракетную ўстаноўку, радыёлакацыйную станцыю, пункт кіравання або іншае вайсковае абсталяванне.
На сайце самога вытворцы пазначана, што шасі сямейства 8021 выкарыстоўваюцца для размяшчэння пускавых установак, радараў і камандных пунктаў зенітна-ракетнага комплексу «Пячора-2М». Гэта мадэрнізаваная версія савецкай сістэмы С-125, прызначанай для знішчэння самалётаў, крылатых ракет і іншых паветраных цэляў.
BELPOL звяртае ўвагу на тэрмін кантракта. Пастаўкі да 2029 года азначаюць, што гаворка ідзе не пра разавую партыю, а пра супрацоўніцтва, разлічанае на некалькі гадоў.
МЗКЦ знаходзіцца пад санкцыямі Еўрасаюза, ЗША, Вялікабрытаніі, Канады, Украіны і шэрагу іншых краін. Абмежаванні ўводзіліся ў тым ліку праз супрацоўніцтва прадпрыемства з расійскім вайскова-прамысловым комплексам і выкарыстанне беларускіх шасі ў ракетных сістэмах.
Цяпер чытаюць
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1010
Каментары
такія шасі ніхто больш не ўмее рабіць. памятаеце як маскалі ціснулі на сіпатага і хацелі выкупіць мзкц? незгібаемы вытрымаў. маскалі распрацавалі на камазе платформу 0. І яна не паехала. Праект закінулі.
Таму маскалі заўсёды куплялі і будуць купляць.