Biełaruski mańjak siadzić u Rasii i prydumlaje sabie novyja kryminalnyja spravy, kab nie viartacca ŭ turmu, dzie jaho katujuć

Hramadzianin Biełarusi Aleh Sałtrukovič, jakomu siadzieć u rasijskaj turmie da 2031 hoda, šukaje ŭsie mahčymyja jurydyčnyja začepki, kab jak maha daŭžej zatrymacca pad śledstvam — jon piša pahrozy sudździam i prakuroram, a paśla prosić, kab jaho abaviazkova za heta pakarali.

U Rasii Sałtrukoviča viedajuć jak «sierpuchaŭskaha mańjaka» — u 2007 hodzie ŭradženiec Bresta trymaŭ u strachu Padmaskoŭje. Na jaho rachunku sieryja z 13 złačynstvaŭ suprać žančyn — zabojstva sierpuchaŭčanki Aleny Azaravaj, razbojnyja napadzieńni z nažom i pnieŭmatyčnym pistaletam, u tym liku na maci ź dziećmi.

Kryminalny bekhraŭnd u Sałtrukoviča byŭ i ŭ Biełarusi — niešta za kradziož i alimienty, ale abmiežavaŭsia ŭmoŭnym terminam. Jašče niekalki vypadkaŭ da suda nie dajšło — rabavańnie z zamacham na zabojstva dziaŭčyny, a taksama sproba zhvałcić inšuju dziaŭčynu. Na toj momant Sałtrukovič užo siadzieŭ u Rasii, tamu ŭ Biełarusi skončylisia terminy daŭniny.

Pavialičyć

Kali mańjaka złavili ŭ Rasii, jon sprabavaŭ prykinucca chvorym — raskazvaŭ, što słužyć u francuzskim Zamiežnym lehijonie. Jamu navat častkova pavieryli — spačatku nakiravali na prymusovaje lačeńnie, adnak paŭtornaja ekśpiertyza vyjaviła, što Sałtrukovič zdarovy, prosta prykidvajecca.

U vyniku Sałtrukoviču dali kala 20 hadoŭ źniavoleńnia i adpravili ŭ kałoniju. Tam jon atrymlivaŭ novyja kryminalnyja spravy i novyja terminy — za toje, što biŭ supracoŭnikaŭ. Da artykułaŭ dadalisia «dezarhanizacyja dziejnaści papraŭčaj ustanovy» i «zamach na hvałtoŭnyja dziejańni seksualnaha charaktaru».

Mierkavanaja data vyzvaleńnia — 2031 hod, ale da jaho treba jašče dažyć. Sałtrukoviču za kratami vidavočna niasoładka, jon zajaŭlaŭ pra katavańni.

Tamu biełarus prydumaŭ šmatchadoŭku — atrymać novyja lohkija kryminalnyja spravy, jakija nie pavialičać ahulny termin, ale dapamohuć jamu vyrvacca z kałonii. Na čas śledstva čałavieka pavinny vyvozić u SIZA, i jon chacieŭ hetym skarystacca napoŭnicu.

Pavialičyć

U 2021 hodzie Sałtrukovič, jaki adbyvaŭ pakarańnie ŭ Archanhielskaj vobłaści, nakiravaŭ z kałonii dva listy z pahrozami. Pieršy — sudździ Paŭdniovaha akruhovaha vajskovaha suda ŭ Rastovie-na-Donie: Sałtrukovič pahražaŭ zabojstvam i škodaj zdaroŭju, kali toj nie admienić prysud jaho znajomamu. Druhi list z anałahičnymi pahrozami jon dasłaŭ na pracu pamočnicy prakurora Pryvołžskaha rajona Kazani.

Śledčyja ŭ Kazani ciahnuli da apošniaha, ale ŭ vyniku ŭsio ž byli vymušanyja zavieści kryminalnyja spravy. Adnak zrabili tak, kab kali sprava dajšła da suda, to z momantu «pahroz» prajšło bolš za dva hady. A značyć, sud prosta spynić pieraśled za terminam daŭnaści.

Zvyčajny čałaviek na hetym by supakoiŭsia. Ale Sałtrukovič padaŭ apielacyju, patrabujučy spynieńnie spravy admianić i viarnuć jaje na novy razhlad.

U skarzie Sałtrukovič sam rastłumačyŭ, navošta pisaŭ listy: frazy i cełyja skazy jon uziaŭ z knihi Barysa Siadova «Bieź lubovi», a sapraŭdnaj metaj było damahčysia, kab suprać jaho zaviali spravu i pieraviali ŭ śledčy izalatar Kazani — kab nie być achviaraj katavańniaŭ u kałonii.

Zrešty, u historyju pra katavańni ŭ sudzie nie pavieryli.

Pakazalnaja i jašče adna detal. Sałtrukovič zapatrabavaŭ pierakładčyka na biełaruskuju movu i zajaviŭ, što jak biełarus nie razumieje bolšaści skazanaha pa-rusku i tamu nie moža abaraniacca.

Sud adchiliŭ i heta, zaŭvažyŭšy: ruskaja mova ŭ Biełarusi aficyjnaja, Sałtrukovič daŭno žyvie ŭ Rasii, sam piša chadajnictvy i navat apielacyjnyja skarhi pa-rusku. Hetak ža sud rascaniŭ i jaho biaskoncyja chadajnictvy ab dadatkovym aznajamleńni sa spravaj — jak «złoŭžyvańnie pravam i vidavočnaje zaciahvańnie» pracesu.

Rašeńnie Viarchoŭnaha suda Tatarstana ad 5 maja 2026 hoda — kančatkovaje — za listy z pahrozami Sałtrukoviču ničoha nie budzie, razhladać spravu paŭtorna nichto nie źbirajecca.

Mańjaku daviadziecca viartacca ŭ kałoniju.

• 0
• 0
• 5
• 6
• 0
• 1
• 0
• 0