Pieršy biełaruski pašpart z «Pahoniaj» atrymaŭ Łukašenka, a druhi — školnik Juryj Čarniak. Jak skłaŭsia los chłopca?
Paśla zdabyćcia niezaležnaści ŭ Biełarusi niekalki hadoŭ praciahvali vydavać savieckija pašparty ŭzoru 1974 hoda. I tolki ŭ 1994-m, užo pry Łukašenku, nadrukavali novyja pašparty, z «Pahoniaj». Ich uračysta vydavaŭ ministr unutranych spraŭ Juryj Zacharanka.
Pra takuju značnuju padzieju, jak vydača pieršych pašpartoŭ niezaležnaj Biełarusi, pisali ŭ ŚMI. Pašancavała tady vučniam minskaj škoły № 37.
Zachavałasia natatka pra toje, što pierad pačatkam novaha navučalnaha hoda ŭručać dakumienty dzieciam tudy pryjechaŭ ministr unutranych spraŭ Juryj Zacharanka. Pašpart pad numaram 2 (pieršy, viadoma, atrymaŭ Alaksandr Łukašenka, jak prezident) atrymaŭ Juryj Čarniak. Pra chłopca, jaki ščaśliva paśmichaŭsia na fota, paviedamlałasia tolki toje, što jon vydatnik.
Jak ža skłałasia jaho žyćcio?
Juryj pajšoŭ u navuku. Skončyŭ fakultet fiłasofii i sacyjalnych navuk BDU pa śpiecyjalnaści «Sacyjałohija» — byŭ adnym z najlepšych vypusknikoŭ. Potym pajšoŭ vykładać svoj pradmiet u BDU. Taksama niejki čas kiravaŭ studenckaj navukova-daśledčaj łabaratoryjaj «Socyum».
U 2007 hodzie abaraniŭ kandydackuju dysiertacyju pa temie «Sacyjalnyja ryzyki moładzi Respubliki Biełaruś: sacyjałahičny analiz».
U 2015 hodzie prajšoŭ pierapadrychtoŭku ŭ Respublikanskim instytucie vyšejšaj škoły pa śpiecyjalnaści «Infarmacyjna-ideałahičnaja i vychavaŭčaja rabota va ŭstanovach adukacyi».
Praz dva hady Juryja ŭznaharodzili dypłomam BDU za pieramohu ŭ konkursie na najlepšaha kiraŭnika i arhanizatara navukova-daśledčaj raboty studentaŭ i aśpirantaŭ.
U 2018 hodzie jon pierajšoŭ u Instytut sacyjałohii Akademii navuk, staŭ namieśnikam dyrektara pa navukovaj pracy.
Jon daśledavaŭ samyja roznyja pytańni. Naprykład, sacyjalnyja ryzyki moładzi, dyskryminacyju asobnych sacyjalnych hrup u Biełarusi, fienomien patryjatyzmu ŭ masavaj śviadomaści biełarusaŭ.
U svoj čas Čarniak pracavaŭ i ŭ pryvatnym BIPie — Univiersitecie prava i sacyjalna-infarmacyjnych technałohij, byŭ namieśnikam dekana ekanomika-pravavoha fakulteta.
U 2024 hodzie Juryj raptoŭna pamior. Było jamu tady ŭsiaho 46 hadoŭ.
Ciapier čytajuć
Ułady Hrodna paviedamili pra vychad z ładu liŭnioŭki pad udaram stychii1
Kamientary
nie doŭha ž ja ciešyłasia... amal adrazu źmianili simvoliku. treba było pašpart z kapustaj pałučać. a ja z Pahoniaj rasstacca nie mahu... dumaju "zhubić" ci što? ale pakolki ŭsio-taki zakonapasłuchmiany hramadzianin, adskanavała i razdrukavała