І галоўны трэнер гатовы да вяртання.
Крышціяну Раналду яшчэ згуляе за зборную Партугаліі — гісторыя не скончаная. Форвард вельмі хоча забіць свой 1000‑ы гол менавіта ў нацыянальнай камандзе. І трэнер гатовы да вяртання Крышціяну, піша sports.ru.
Партугалія без Раналду абыграла Нарвегію з лікам 2:1 і ўжо выйшла ў плэй-оф Лігі нацый. На пасляматчавай прэс-канферэнцыі Жоржэ Жэзуш яшчэ раз пракаментаваў сітуацыю з Крышціяну. Здаецца, яму ўдалося крыху згладзіць канфлікт:
«Для мяне ўсё дагэтуль адкрыта. Крышціяну сам павінен вырашыць, што ён хоча рабіць са сваім жыццём. Усё, што адбылося, — велізарнае непаразуменне, і мне здаецца, што гэтую сітуацыю лёгка вырашыць. Калі ён захоча выступаць за зборную, то можа вярнуцца, калі пажадае. Чаму не? У мяне няма ніякіх дрэнных пачуццяў да Крышціяну. Усё гэта лёгка вырашыць. Я не сумую. Вырашае толькі ён. Калі гэта будзе вырашана? Я гэтага не ведаю, паглядзім. Мы толькі што скончылі гэты матч».
КР пакінуў нацыянальную зборную некалькі дзён таму, калі не трапіў у заяўку на матч супраць Даніі. Футбаліст тады з'ехаў з Капенгагена і намякнуў пра завяршэнне кар'еры ў зборнай, у якой ён дэбютаваў 23 гады таму і за гэты час забіў 146 галоў.
Але да ўчорашняга матча з'явілася падрабязная інсайдарская інфармацыя ад партугальскага журналіста Мігела Перэйры. Паводле яго слоў, зборная і Раналду аднаўляюць кантакт пасля канфлікту.
«Справа ў тым, што яму трэба забіць яшчэ 21 гол, каб дасягнуць адзнакі ў 1000 галоў. Ён вельмі хацеў забіць свой апошні гол за Партугалію. Ён разлічваў лёгка забіць 15—20 галоў за сезон у складзе «Аль-Насра», але насамрэч ён хацеў зладзіць свята, якое праславіла б яго самога, яго эга, яго гісторыю ў зборнай. І я ўсё яшчэ думаю, што гэта адбудзецца, нягледзячы на ўсё, што мы бачылі. Партугальская федэрацыя вельмі зацікаўленая ў Крышціяну з-за шуміхі, якую ён прыцягвае. Я думаю, што Крышціяну вернецца для апошняга танца ў канцы года».
Трохі інсайду іншага характару, але таксама цікавага, апублікавала L'Équipe. Паводле іх інфармацыі, партугальская федэрацыя сапраўды вядзе перамовы аб вяртанні Раналду ў каманду — але толькі на адзін матч. Крышціяну хочуць праводзіць годна.
Наступныя два матчы Партугалія ў Лізе нацый згуляе ў лістападзе: супраць Даніі і Уэльса.
Большасць партугальцаў у канфлікце падтрымлівае трэнера Жэзуша — CNN ужо правёў апытанне: 42% рэспандэнтаў выступілі за Жоржэ, і толькі 14% падтрымалі Крышціяну. Але вяртання Раналду ў зборную ўсё роўна чакаюць многія.
Гулец зборнай Бруну Фернандэш пагаварыў з Раналду пасля канфлікту: «Я ведаю, што ён значыць для нас, партугальцаў. Спадзяюся, што ён не будзе прымаць рашэнне з гарачкі і не пакіне зборную назаўсёды. Калі ён захоча гэта зрабіць, то гэта павінна адбыцца святочна, а не так, як атрымалася цяпер.
Ён гэтага заслугоўвае — ён найвялікшы сімвал нашага футбола і нашай краіны, чалавек, які вывеў Партугалію на такі ўзровень, якога яна ніколі раней не дасягала, пры ўсёй павазе да Эйсебіу і Луішу Фігу».
Тым часам паслязаўтра павінен адбыцца развітальны матч са зборнай Ліянеля Месі. У Буэнас-Айрэсе Аргенціна ў таварыскім матчы прыме Бенін.
Цяпер чытаюць
Музыка, маляванне і танцы ў школах і гімназіях — усё? Што вядома пра скарачэнні настаўнікаў-эстэтыстаў3
Музыка, маляванне і танцы ў школах і гімназіях — усё? Што вядома пра скарачэнні настаўнікаў-эстэтыстаў
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары